Prezidente Konsellu veteranu. Vidal de Jesus "Riak Leman". Imajen Tatoli/Francisco Sony.

DILI, 29 novembru 2021 (TATOLI)–Prezidente Konsellu Kombatente Libertasaun Nasionál (CCLN, siglá portugés), Vidal de Jesus ‘Riak Leman’, hateten Governu iha devér atu kontinua buka-tuir saudozu Prezidente Repúblika Nicolau Lobato nia ruin ne’ebé to’o agora seida’uk hetan.

Notísia Relevante: Somotxo preokupa ho PR Nicolau Laboto nia ruin ne’ebé seidauk hetan

“Governu nia dever mak buka tuir saudozu Nicolau Lobato no saudozu sira seluk ne’ebé lakon no mate iha funu laran nia ruin, tanba ne’e la’ós Konsellu Kombatente Libertasaun Nasionál nia kompeténsia. CCLN liuhosi Ministéiru Asuntu Kombatente bele halo komunikasaun hodi buka-tuir nafatin saudozu Nicolau Lobato no sira-ne’ebé lakon iha funu hanesan Daitula, Mahudu, Sabalae no seluk tán. Ita hotu nia preokupasaun ida de’it mak atu bele hetan saudozu sira-nia ruin,” Riak Leman hateten ba Agência TATOLI iha nia knar fatin, Caicoli, Dili, segunda ne’e.

Nia hateten, Ministéiru Asuntu Kombatente Libertasaun Nasionál (MAKLN) presiza kontinua halo negosiasaun ho Governu Indonézia hodi bele buka-tuir saudozu sira-nia ruin.

Sei konstrui monumentu

Aleinde ne’e, Prezidente CCLN  ne’e hateten MAKLN iha ona planu hamutuk ho komisaun halo levantamentu dadus tuir uma-lisan atu bele hatene kombatente hira mak mate iha funu laran no mate ba ukun rasik-an ne’e.

“Planu ba tinan oin, hafoin levantamentu sei konstrui monumentu tuir postu administrativu no monumentu ne’e hodi hakerek sira hotu nia naran, ne’ebé sira-nia ruin ita buka la hetan to’o agora. Hafoin ne’e, ita halo dezlutu hanesan veteranu tuir ida-idak nia grau hodi valoriza,” nia dehan.

Ho monumentu ne’e, bele fó rekuñesimentu ba kombatente sira-ne’ebé mate to’o agora seida’uk hetan sira-nia ruin.

Tanba, nia informa, Governu liuhosi Ministéiru Asuntu Kombatente Libertasaun Nasionál (MAKLN) finaliza ona dezeñu ba monumentu ho modelu ida de’it hodi konstrui iha territóriu tomak.

“Orientasaun fó ba konsellu veteranu munisipál sira atu identifika fatin, bainhira orsamentu iha ona bele halo konstrusaun,” nia dehan.

Notísia Relevante: MAKLN prevee millaun $99-resin iha OJE 2022

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here