Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 19  maiu 2021 (TATOLI)–VIII Governu Konstitusionál liuhosi Ministériu Administrasaun Estatál (MAE) ho Sekretariadu Tékniku Administrasaun Eleitorál (STAE) hahú preparasaun téknika hodi realiza eleisaun Prezidensiál iha marsu 2022.

“Governu liuhosi STAE preparadu atu realiza Eleisaun Prezidensiál iha tinan-oin no daudaun ne’e Governu no STAE prepara ona asuntu tékniku sira hodi preparadu 100% atu realiza Eleisaun Prezidensiál iha marsu 2022,” Ministru Administrasaun Estatál, Miguel Pereira de Carvalho, hateten iha edifísiu Ministériu Finansa, Aitarak-laran, kuarta ne’e.

Notísia relevante: 2021: CNE halo preparasaun ba aktu eleitorál, ba eleisaun prezidensiál 2022

Governante ne’e informa, daudaun STAE halo hela preperasaun atubele hahú resensiamentu eleitorál no atuliza baze dadus iha territóriu nasionál no estranjeiru iha loron 1 jullu 2021 to’o janeiru 2022.

Nune’e, STAE mós hahú  halo rekruta ba tékniku sira hodi halo resensiamentu eleitorál.

“Ami hamutuk ho STAE halo mós traballu lojíztika boot ida hodi halo identifikasaun fatin ba sentru votasaun sira iha territóriu nasionál no estranjeiru, maski Timor-Leste hasoru situasaun pandemia Covid-19,” nia akresenta.

Aleinde ne’e,  Governu halo alterasaun daneen ba lei númeru 7/2006, loron 28 dezembru, kona-ba lei Eleitorál ba Prezidente Repúblika

Iha alterasaun ne’e, inklui mós reketizu ba kandidatura sira hanesan rejistu kriminál no rekezitu saúde hodi garante Prezidente Repúblika eleitu ho kondisaun saúde di’ak hodi serbí sidadaun sira.

“Ita-nia objetivu prinsipál maka atu garante katak bele iha biban ba sidadaun hotu ezerse direitu demokrátiku  ba Eleisaun  Prezidensiál. Ami mós halo planu lojíztika hodi halo no tuir planu, nune’e bele realiza tuir kalendáriu,” nia hatutan.

To’o 31 marsu tinan ne’e, STAE rejista ona eleitór sira hamutuk 839.430 no eleitór sira maiória iha rai-laran, enkuantu rai-li’ur kuaze eleitór hamutuk 6.010.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here