Prezidente RDTL ba dahuluk, Nicolau Lobato. Imajen espesiál.

DILI, 29 novembru 2021 (TATOLI)—Deputadu Fretilin, José Agostinho Sequeira ‘Somotxo’,  kontinua preokupa ho saudozu Nicolau Lobato nia ruin ne’ebé to’o agora seidauk hetan.

Notísia Relevante: PN kontinua ejize Governu buka-tuir Nicolau Lobato nia ruin

“Sempre ezije no preokupa kona-ba Prezidente Nicolau Lobato nia ruin ho sira seluk ne’ebé konsidera hanesan lakon to’o agora seida’uk hetan. Ida-ne’e hanesan preokupasaun Estadu no timor-oan nian oinsá mak bele hetan hodi halo tuir serimónia tradisionál,’’ Somotxo hateten ba Agência TATOLI iha Parlamentu Nasionál, segunda ne’e.

Veteranu tinan 24 ne’e hateten, iha tinan hirak liu-ba atuál Ministru ba Asuntu Kombatente Libertasaun Nasionál, Meta Malik, sei asume knaar hanesan Sekretária Estadu Asuntu Veteranu fó sai ona katak la kleur tan sei hetan saudozu Nicolau Lobato nia ruin, maibé to’o agora seidauk iha rezultadu nafatin.

Eis Ministru Defeza ne’e, nafatin husu ministéiru tutela no konsellu veteranu atu nafatin komunika Ministéiru Negósiu Estranjeiru no Kooperasaun (MNEK) hodi koordena ho Governu Indonézia atu haree ba asuntu refere.

Iha komemorasaun loron istóriku sira hanesan 28 novembru sempre re-lembra hikas saudozu sira, iha 1975 lori povu ida-ne’e ba independésia.

Tanba ne’e, nia dehan, atu buka saudozu sira-nia ruin hanesan Nicolau Lobato, Sabalae, Daitula, Mahudu, ida-ne’e la’os fasil, nune’e liuhosi kanál ne’ebé iha hodi komunika.

Notísia Relevante: Mandati husu Indonézia hatudu Nicolau Lobato nia ruin

“Hanoin lakon iha funu laran no sempre militár Indonézia sira mak oho ka lori ba fatin ruma mak oho, nune’e sé mak atu fó informasaun mak militár Indonézia ne’ebé uluk iha ne’e, balun sei moris bele fó hatene,” nia dehan.

Tan ne’e, nia dehan, Governu presiza nafatin halo komunikasaun ativu ho Governu Indonézia atu bele haree, buka tuir saudozu sira-nia ruin no presiza mós akordu hosi nasaun rua ninian.

“Uluk kedas ha’u dehan primeiru asina nota entendimentu ida kona-ba funu bainhira ramata saida mak halo entre inimigu ho inimigu. Tenke iha akordu ida-ne’ebé asina, aban bainrua fó dalan nafatin ba parte sira kumpre nia obrigasaun hanesan ba dokumentu, ruin, kilat no ba ema ruma hetan kastigu iha fatin ruma karik, bele entrega ba malu maibé ita la halo’’ nia hateten

Notísia Relevante: Veteranu sira husu Governu buka-tuir PR Nicolau Lobato nia ruin

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here