Kondisaun sentru integradu agrikultura ba agro-komérsiu iha área Raitahu Viqueque, kuarta (17/11). Imajen TATOLI/Vitorino Lopes da Costa

VIQUEQUE, 17 novembru 2021 (TATOLI)—Antigu alunu timor-oan Arava International Center for Agriculture Training (AICAT) Israel hamutuk nain-25, hamutuk ho joven balun sei destaka iha sentru agro-komérsiu iha área Raitahu, suku Uma-uain kraik, postu Viqueque villa, munisípiu Viqueque.

“Tuir planu, iha fulan-dezembru ami hahú kuda batar iha rai ektare 25 no prepara mós fatin ba pekuária,” Diretór MAP Viqueque, Carlos Pinto, hateten ba Agência TATOLI, iha ninia knaar fatin, Viqueque villa, kuarta ne’e.

Sentru integradu agrikultura ba agro-komérsiu ne’ebé okupa rai ektare 145 estabelese hosi Ministériu Agrikultura no Peska (MAP) iha loron 05 outubru.

Notísia relevante: MAP halo abertura sentru agro-komérsiu iha Viqueque

“Daudaun limpeza hotu ona no hahú halo tan ona lutu, ne’ebé ninia progresu serbisu foin atinje 20%,” nia akresenta.

“Agora joven AICAT hamutuk ualu hahú halo ona lutu, tanba hahú udan ona, ne’ebé ita tenke kria lutu ne’ebé animál sira labele sai ba estrada,” nia tenik.

Aleinde ne’e, antigu alunu sira idenifika ona fatin hodi hala’o atividade agrikultura, peska, pekuária no ortikultura, ne’ebé hein de’it atu hatama tratór hodi fila rai.

Governu aloka orsamentu hamutuk $650.000 hodi harii sentru integradu agrikultura, ne’ebé sei implementa atividade agro-komérsiu.

Antes ne’e, desde tinan 2015, Timor-Leste no Israel halo kooperasaun iha formasaun rekursu umanu iha área agrikultura hodi dezenvolve setór agrikultura, ne’ebé to’o agora rejista ona antigu alunu hamutuk 200-resin.

Notísia relevante: MAP rejista antigu alunu AICAT hamutuk 200 resin

Durante ne’e, parte MAP sempre tau-matan ba antigu alunu sira-nia atividade produsaun ortikultura iha Seloi Krai, munísipiu Aileu, ne’ebé daudaun ne’e sira fa’an ona iha loja no supermerkadu iha Dili.

Aleinde ne’e, joven agrikultura sira halo mós atividade ortikultura iha Lakló, Liquiçá no Viqueque.

Nune’e mós, antigu alunu sira daudaun ne’e balun serbisu iha setór públiku no privadu inklui kria rasik kampu traballu.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here