Ministru Obra Públika (MOP), Salvador Eugênio Soares dos Reis Pires. Imajen TATOLI/Francisco Sony

DILI, 23 novembru 2021 (TATOLI)— Ministru Obra Públiku (MOP), Salvadór Eugénio Soares dos Reis Pires, informa, fó ona instrusaun ba Institutu Jestaun Ekipamentu, Institutu Públiku (IGE,I.P sigla Portugés), atu halo normaliza ponte Bilimau, postu administrativu Cailaco, munisípiu Bobonaro.

“Ha’u orienta ona IGE, I.P atu toma asaun emerjénsia ba ponte sira ne’ebé kotu hanesan iha Bilimau no fatin sira seluk. Nune’e IGE hahú halo levatamentu dadus no mobiliza ona ekipamentu atubele normaliza ponte ne’e iha tempu besik,” Ministru Salvadór, hateten ba Agência TATOLI iha Hotél Timor,Dili, tersa ne’e.

Notisia Relevante: Mota Marobo sobu ponte Bilimau difikulta movimentu komunidade

Ministru Salvadór esplika normalizasaun ho karakter emerjénsia ba ponte no estrada, dala-ruma IGE hala’o mobilizasaun tarde tanba ekipamentu pezadu todan atu lori ba terrenu.

IGE hahú prepara atu tula ekipamentu sira ba terrenu, maski iha limitasaun ba ekipamentu pezadu tanba daudaun ekipamentu sira espalla iha territóriu tomak.

Governante ne’e, afirma IGE, I.P mós loke ona konkursu públiku atu halo akizasaun ba ekipamentu pezadu sira no parseiru Japan International Cooperation Agency (JICA) mós posibilidade apoia tan ekipamentu pezadu.

Daudaun, ekipa taskforce ne’ebé estabelese hosi Primeiru Ministru, Taur Matan Ruak, hala’o ona levantamentu dadus ba estragu kauza inundasaun dezastre naturál, nune’e prosesu tomak iha ona Konsellu Administrasaun Fundu Infraestrutura (KAFI) atu administra no aprova hodi submete ba Komisaun Nasionál Aprovizionamentu (CAN, sigla Portugés) prosesa aprovizionamentu, hafoin bele rekupera.

“Planu mitigasasaun no rekuperasaun ba ponte liuliu Bilimau, Dilór no sira seluk iha ona,maibé funsionamentu Governu ne’e buat hotu birokrátiku tebes ne’ebé espera ita bele rezolve no utrapasa tiha prosesu administrativu sira ne’e hodi halo rekuperasaun,” nia akresenta.

Notisia Relevante: Governu Sentrál presiza halo intervensaun urjénsia ba ponte Bilimau

Jornalista    : Arminda Fonseca

Editór         :  Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here