Kondisaun ponte Bilimau, ligasaun entre Postu Administrativu Cailaco, Munisípiu Bobonaro no Postu Administrativu Hatulia, munisípiu Ermera. Imajen espesiál.

BOBONARO, 22 novembru 2021 (TATOLI) – Autoridade Munisípiu Bobonaro husu Governu Sentrál liuhosi Ministériu Obra Públika (MOP) atu halo intervensaun lalais ba ponte Bilimau ne’ebé kauza hosi udan boot iha semana rua liubá.

Administradór Postu Administrativu Cailaco, Munisípiu Bobonaro, Alfredo Meta Dau, husu Governu Sentrál normaliza ponte Bilimau hodi fasilita konetividade transporte públiku entre munisípiu Bononaro no Ermera. 

Administradór Postu Administrativu Cailaco, Alfredo Meta Dau. Imajen Tatoli/Sérgio da Cruz.

“Ha’u husu ba Governu liuhosi Ministériu Obra Públika atu haree problema kona-ba ponte Bilimau nian ne’e, maske ponte ne’e kotu ne’e la’ós iha ami-nia área, maibé ha’u rekomenda ba governu atu orienta Institutu Jestaun no Ekipamentu (IJE) mai hadi’a tiha tanba ponte ne’e liga kedas ba munisípiu rua nian,” nia ko’alia iha iha suku Ritabou, postu administrativu Maliana, segunda ne’e.

Autoridade postu Cailaco ne’e haktuir, ponte ne’e kotu kauza hosi akontese udan boot iha semana rua kotuk, maibé iha tinan kotuk mós kotu, tanba volume bee hosi mota maka’as halo rai monu hotu, ikus mai movimentasan komunidade Cailaco, Bobonaro no Hatulia, munisípiu Ermera paradu.

Nia parte koordena ona ho Administradór Postu Administrativu Hatulia, atu buka mekanismu aprezenta problema ne’e ba Governu, nune’e bele hetan intervensaun lalais hodi fasilita movimentasaun transporte públiku no privada sira, nune’e mós atividade ekonomia komunidade munisípiu rua nian bele la’o normal, liuliu iha tempu udan.

“Agora ha’u prepara ona proposta atu submete ba iha autoridade munisípiu nune’e proposta ne’e tama dala-ida, naran katak responde ami-nia pedidu. Sé lae udan fó ameasa ba komunidade sira-nia vida, tanba sira tau ai de’it mak uza la’o ba-mai,” nia hateten.

Kestaun ne’e, Sekretáriu Autoridade Munisípiu Bobonaro, Júlio Carvalho Caero, enkamiña ona proposta direitamenta ba Ministériu Obra Públika. 

Sekretáriu Autoridade Munisípiu Bobonaro, Júlio Carvalho Caero. Imajen Tatoli/Sérgio da Cruz.

Julio husu ba Governu Sentrál atu halo intervensaun lalais tanba ponte ne’e ameasa naksobu maka’as iha tempu tuir mai bainhira udan boot.

“Ha’u konfirma ona ponte ne’e kotu la’ós iha Bobonaro nian, maibé prontu tanba dalan ne’e ligasaun entaun ami mós iha responsablidade boot atu haree asuntu ne’e, tanba karta ba tiha ona, agora resposta mak seidauk mai,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here