Governu hahú prepara karreta atu re-aloka vítima inundasaun iha Manleuana ba alojamentu provizóriu ka Kost. Imajen TATOLI/ Antonia Gusmão.

DILI, 15 novembru 2021 (TATOLI)–Ekipa téknika hosi Ministériu Planu no Ordenamentu (MPO) no Ministériu Administrasaun Estatál (MAE) finaliza ona dezeñu detalladu ba projetu sentru akollamentu multifunsaun.

“Ita sei halo libertasaun rai iha Beduku, maibé ekipa tékniku finaliza ona estudu viabilidade no dezeñu ba sentru akollamentu multifunsaun.  Dezeñu detalladu  submete ona ba Ajénsia Dezenvolvimentu Nasionál (ADN) atu halo verifikasaun, hafoin lori ba Konsellu Administrasaun Fundu Infraestrutura (KAFI) halo aprovasaun, hafoin  deside orsamentu ba konstrusaun”, Vise Primeiru Ministru no Ministru Planu no Ordenamentu, José Maria dos Reis, informa ba Agência TATOLI iha Faról-Dili, segunda ne’e.

Notísia relevante: SETP prepara rai ektare 12 konstrui sentru akollamentu multifunsaun

Sekretáriu Estadu Terras no Propriedade (SETP), halo identifikasaun no prepara ona rai ektare 12 iha Tibar, Beduku no Perumnas-Dili atu konstrui sentru akollamentu multifunsaun ba vítima dezastre naturál iha 4 abríl.

Alende ne’e, Governu mós prepara ona rai balun iha Hera halo uma abitasaun hodi bele muda família vítima hamutuk 41 iha Manleuana.

“Uma-kain 41 ne’e laiha duni rai atu halo uma ba hela, entaun orsamentu hosi Fundu infrastrutura balun mós iha atu finansia liuhosi diresaun Ministériu Administrasaun no Estatál nian,” Governante ne’e afirma.

Tuir identifikasaun hosi Diresaun Terra no Propriedade hatudu katak rai iha fatin tolu ne’e rai Estadu, nune’e laiha problema atu harii sentru akollamentu multifunsaun ba família vítima dezastre naturál no komunidade ne’ebé hela iha área risku ba dezastre.

Daudaun ne’e, vítima dezastre naturál hamutuk uma-kain 135 kontinua hela iha sentru akollamentu iha kapitál Dili.

Hosit totál 135 ne’e hela iha Dom Bosco Comoro 35, Kapela Hera 11 no Manleuana 41 no Metiaut 37.

Hafoin inundasaun iha loron 04 abríl 2021, ema hamutuk na’in-34 mak mate no na’in-14 maka lakon iha nivél nasionál família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiu Dili no uma hamutuk 4.231 mak hetan estragu.

Notísia relevante: Governu deside re-aloka vítima inundasaun iha Manleuana ba alojamentu provizóriu

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here