Imajen/Espesiál

DILI, 31 maiu 2021 (TATOLI)—Tuir dadus hosi Ministériu Saúde (MS), hatudu katak, Timoroan ho idade adultu ka tinan 20 ba leten kuaze 71% ativu konsumu tabaku.

Vise-Ministru Saúde Bonifácio ‘Maucoli’ dos Reis fó-sai dadus ne’e, liu hosi mensajen selebrasaun loron mundiál la fuma tabaku, iha 31 maiu.

Notísia relevante:Kada Tinan, Fumadór Sira Mate 600.000

“Tema ba loron mundiál la fuma tabaku maka ‘kompromete atu husik’ ho enfaze atu apoiu fumadór-sira hapara fuma, hodi hahú jornada foun, moris ho saudável ba bem estar no prosperidade. Iha kontestu Timor-Leste, ida-ne’e bele ajuda ema adultu 71%, ne’ebé daudaun-ne’e uza hela Tabaku,” Bonifácio ‘Maucoli’ dos Reis, hateten liu hosi komunikadu, segunda ne’e.

Iha mensajen ne’e deskreve katak, uzu tabaku afeta ba funsionamentu órgaun-sira iha ema-nia isin, no globalmente halakon ema na’in ida-nia vida kada 4 segundu.

MS konsidera uzu tabaku nu’udár fatór risku ida ne’ebé hamosu moras krónika la hada’et hanesan kankru, ra’an midar, moras fuan hanesan tensaun a’as, atakasaun fuan, struk, no moras pulmaun krónika.

Moras hirak-ne’e mak sai kauza ida ba ema mate sedu iha Timor-Leste no ema sai defisiente. Uzu tabaku mós kauza ema bele hetan matan delek, impoténsia, no aumenta risku atu sofre moras tuberculose.

Sigaru ida kontein substánsia kímika tóxicos barak, ne’ebé estraga ema ne’ebé fuma nia-saúde, nune’e mós ba ema ne’ebé horon sigaru nia su’ar.

Iha tempu pandemia, ne’ebé oras ne’e daudaun mundu enfrenta, ema ne’ebé uza tabaku, iha risku boot liu atu dezenvolve síntomas grave bainhira infetadu ho COVID-19.

Alende ne’e, parte saúde konsidera tabaku sai kauza fundamentál ida hodi hamosu pobreza iha sosiedade TL.

Ba ema ne’ebé fuma, MS kalkula katak, kada loron tenki hasai osan hosi sira-nia ingresu finansiál hodi sosa sigaru ne’ebé hafraku ekonomia família, kontribui ba oan sira-nia estadu nutrisionál ne’ebé la di’ak, ikus-mai bele afeta mós ba oan sira-nia kapasidade aprendizazem iha eskola.

Tuir dadus hosi MS katak, Governu TL kada tinan tenki gasta millaun $7 atu refere Timoroan-sira ne’ebé sofre moras krónika ba halo tratamentu iha rai-liur.

Hare hosi nia-impaktu negativu ne’ebé  tabaku  hamosu, importante tebes atu Timoroan-sira hado’ok an hosi estilu moris ne’ebé la saudável.

Vise-Ministru lori Ministériu Saúde nia-naran, apela ba sidadaun hotu-hotu atu tau esforsu hamutuk hodi redús númeru fumadór ne’ebé aas tebes ita Timor Leste, no kontribui harii sosiedade ida ne’ebé  saudável livre hosi sigaru suar, amigável ba meiu ambiente, no prosperidade iha uma-kain hotu-hotu atu la gasta osan ba sosa sigaru.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here