Ilustrasaun fuma tabaku. Imajen/Espesiál.

DILI, 15 dezembru 2021 (TATOLI)—Reprezentante povu iha uma fukun Parlamentu Nasionál liuhosi debate espesialidade ba proposta lei Orsamentu Jerál Estadu (OJE) 2022 aprova taxa seletivu ba tabaku hasa’e $50, ho rezultadu votasaun a-favór 43, kontra tolu no abstensaun 15.

Proposta númeru 2, hasa’e taxa seletivu tabaku ne’e aprezenta hosi deputadu proponente Antoninho Bianco (Fretilin), Abel Pires da Silva (PLP) ho Antonio Verdiál (Khunto).

Iha Proposta Lei (PPL) OJE 2022 previstu iha artigu 6 (Impostos, taxas e contribuições), iha númeru 7 haktuir durante iha tinan 2022, taxa impostu seletivu konsumu aplikavel ba tabaku, posições pautais 2401, 2402 e 2403, ho $25 kada kilograma.

Maibé proposta númeru 2 justifikasaun sumária ho prezente proposta alterasaun númeru 7 iha artigu 6 aumenta taxa impostu seletivu konsumu aplikavel ba tabaku, posizaun pautais 2401, 2402 no 2403, ho $25 ba $50 kada kilograma, pretende kontribui ba kobre reseita no dez-enkoraza konsumu tábaku tanba fuma prezúdika saúde ema nian.

“Oinsá fó hanoin ba jerasaun foun tanba ita haree katak tabaku nia risku barak, estraga saúde no afeta kustu saúde barak mak sai. Tanba ne’e, ami tenta fó hanoin liuhosi iha importasaun tabaku aplika taxa boot hodi prevene sé mak atu sosa karik ho folin boot no redús moras tanba kauza hosi tabaku,” Deputadu proponente Antoninho Bianco deklara iha plénaria, kuarta ne’e.

Tuir proponente sira katak kleur ona diskute asuntu refere no mós ratifika konvensaun tabaku ne’ebé haree ba kauza hosi fuma nune’e iha fatin proposta ne’e.

Deputadu PLP, Abel Pires, hateten tuir dadus Organizasaun Mundiál Saúde Timor-Leste tama iha númeru aas liu iha mundu ne’ebé ba adultu mane 71% mak fuma, feto 29%, no labarik ho idade 13 to’o 15 iha mane 42% fuma, feto 21%. Tanba ema barak fuma, labarik kiik barak la fuma besik sofre moras ispa inklui pulmaun no seluk tán iha TL boot tebes.

Nia haktuir, iha dadus kada tinan tabaku ho kilograma rihun 1900 mak tama TL ne’ebé aplika taxa presu kiik, nune’e fumadór barak tanba sigaru folin baratu, tan ne’e presiza hasa’e taxa hodi redús fumadór liu-liu joven ho labarik sira.

Notísia Relevante: Timoroan ho idade adultu 71% ativu konsumu tabaku

Deputada CNRT, Virgina Ana Belo, hateten hasa’e impostu seletivu konsumu tabaku boot makaas sei fó oportunidade ba sirkulasaun hatama sasán ilegal mós sei barak liután maibé ida ne’e servisu todan ba autoridade seguransa iha fronteira bele atentu situasaun refere.

Ministru Finansa, Rui Augosto Gomes, hateten Governu agradese ba proposta ne’e, tanba atualmente lei tributária aplika $19 kada kilograma bainhira haree hosi impostu seletivu konsumu tabaku nian no Governu propoin iha proposta lei OJE 2022 hasa’e ba $25 ho aumenta 32%, maibé proposta númeru 2 ida-ne’e hasa’e 164%, entaun hakarak hasa’e hosi $19 ba $50.

“Daudaun ne’e kada tabaku masu ida, ita kobra sentimu 3 ho aumenta ne’ebé Governu propoin, nia sei sa’e ba sentimu 33 kada masu. Maibé ho proposta deputadu sira-nian sei sa’e ba 66 sentimu kada masu,” ministru ne’e dehan.

Konserteza ida-ne’e esforsu dezentiva ema labele fuma tanba tabaku ladi’ak ba saúde, ida-ne’e loos no bele kontribui ba reseita doméstika ba ema sira-ne’ebé konsumidór.

“Maibé alerta de’it ba deputadu sira katak ida-ne’e sei tau presaun boot tebes ba autoridade aduaneira atu bele kontrola kontra bandu tanba ita hasa’e taxa ninia reseita boot mak halo ema tama dalan ilegál barak,” nia hateten.

Notísia Relevante: Kada Tinan, Fumadór Sira Mate 600.000

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here