Kondisaun ponte Dilor iha postu Lacluta, Viqueque ne’ebé kotu. Imajen/Espesiál

VIQUEQUE, 18 novembru 2021 (TATOLI)-Autoridade postu administrativu Lacluta, munisípiu Viqueque, José Andrade dos Santos, husu ba Governu liuhosi Ministériu Obra Públika (MOP) atu normaliza ponte Dilor no Welolo ne’ebé kotu tanba inundasaun, nune’e fasilita movimentu populasaun no transporte.

“Ministériu relevante tenki tau atensaun, labele haree de’it. Agora tempu udan, entaun kada loron mota rua ne’e tun. Ho nune’e, fó impaktu ba ponte, ne’ebé halo populasaun no karreta atu liu mós ladi’ak. Aleinde ne’e, mota rua fó impaktu ba to’os sira, tanba ne’e presiza normaliza urjente,” Autoridade postu hateten ba Agência TATOLI, via telefónika, kinta ne’e.

José Andrade dehan, ponte rua kotu iha tempu udan dikulta movimentu hosi suku Dilor, Ahic, Laline no Uma tolu.

Iha fatin ketak, Diretór Servisu Obra Públika Viqueque, Mário do Rego, hateten, ponte Dilor ne’e kotu iha fulan hirak liubá, maibé to’o agora seidauk rezolve.

“Ponte Dilor kotu iha inundasaun loron 04 abríl no iha momentu ne’ebá ekipa nasionál tun hasai dadus, maibé ita hein to’o agora seidauk normaliza,” nia akresenta.

Diretór ne’e dehan, tuir loloos hadi’a iha tempu bailoron tanba agora tempu udan mota tun beibeik bele difikulta populasaun no transporte hodi atravesa.

“Tuir planu Institutu Lestaun no Ekipamentu, Institutu Públiku (IGE, I.P) atu mai loke dalan iha Viqueque maibé to’o agora seidauk, Ministru rasik hasai despaixu maibé institutu ne’e seidauk mai,” nia akresenta.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here