Família vítima inundasaun ne’ebé hela iha alojamentu provizóriu iha aldeia lisbutak, Manleuana. Imajen TATOLI/ Natalino Costa.

DILI, 18 novembru 2021 (TATOLI)— Reprezentante portavoz vítima inundasaun iha alojamentu provizóriu, aldeia Lisbutak, suku Manleuana-Dili, Ricardino Matos da Cruz, agradese ba Governu tanba konsege lori vitima sira ba hela iha fatin dignu, maibé daudaun hasoru difikuldade tanba laiha ai-han atu konsumu.

“Governu muda ami hosi sentru akollamentu Manleuana mai kost, maibé ami hasoru difikuldade mak susar ba ai- han, tanba maluk balun foos laiha ona atu han.  Nune’e ami husu governu atu apoia alimentár ba ami,” Ricardino Matos hateten ba jornalista sira iha alojamentu provizóriu, aldeia Lisbutak-Manleuna, kinta ne’e.

Nia preokupa kondisaun alojamentu provizóriu tanba kuartu ladun sufisiente ba uma-kain ne’ebé ho membru família barak.

“Ha’u hato’o ona preokupasaun kona-ba laiha bee-moos no ai-han ba iha autoridade suku Manleuna, maibé seidauk iha resposta,” nia akresenta.

Iha fatin hanesan, Vitima Luciana Ataede, sente triste tanba dezde sira sai hosi sentru akollamentu iha domingu to’o agora la hetan apoia alimentár ruma hosi Governu.

“Ami mai hela deit iha ne’e fulan ida, governu selu kost $70, maibé ami susar tebes atu hetan hahan no bee-moos,” nia afirma.

Hatan ba kesatun ne’e, Xefe Suku Manleuna, Jacob Tilman Soares, informa, família vítima inundasaun ne’ebé hela iha kost ne’e Governu no ajénsia internasionál rekolla ona dadus atu apoia ai-han.

“Ha’u hato’o ona preokupasaun vitima sira nia ba parte kompetente atubele responde iha tempu badak,” Xefe suku ne’e afirma.

Nune’e, autoridade lokál ne’e espera iha tempu badak, Governu bele fó apoia ba nia komunidade aldeia rua hanesan Lisbutak no Lamorai  ne’ebé hela ona iha kos tatu bele sustenta moris lor-loron.

Entertantu, Prezidente Autoridade Munisipiu Dili, Guilhermina Filomena Saldanha, informa, daudaun esforsu makas atu lori vítima sira iha sentru akollamentu ba hela iha alojamentu provizóriu.

“Vítima sira ne’e iha autoridade munisipiu Dili nian juridisaun ne’ebé ami iha obrigasaun atu asegura família 131 atu muda hotu ba kost no esforsu atu apoia ai-han no bee-moos,” PAM kompromete.

Tuir dadus ikus ne’ebé parte PAM asesu hosi Ministériu Administrasaun Estatál (MAE) iha fulan- setembru familia afetadu 4 abríl  ne’ebé sei iha sentru akollamentu na’in-131.

Maibé, MAE liuhosi PAM konsege muda ona família vítima na’in-48 iha iha sentru akollamentu bai ha alojamentu provizóriu.

Nune’e, iha segunda ne’e (15/11), Autoridade Munisípiu Dili konsege lori sai tan família uma kain nain-27 iha Beduku-Hera no uma-kain hamutuk 18 iha Akanuno ba alojamentu provizóriu iha Hera.

“Ita mós observa ona maluk sira iha Sentru akollamentu Dom Bosco Comoro ho família nain-35 no Metiaut uma-kain ualu hodi lori mós sira ba iha kost, maski sira laiha problema bainhira tempu udan,” nia akresenta.

Hodi hatutan: “Ami la halo deskriminasaun ba ita nian komunidade sira ne’ebé maka sei hela iha lona okos tanba ami sei esforsu atu re-aloka hotu ba kost”.

Alojamentu provizóriu ne’ebé vítima-sira okupa ona ho kondisaun di’ak no uma balun ne’ebé odamatan seidauk iha sei monta hotu no bee-moos sei  asesu ho di’ak.

“Ami rasik ba haree fatin ne’e dignu ona ba ita nia maluk sira kompara hela iha lona okos,” nia akresenta.

Jornalista : Natalino Costa     

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here