Kondisaun atuál ponte Bilimau. Imajen/Geraldo Martins.

DILI, 21 fevereiru 2021 (TATOLI)—Mota Marobo sobu ponte Bilimau ne’ebé liga postu Administrativu Hatulia, Munisípiu Ermera ba Postu Administrativu Cailaco Munisípiu Bobonaro difikulta movimentu komunidade atu faan produtu lokál iha merkadu.

Xefe Suku Ailelo, Postu Administrativu Hatulia, Geraldo Martins hateten ponte ne’e kotu semana-tolu ona durante udan-boot ne’ebé akontese iha meiu fulan janeiru.

“Agora ami enfrenta difikuldade boot tanba maioria komunidade iha área ne’e moris ho fila-liman,” Geraldo Martins informa ba jornalista Agéncia Tatoli via telefónika, domingu ne’e.

Autoridade lokál ne’e esplika, ponte Bilimau kotu ba dala-tolu ona no antes ne’e kompañia ne’ebé halo konstrusaun estrada iha Postu Administrativu Hatulia mak fó apoiu hodi ateru atu salva ponte ne’e hosi mota, maibé la konsege tanba udan la para durante semana-rua.

Autoridade lokál hato’o ona relatóriu verbál ba parte Ministériu Obras Públika, maibé to’o oras ne’e seidauk iha observasaun ba ponte ne’e.

Ponte ne’e rasik konstrui hosi Governu Indonézia desde tempu okupasaun ho naruk metru 50 no luan metru 8.

Geraldo Martins mós informa katak udan boot ne’ebé akontese iha semana ne’e halo estrada hosi Hatulia Vila ba Suku Ailelo kotu totál kuaze metru 20.

Jornalista: Arminda Fonseca

Editór: Cipriano Colo

HAKEREK NO HATÁN

Please enter your comment!
Please enter your name here