Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

DILI, 13 dezembru 2021 (TATOLI)–Ministru Koordenadór Asuntu Ekonómiku (MKAE), Joaquim Amaral, hateten, Governu daudaun ne’e hein hela rezultadu auditoriu hosi Tribunal das Contas (TdC) molok kontinua projetu investimentu Timor-Leste (TL) Cement iha munisípiu Baucau.

“Agora prosesu hein de’it Tribunal das Contas, tanba agora halo hela auditoriu, kuandu fó sai ona rezultadu maka prosesu ne’e kontinua. Auditoriu ne’e Tribunal halo kona-ba gastu sira ne’ebé halo ona iha anteriór atubele transforma empreza ne’e hosi limitada ba sosiedade anónima,” Ministru Koordenadór informa ba Agência TATOLI, iha resintu Parlamentu Nasionál, segunda ne’e.

Iha sorin seluk, governante ne’e deside lakohi fó komentáriu kona-ba rai iha área ne’ebé planeia atu harii fábrika simente, tanba molok projetu ne’e atu hala’o, iha ona akordu entre Governu no komunidade lokál.

“Kona-ba rai ne’ebé daudaun sai polémika, ha’u hanoin uluk hahú projetu ne’e iha akordu ida, no ema lubuk ne’ebé sira-nia foto iha, ne’ebé ha’u lakohi fó komentáriu ba ida-ne’e, ami foku hodi hein rezultadu auditoriu hosi Tribunal,” nia akresenta.

Notísia relevante: Reprezentante Kaisidu-oan la aseita harii ponte kais no fábrika semente

VIII Governu Konstitusionál prontu apoia no kolabora ba investimentu tanba fó benefísiu no loke kampu traballu ba joven sira.

Tuir planu, TL-Cement sei harii fábrika simentu besik zona luan ne’ebé nakonu ho ahu ruin (kalkáriu) ho kualidade a’as iha rejiaun Baucau no sei halo produsaun simentu iha faze bázika fábrika hodi halo esportasaun no simentu ba abastesimentu konstrusaun sivil iha Timor-Leste.

Komunidade lokál mak sei sai benefisiáriu dahuluk ba projetu ne’e, tanba sei abranje objetivu boot tolu Governu kona-ba reforma ekonómika hanesa aumenta investimentu privadu, promove diversifikasaun ekonómika no promove empregu sustentável.

Governu asina ona sertifikadu investimentu ho L & S Unipessoal (otelaria), Otél Palm Spring Lda. no Stamford Medical Lda.

Projetu ne’e rasik, sei uza mós ho enerjia renivável hosi Alemaña hodi la kontribui efetivu ba populasaun.

Notísia relevante: Governu no TL-Cement hatudu kompromisu kontinua projetu simentu iha Baucau

Iha 17 maiu 2016, Governu Timor-Leste no TL-Cement asina akordu espesiál investimentu ba projetu.

Iha 2018, Governu liuhosi reuniaun Konsellu Ministru estraordinária aprova rezolusaun ba akordu sosiál ida ho empreza TL-Cement hodi aselera prosesu implementasaun fábrika simentu iha munisípiu Baucau hodi loke serbisu ba joven sira purvolta 300 iha faze dahuluk, hafoin kontrinua to’o 1.000-resin.

Antes ne’e, iha Proposta Orsamentu Jerál Estadu (OJE) 2019 propoin mós orsamentu millaun $50 hodi partisipa ba investimentu, ne’ebé Governu ninia asaun 40% hodi bele avansa prosesu bao in no fó konfiansa ba investimentu.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here