DILI, 10 dezembru 2021 (TATOLI)— Parlamentu Nasionál aprova Orsamentu Jerál Estadu (OJE) 2022 ho montante $52,113,565 ba Ministériu Saúde iha espesialidade ho votu afavór 41 abstensaun 21 no kontra 0.
“Nune’e, Orsamentu Jerál Estadu (OJE) 2022 ba Minsitériu Saúde aprovadu,’’ Prezidente Parlamentu Nasionál, Deputadu Aniceto Longuinhos Guterres Lopes, hateten iha sala plenária Parlamentu Nasionál, sesta ne’e.
Notísia Relevante: OJE 2022: PN aprova millaun $12,5 ba Ministériu Justisa
Hosi totál ne’e aloka ba kategoria saláriu vensimentu $24,633,600, bens no servisu $13,564,957, kapitál menór $41,000,005, kapitál dezenvolvimentu $1,916,203, transferénsia públika $10,998,800.
Orsamentu ne’e sei finansia ba programa tolu, sub-programa 19 no atividade 69 ne’ebé alokadu ba programa governasaun di’ak no instituisionál prevee $8,548,068, programa saúde alokadu $43,563,497 no igualidade jenéru no inkluzaun sosiál prevista $2,000.
Alende ne’e, Parlamentu Nasionál mós aprova proposta rua hosi deputadu proponente, Noe da Silva Ximenes, Helena Martins Belo no Antonio Nobre Tilman.
Proposta rua ne’e ho númeru 58 no númeru 60 atu Ministériu Saúde transfere orsamentu iha kategoria despeza ka salariu vensimentu ba programa ho kodígu 805 kona-ba saúde ho sub-programa servisu ambulánsia no atividade servisu integradu emerjénsia mediku no ambulánsia.
Tanba, Diresaun Nasionál Apoia Servisu Médiku Emerjénsia ho dotasaun inisiál $340.000, maibé altera ka hasai $124.000 ba dotasaun final ho orsamentu $216.000 ne’ebé tau iha rúbrika salariu.
Iha Diresaun Servisu Nasionál Ambulánsia Emerjénsia Médika ho dotasaun inisiál ba atividade $50.958 hodi altera no tau tan $124.000 iha dotasaun final ba atividade $17.496,3.
Kona-ba proposta 60 iha programa kodígu 805 kona-ba saúde ho dotasaun insiál hamutuk $10.998.800 hodi altera no hasai tiha $190.000 ba dotasaun finál $10,808,800.
Notísia Relevante: PN aprova OJE 2022 ba MAPKOMS millaun $9-resin iha espesialidade
Jornalista : Felicidade Ximenes
Editór : Florencio Miranda Ximenes
