Primeiru-Ministru, Taur Matan Ruak, hala'o enkontru ho Reprezenta Komunidade Kaisidu hodi ko’alia kona-ba Programa Dezenvolvimentu Produsaun Semente, iha Rezidénsia Ofisiál PM, Farol, sexta (08/10). Imajen TATOLI/Francisco Sony

DILI, 08 outubru 2021 (TATOLI)–Reprezentante Kaisidu-oan la aseita Governu deside fatin ne’ebé lokaliza iha munisípiu Baucau, hodi harii ponte kais no investimentu fábrika semente, tanba konsidera área ne’e nu’udar área protejida.

Reprezentante Kaisidu-oan, Selestiano Belo, hateten, liuhosi reuniaun uma-kain hamutuk 38 iha loron 15 setembru 2018, deside hodi fó fiar ba ekipa kiik, hasoru líder orgaun soberanu sira hodi hato’o preokupasaun ligadu ho investimentu projetu fábrika semente no futuru ponte kais iha sira-nia fatin.

“Ami hato’o preokupasaun katak, karik realiza duni projetu ne’e, Governu no Estadu Timor-Leste tenke husu legalidade empreza. Ami-nia hakarak planu halo fábrika tenke muda ba fatin seluk, ami mós la aseita harii ponte kais iha área refere tanba hanesan fatin protejidu, ne’ebé fatin ne’e iha tali tahan ne’ebé atu halo ami-nia uma-lisan. Tanba ne’e, ami proteje fatin ne’e no sei la fó ba ema ida,” Selestiano Belo, relata hafoin ho ekipa hasoru Primeiru-Ministru, Taur Matan Ruak, iha Rezidénsia ofisiál Farol, sesta ne’e.

Nune’e mós, Martinho da Costa Belo, konsidera, empreza ne’ebé kaer obra la respeita kultura Kaisidu no laiha komunikasaun ho lia-na’in.

“Ami la’ós lakohi atu hala’o dezenvolvimentu iha ami-nia rain, ami koopera tebes, maibé kompañia ida atu tama iha ne’ebá tenke respeitu fatin protejidu, entaun ami mai hasoru Primeiru-Ministru la’ós atu bandu dezenvolvimentu, ami hakarak maibé envolve intelektuál Kaisidu-oan no lia-na’in hodi diskute di’ak, determina fatin ne’ebé Governu uza hodi foti fatuk kalkari, liuliu área Waiono, ne’ebé hanesan área protejidu no Governu labele uza no foti hodi fó ba kompañia hodi harii fábrika no mós labele harii ponte kais,” nia kestiona.

Notísia relevante: Governu-empreza hahú diskute transforma TL-Cement limitada ba Sosiedade Anónima

Maski nune’e, Kaisidu-oan prontu koopera ho Governu hodi oferese área ne’e ba Governu no Estadu hodi harii turizmu kulturál.

“Primeiru-Ministru resposta katak, ami tenke ko’alia ba malu tanba komunikasaun la’o ladi’ak no hatudu momoos katak empreza bainhira tama iha área refere la fó lisensa ba kultura no tama tuir hakarak, tanba ne’e Primeiru-Ministru husu ami atu ko’alia didi’ak no rezolve problema nu’udar ema timor-oan,” nia haktuir.

Iha tinan 2018, Governu liuhosi reuniaun Konsellu Ministru (KM) estraordinária aprova rezolusaun ba akordu sosiál ida ho kompañia Timor-Leste Cement hodi aselera prosesu implementasaun fábrika simentu iha munisípiu Baucau.

Nune’e, Proposta Governu ba Orsamentu Jerál Estadu (OJE) 2019 propoin mós orsamentu milliaun $50 ba partisipasaun Estadu iha investimentu ne’e, ne’ebé reprezenta 40% maibé fazeadamente, hafoin prosesu la’o ba oin mak sei aumenta, hodi fó konfiansa ba parte rua nia fundasaun no investimentu.

Ho aprovasaun rezolusaun ne’e, sei aselera prosesu implementasaun projetu hodi loke kampu servisu ba joven sira, ne’ebé ho previzaun pur-volta 300 iha faze dahuluk, hafoin kontinua to’o 1.000-resin.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here