Família vítima inundasaun ne’ebé hela iha alojamentu provizóriu iha aldeia lisbutak, Manleuana. Imajen TATOLI/ Natalino Costa.

DILI, 25 novembru 2021 (TATOLI)— Governu liuhosi Sekretaria Estadu Protesaun Sivíl (SEPS), kada semana, kontinua apoia ai-han no nesesidade baziku sira ba vítima inundasaun iha sentru akollamentu sira iha kapitál Dili.

“Ita kontinua apoia ai-han no bee-moos inklui nesesidade baziku seluk ba vítima inundasaun ne’ebé dadaun hela iha sentru akollamentu atu sira aguenta hodi hein desizaun Governu re-aloka sira ba alojamentu provizóriu,” Diretór Jerál SEPS, Ismael Babo, hateten ba Agência TATOLI, via telefónika, kinta ne’e.

Notísia Relevante: Governu deside re-aloka vítima inundasaun iha Manleuana ba alojamentu provizóriu

Vítima inudansaun ne’ebé kontinua hela iha sentru akollamentu hanesan Dom Bosco Comoro hamutuk uma-kain 35 no Metiaut na’in-37.  

Ba vítima uma-kain 11 iha Hera no 48 iha Manleuana re-aloka ona ba alojamentu provizóriu.

“Ba maluk sira ne’ebé Governu re-aloka ona ba alojamentu provizóriu ka kost, ne’e governu la apoia ona alimentasaun tanba Governu selu ona kost,” Diretór ne’e akresenta.

Tanba, tuir lei SEPS katak oferese ka apoia hahán ba sidadaun sira ne’ebé enfreta hela situsaun emerjénsia hanesan dezastre naturál, maibé muda ona ba fatin seguru ka alojamentu provizoriu ne’e labele hetan ona apoia ai-han. 

“Ita fó hahán ba sira iha kost ne’e, tenke liuhosi desizaun foun hosi governu, maka ita bele  fó tanba  sasan Estadu nian ita labele fó arbiru,” nia akresenta.

Notísia Relevante: Vítima inundasaun iha alojamentu provizóriu laiha ai-han atu konsumu

Nune’e, Diretór Jerál ne’e husu ba vítima sira iha alojamentu provizóriu iha Manleuana tenke esforsu buka ai-han atu nesesita moris lor-loron.

“Ha’u hanoin sira tenke buka rasik ai-han ba sira nia aan, hodi bele aguenta moris, sira labele hein de’it governu. Kuandu bee laiha ne’e kost nain maka tenke kria kondisaun tanba Governu selu ona kost,” nia akresenta..

Entretantu, Ekipa tékniku hosi Ministériu Planu no Ordenamentu (MPO) no Ministériu Administrasaun Estatál (MAE) finaliza ona dezeñu detalladu ba projetu sentru akollamentu multifunsaun.

Daudaun, submete ona ba Ajénsia Dezenvolvimentu Nasionál (ADN) atu halo verifikasaun hodi lori ba Konsellu Administrasaun Fundu Infraestrutura (KAFI) atu halo aprovasaun, hafoin bele hahú konstrusaun.

Sekretáriu Estadu Terras no Propriedade (SETP), halo indetifikasaun no prepera ona rai ektare 12 iha Tibar, Beduku no Perumnas-Dili atu konstrui sentru akollamentu multifunsaun ba vítima dezastre naturál iha 4 abríl.

Hafoin inundasaun iha loron 04 abríl 2021, ema hamutuk na’in-34 mak mate no na’in-14 maka lakon iha nivél nasionálm família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiuDili no uma hamutuk 4.231 mak hetan estragu.

Notísia Relevante: Governu finaliza ona dezeñu detalladu ba sentru akollamentu multifunsaun

Jornalista : Natalino Costa  

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here