SEAK Identifika Ona Tais 10 Sei Haruka Ba UNESCO

DILI, 03 fevereiru 2020 (TATOLI)–Diretór Jerál Arte no Kultura, Manuel Ximenes Smith informa, Sekretáriu Estadu Arte no Kultura (SEAK), identifika ona tais 10 husi munisípiu hotu iha Timor-Leste ne’ebé sei haruka ba iha UNESCO (Organizasaun Nasaun Unida ba Edukasaun, Siénsia no Kultura) Paris atu sai Timor-Leste nia patrimóniu Kulturál imateriál.

“Ita identifika ona tais 10 husi munisípiu hotu ne’ebé sei haruka ba UNESCO iha Paris sai hanesan Timor-Leste nia patrimóniu Kulturál imateriál. Ezemplu, primeiru ita ko’alia kona-ba dialetu. Dialetu ne’e mak hanesan karater munisipiu ida-idak ni’an,” Manuel Ximenes Smith dehan ba Agênsia TATOLI iha nia kna’ar fatin, Avenida Portugal, ohin.

Ko’alia kona-ba tais, nia hatutan, ezemplu tais Bunak ne’e nia influénsia to’o iha ne’ebé. Tanba, tuir nia, tais Bunak iha Bobonaro, Same, Ainaro, no tais Bunak iha Suai ne’e haree hanesan de’it. Entaun, nia esplika, sei haree no tetu fali ba munisípiu ida ne’ebé mak sira permanente ho sira-nia kultura orijinál.

“Ita haree tiha ona tais 10 ne’ebé sei haruka ba iha UNESCO Paris maibé ekipa sei haree fila-fali kona-ba kualidade, dokumentasaun, kualidade video, kualidade ba buat hotu-hotu tenke haree. Liuliu kona-ba futus, nia meius soru no nia uza nia naturál ba halo kór no mós kona-ba materiál ne’ebé soru-na’in sira uza hodi soru tais ne’e,” nia dehan.

Hakarak ka lakohi, tuir nia, iha kritériu balun ne’ebé presiza haree maibé ida ne’e orsida sei fila-fali ba komisaun sira haree tanba tais ne’e define ona no komisaun sei reuniaun iha semana oin atu foti desizaun.

“Ita foti tais orijinál ne’ebé mak ho karater aas. Tais ne’ebé ho nia estatutu sosiál aas no tais ne’ebé mak balun kuaze atu lakon. Tais ne’ebé ita atu foti ne’e, tais ne’ebé mak mai duni husi naturál ka karaterístika ema munisípiu ida-idak nian,” nia esplika.

Entretantu, nia infroma, tais ne’e hili bazeia ba ekipa husi Komisaun Nasionál Patrimóniu Kulturál Imaterial (Komnas PKI), hala’o forum konsultativu durante loron haat (28 dezembru 2019-01 janeiru 2020) iha Munisípiu Ermera, Viqueque, Manatuto, Lautem, Baucau, Ainaro no Covalima.

Notísia relevante:SEAK Kria Forum Konsultativu Ba Nomeasaun Tais Iha UNESCO

Jornalista : Nelia Fernandes

Editór       : Rafy Belo