Primeiru-Ministru no Ministru Planu no Ordenamentu, José Maria dos Reis, hamutuk ho Magnífiku Reitór UNTL, João Soares Martins, asina nota entendimentu. Imajen/MPO

DILI, 23 juñu 2021 (TATOLI)–Ministériu Planu no Ordenamentu (PMO) selebra nota entendimentu ho Universidade Nasionál Timor Lorosa’e (UNTL) atu kolabora liuhosi Sentru Planementu Integradu iha prosesu reajustamentu Planu Dezenvolvimentu Estratéjiku (PED) no iha dezenvolvimentu polítika estratejia nasionál sira.

Akordu ne’e, asina direita hosi Vise Primeiru-Ministru no Ministru Planu no Ordenamentu, José Maria dos Reis, hamutuk ho Magnífiku Reitór UNTL, João Soares Martins.

“Memorandu entendimentu ida-ne’e sai nu’udar akordu entre entidade rua atu kolabora liuhosi Sentru Planeamentu Integradu iha prosesu reajustamentu Planu Dezenvolvimentu Estratéjiku no dezenvolvimentu polítika estratéjika nasionál sira,” refere nota ne’ebé Agência TATOLI asesu, kuarta ne’e.

Prosesu reajustamentu PED aprovadu hosi Rezolusaun Konsellu Ministru iha semana kotuk, ho kriasaun Komisaun Institusionál ne’ebé lidera hosi Primeiru-Ministru, Taur Matan Ruak, no sei kompoin hosi Vise Primeiru Ministru na’in-rua, Ministru Prezidénsia Konsellu Ministru, Ministru Koordenadór Asuntu Ekonómiku no Ministra Negósiu Estranjeiru no Kooperasaun.

Notísia relevante: Governu estabelese komisaun interministeriál reajusta PED

Komisaun traballu, ne’ebé koordena hosi Sentru Planu Integradu (CPI, sigla portugés) no MPO, lidera diretamente hosi Ministru José Maria dos Reis, tuir Lei Orgánika ministériu, ne’ebé sei hala’o traballu tékniku no sei halo koordenasaun ho Unidade Planeamentu Monitorizasaun no Avaliasaun (UPMA) no serbisu tékniku hosi grupu Universidade.

“Akordu ne’e tanba rekoñese katak papél akadémiku sira importante tebes iha prosesu dezenvolvimentu polítika no estratéjika,” nota deskreve.

Entendimentu ne’e loke dalan atu reforsa no habelar kolaborasaun entre parte rua atu dezenvolve konsulta, diskusaun no semináriu iha área relevante sira, inklui ho foku ba Planeamentu Urbanu, Planeamentu Ordenamentu Territóriu no liga ba reajustamentu PED.

Nune’e mós, hanesan oportunidade di’ak atu UNTL bele elabora planu no prepara kuadru sira ne’ebé nesesáriu atu responde ba merkadu dezenvolvimentu iha tinan 20-30 oin mai.

Jornalista  : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here