Vise Primeiru-Ministru no Ministru Planu no Ordenamentu (MPO), José Maria dos Reis no ekipa halo enkontru ho Arsebispu Arkidioseze Metropolitana Dili no Pro-Prezidente Konferénsia Episkopál Timorense, Don Virgílio dos Carmo da Silva, iha Kámara Ekleziástika Arquidioeceze Dili, iha Bidau Lecidere, kinta (14/10). Imajen/MPO

Dili, 14 outubru 2021 (TATOLI)—Vise Primeiru-Ministru no Ministru Planu no Ordenamentu (MPO), José Maria dos Reis, hasoru malu ho Arsebispu Arkidioseze Metropolitana Dili no Pro-Prezidente Konferénsia Episkopál Timorense, Don Virgílio dos Carmo da Silva, hodi ko’alia kona-ba dezenvolvimentu nasionál.

Enkontru ne’ebé realiza iha Kámara Ekleziástika Arquidioeceze Dili iha kinta ne’e, hodi rona opiniaun kona-ba desizaun Governu atu halo reajustamentu Planu Estratéjiku Dezenvolvimentu (PED) 2011-2030, nune’e bele rona opiniaun no perspetiva hosi Amu Bispu, kona-ba área prioridade iha dezenvolvimentu nasaun.

“Enkontru ne’ebé ita hala’o hanesan parte hosi prosesu konsulta ne’ebé ministériu no ekipa tékniku hosi Sentru Planeamentu Integradu halo ho entidade, instituisaun no komunidade hotu atu asegura ema hotu nia partisipasaun iha prosesu reajustamento PED ne’e,” Ministru José Maria dos Reis hateten liuhosi nota ne’ebé Agência TATOLI asesu, kinta ne’e.

Notísia relevante: MPO-UNTL selebra akordu kolabora prosesu reajustamentu PED

Iha ámbitu ne’e, Amu Bispu levanta kestaun balun liga ho dezenvolvimentu rekursu umanu, infraestrutura bázika hanesan bee-moos, saneamentu, irrigasaun, inklui agrikultura ne’ebé presiza halo di’ak liután.

Aleinde ne’e, Amu Bispu preokupa ho situasaun atuál sira hanesan dezempregu ba foin-sa’e no risku mudansa klimátika.

“Tanba ne’e, kona-ba reajustamento PED  ita sei tau atensaun ba ema, planeta, no harii dame, ne’ebe sei aliña mós ho Igreja Katólika (Amu Papa) nia Encíclica ‘Laudato Si’ kona-ba relasaun di’ak entre ema ho natureza no ema ho ema, nomós ‘Fratelli Tutti’ kona-ba fraternidade no Amizade ne’ebé bolu atensaun atu harii unidade, enkoraja asaun sira ne’ebé kuida no sustenta ema sira vulnerável no frajil liu, inklui garante prosesu harii pás no halakon dezigualdade,” nia dehan.

Nune’e, Igreja Katólika no Konfisaun Relijioza sira iha Timor-Leste sai hanesan parseiru importante ba Governu atu ajuda kontribui ba dezenvolvimentu futuru nasaun nian ne’ebé sustentavel no justu.

Liu ona tinan 10 implementasaun PED 2011-2030 nian, Governu hakarak halo ajustamentu filafali ba dokumentu estratéjiku ein termu estruturamente no kondutór hosi prosperidade nasionál, liuhosi estratéjika integrada, inkluziva no reziliente.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here