Ministru Petróleu no Minerál, Víctor da Conceição Soares. Imajen TATOLI/Egas Cristovão

DILI, 20 janeiru 2021 (TATOLI)--Governu Timor-Leste hamutuk ho empreza TL-Cement, hatudu kompromisu atu kontinua instalasaun fábrika simentu iha munisípiu Baucau.

Kompromisu entre parte rua ne’e mosu hafoin Ministru Petróleu no Minerál, Víctor da Conceição Soares, hamutuk ho entidade relevante konvoka enkontru kortezia ho Prezidente TL-Cement, Jamees Rhee ho ninia ekipa.

“Ha’u husu empreza ne’e hakarak negósiu, mai ita tuur hamutuk ho seriedade, ne’ebé nia (Jamees Rhee) mai duni no liuhosi diskusaun ho Governu iha duni kompromisu no seriedade atu avansa projetu ne’e,” Ministru Víctor hateten iha Pálasiu Governu, kuarta ne’e.

Liuhosi reuniaun ne’e, Governu husu ba empreza atu hato’o relátoriu tanba Governu Timor-Leste transfere ona millaun $4,9 atubele atualiza atividade peskiza no estudu esplorasaun.

“Ha’u hanoin agora TL-Cement tenke halo fali relátoriu hodi fornese informasaun kona-ba atualizasaun fundu ne’e, hafoin halo transformasaun ba sosiedade anónima (S.A),” nia akresenta.

Parte rua ne’e deside hamutuk atu estabelese Konsellu Administrasaun, ne’ebé hosi parte Timor-Leste nomea ema na’in-rua ne’ebé liuhosi desizaun Konsellu Ministru no TL-Cement mós hili ema atu halo planu no dezisaun estratéjiku tanba sai ona empreza konsórsiu, nune’e bele aumenta kapitál ba investimentu ne’e.

Aleinde ne’e, Governu husu empreza atu kumpre rekizitu garantia banku (bank statement), liuliu fornese informasaun kona-ba kapitál ne’ebé empreza iha.

“Ha’u hanoin iha tinan-ida ne’e nia laran, diskusaun sira ne’e bele avansa no bele hahú tama ona ba faze lansamentu fatuk dahuluk ba instalasaun fábrika simentu,” Governante ne’e hatutan.

VIII Governu Konstitusionál prontu apoia no kolabora ba investimentu iha setór mineiru tanba  fó benefísiu no loke kampu traballu ba joven sira.

Tuir planu, TL-Cement sei harii fábrika simentu besik zona luan ne’ebé nakonu ho ahu-ruin (kalkáriu) ho kualidade aas iha rejiaun Baucau no sei halo produsaun simentu iha faze bázika fábrika hodi halo esportasaun no simentu ba abastesimentu konstrusaun sivíl iha Timor-Leste.

Komunidade lokál maka sei sai benefisiáriu dahuluk ba projetu ne’e, tanba sei abranje objetivu boot tolu Governu kona-ba reforma ekonómika hanesan aumenta investimentu privadu, promove diversifikasaun ekonómika no promove empregu sustentável.

Governu asina ona sertifikadu investimentu ho L & S Unipessoal (otelaria), Otél Palm Spring Lda. no Stamford Medical Lda.

Projetu ne’e rasik, sei uza mós ho enerjia renovável hosi Alemaña hodi la kontribui efetivu ba poluisaun.

Iha 17 maiu 2016, Governu Timor-Leste no TL-Cement asina akordu espesiál investimentu ba projetu.

Iha 2018, Governu liuhosi reuniaun Konsellu Ministru estraordináriu aprova rezolusaun ba akordu sosiál ida ho empreza TL-Cement hodi aselera prosesu implementasaun fábrika simentu iha munisípiu Baucau hodi loke serbisu ba joven sira purvolta 300 iha faze dahuluk, hafoin kontinua to’o 1.000-resin.

Proposta Orsamentu Jerál Estadu (OJE) 2019 propoin mós orsamentu millaun $50 hodi partisipa ba investimentu, ne’ebé Governu ninia asaun 40% hodi bele avansa prosesu ba oin no fó konfiasa ba investimentu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here