Kondisaun ponte Dilor iha postu Lacluta, Viqueque ne’ebé kotu. Imajen/Espesiál

DILI, 19 novembru 2021 (TATOLI)—Institutu Jestaun Ekipamentu, Institutu Públiku (IGE, I.P) iha ona planu, iha semana oin, ekipa destakadu iha munsípiu sei tun normaliza ponte Dilor no Welolo iha postu Lacluta, munisípiu Viqueque, ne’ebé a’at tanba impaktu dezastre naturál.

“Komunidade postu Lacluta preokupa ho ponte rua ne’e, ne’ebé difikulta movimentu, ho ida-ne’e hosi parte enjiñeiru institutu foti ona dadus no iha prosesu mobilizasaun, ne’ebé segunda semana oin bele tun normaliza ona,” Prezidente Konsellu Administrasaun IGE, I.P, Ermenegilda da Costa Laurentina, hateten ba Agência TATOLI, iha ninia knaar fatin, Caicoli, sesta ne’e.

Notísia relevante: Autoridade Lacluta husu Governu normaliza ponte Dilor no Welolo

Tuir Ermenegilda da Costa, ekipa IGE, I.P destakadu iha munisípiu normaliza ona ponte Dilor kuaze dala-10 tanba hetan estragu durante inundasaun iha dezembru 2020, maibé tanba evolusaun COVID-19 iha Viqueque maka autoridade husu institutu hapara atividade.

“Maibé daudaun IGE, I.P rasik foti fali ona dadus, atu hadi’a maibé mota Dilor nia volume bee boot tanba ne’e ita hein bainhira volume bee tun ona mak ita sei aterru,” nia akresenta.

Notísia relevante: IGE normaliza ponte estragu liga Natarbora-Dilor impaktu husi udan

Aleinde ne’e, Autoridade postu Lacluta, José Andrade dos Santos, husu ba Governu atu normaliza ponte Dilor no Welolo ne’ebé kotu tanba inundasaun, nune’e bele fasilita movimentu populasaun no transporte.

Infraestrutura ne’ebé a’at hanesan ponte ligasaun postu Natarbora, munisípiu Manatutu bá postu Lacluta, munisípiu Viqueque.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here