DILI, 15 dezembru 2021 (TATOLI)—Sekretáriu Estadu Arte no Kultura (SEAK), Teófilo Caldas, informa iha segunda (20/12) semana oin ne’e Primeiru-Ministru, Taur Matan Ruak, sei halo lansamentu kona-ba Organizasaun Nasaun Unida ba Edukasaun Siénsia no Kultura (UNESCO, sigla inglés) iha Paris rekoñese ona Tais Timor-Leste sai Patrimóniu Kulturál no Immateriál mundiál.
Notísia Relevante: PN kongratula “Tais” sai patrimóniu mundiál, Governu tenke deside loron nasionál ba “Tais”
“Iha loron 20 dezembru semana oin ne’e, Primeiru-Ministru sei ba halo lansamentu ba ‘Tais’ ne’ebé UNESCO rekuñese sai patrimóniu mundiál ne’ebé sei hala’o iha Maubara Room Timor Plaza,” Teófilo Caldas hateten ba Agência TATOLI, iha Parlamentu Nasionál, kuarta ne’e.
Governu liuhosi Sekretária Estadu Arte no Kultura (SEAK) hato’o parabéns ba povu Timor–Leste no agradese ba UNESCO tanba rekuñese ona tais Timor-Leste sai hanesan patrimóniu kulturál mundiál.
Nia hateten, ho rekuñesimentu ida-ne’e lori nasaun Timor–Leste bele tama ona iha merkadu mundiál.
Notísia Relevante: SEAK Identifika Ona Tais 10 Sei Haruka Ba UNESCO
“Hosi ne’e, ita husu ba ita–nia inan-feton soru-na’in sira tenke soru tais ho kualidade, atu nune’e ita fornese tais ba nasaun sira seluk ho kualidade,” nia dehan.
Nia husu mós ba jerasaun foun sira atu aprende soru tais atu nune’e tais ne’e labele lakon iha Timor-Leste.
“Nune’e, ita mós iha hanoin atu hasai rezolusaun ida kria loron nasionál ba tais atu ema hotu hatais vistuáriu tais. Di’akliu iha loron segunda semana dahuluk nian iha insár bandeira, ema hotu–hotu tenke uza tais,” Governante ne’e hateten.
Entretantu, iha loron 14 fulan-dezembru tinan ne’e, Organizasaun Nasaun Unida ba Edukasaun Siénsia no Kultura (UNESCO-sigla inglés) iha Paris, rekoñese ona Tais Timor-Leste sai Patrimóniu Kulturál no Immateriál mundiál.
Notísia Relevante: 2020, TL Haruka Tais Ba UNESCO Hetan Rekoñesimentu Sai Patrimóniu Kulturál No Materiál
Jornalista : Nelia Fernandes
Editór : Cancio Ximenes
