Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Francisco Sony

DILI, 23 novembru 2021 (TATOLI)- VIII Governu Konstitusionál deside, iha fulan ne’e, hahú hala’o konsulta públiku kona-ba reajustamentu Planu Estratéjiku Dezenvolvimentu (PED) 2011-2030 no hala’o  sondajen “Aspirasaun Timoroan ba Futuru’’ ba suku 138 iha territoriu nasionál. 

Vise-Primeiru Ministru no Ministru Planu no Ordenamentu, José Maria dos Reis, nu’udar koordenadór ba prosesu reajustamentu PED 2011-2030, halo ona reuniaun konsulta ho Arcebispo Arquidiocese Dili, Dom Virgílio do Carmo da Silva, SDB no Bispo Dioseze Maliana, Dom Norberto do Amaral hodi rona opiniaun kona-ba sondajen ne’e rasik.

“Iha fulan ne’e nia-laran, ekipa enumeradór ema na’in 46 destaka ona ba suku hamutuk 138 iha territóriu nasionál hodi hala’o sondajen “Aspirasaun Timor-oan ba Futuru”. Objetivu hosi sondajen ne’e atu rekolla populasaun Timor-Leste sira nia hanoin kona-ba dezafiu ne’ebé sira hasoru no sira-nia aspirasaun ba futuru Timor-Leste ne’ebé sira hakarak iha tinan 15 oin-mai,” Ministru José Reis, hateten liuhosi nota ne’ebé Agência TATOLI asesu, tersa ne’e.

Notísia Relevante: MPO rona opiniaun Don Virgílio kona-ba reajustamentu PED 2011-2030

Objetivu hosi konsulta públiku ba reajustamentu PED hodi asegura katak dokumentu planu estratéjiku nasionál ba tinan 15 oin mai ne’e, refleta duni mehi populasaun hotu nian, hodi asegura inkluzaun no la husik hela ema ida iha kotuk iha prosesu dezenvolvimentu.

Nune’e mos, sondajen ne’e realiza liuhosi kolaborasaun entre Sentru Planeamentu Integradu (CPI) hosi Ministériu Planu no Ordenamentu (MPO), Unidade Planeamentu, Monitorizaun, no Avaliasaun (UPMA) hosi Gabinete Primeiru Ministru, Diresaun-Jerál Estatístika iha Ministériu Finansas, no Ministériu Administrasaun Estatál. 

Alende, sondajen ne’ebé hala’o daudaun ekipa téknika sei halo mós konsulta ho líder eis-titularár, líder konfisioza relijiozu sira, reprezentante hosi entidade, instituisaun no komunidade hotu, inklui sosiedade sivíl, setór privadu, akadémia, partidu polítiku, mídia, autoridade munisipál, líder komunitáriu, líder grupu juventude, feto, no grupu vulnerável no marjinalizadu sira. 

Konsulta ho entidade hotu inklui partidu polítiku atu garante planu estratéjiku nasionál sai instrumentu ba koezaun nasionál no estabilidade governativa, hodi garante kontinuidade iha esforsu ba dezenvolvimentu nasaun ne’ebé justu, sustentável, no bele mellora ben-estár povu tomak nian.

Desizaun VIII Governu Konstitusionál liuhosi rezolusaun númeru. 81/2021, 21 Jullu ba establesimentu Komisaun Interministeriál ba reajustamentu PED 2011-2030 ne’e bazeia ba situasaun atuál Timor-Leste nian ne’ebé kontinua depende ba fundu mina-rai, no mós ho problema ki’ak no dezigualidade multidimensionál ne’ebé Timor-Leste hasoru antes ona no magnifika liután ho impaktu hosi pandemia COVID-19 no dezastre naturál sira. 

Konsidera situasaun atuál ne’e, mak reajustamentu PED opta konsetu dezenvolvimentu sustentável ne’ebé konsagra ona iha konstituisaun RDTL no aliña mós ho objetivu Dezenvolvimentu Sustentável (ODS).

Nune’e, reajustamentu PED sei garante vizaun komún ida ba futuru Timor-Leste tuir aspirasaun populasaun Timor-Leste hotu nian ho medida estratéjiku prazu médiu no naruk nian ne’ebé integradu no iha balansu di’ak entre dimensaun tolu hosi dezenvolvimentu sustentável, sosiál, ekonómiku, no ambientál.

“Konseitu dezenvolvimentu ida ne’e nia sentru mak ema, natureza, no dame, tuir kontekstu Timor-Leste nian, no bazeia ba prinsípiu direitu umanu garante inkluzaun hodi la hosik ema ida iha kotuk, no sei bazeia mós ba evidénsia, potensialidade territoriál, no rasionalizasaun kustu-benefísiu,” Governante ne’e akresenta.

Aleinde ne’e, konseitu dezenvolvimentu ne’e orientadu ba atinjimentu vizaun no meta previstu iha setór prinsipál sira, inklui sub-setorál no programa sira, atu garante planu estratéjiku  prazu médiu no naruk ida ne’ebé integradu nu’udar matadalan ba dezenvolvimentu sustentável, konta ho progresu sira ne’ebé Timor-Leste atinje ona. 

Reajustamentu PED sei foti lisaun sira hosi implementasaun Planu Dezenvolvimentu Nasionál (PDN 2002-2020) no Planu Estratéjiku Dezenvolvimentu (PED 2011-2030) hanesan planu rekuperasaun ekonómika, relatóriu CVAR no CVA, no estratéjia setorál sira seluk hodi difine medida estratéjiku hirak ne’ebé própriu ba responde situasaun atuál no antesipa risku no ameasa sira ne’ebé bele mosu iha futuru. 

Notísia Relevante: MPO-UNTL selebra akordu kolabora prosesu reajustamentu PED

Jornalista   : Arminda Fonseca

Editór         :  Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here