Natar iha Atabae. Imajen TATOLI/António Gonçalves

DILI, 23  jullu 2021 (TATOLI)–Diretór Nasionál Formasaun Agríkola hosi Ministériu Agrikultura no Peska (MAP), Hipolito da Costa, informa, daudaun ne’e rejista antigu alunu Arava International Center for Agriculture Training (AICAT) Israel hamutuk 200 resin.

Antes ne’e iha tinan 2015, Timor-Leste no Israel halo kooperasaun iha formasaun rekursu umanu iha área agrikultura hodi dezenvolve setór agrikultura.

“Ami seidauk iha dadus fixu, maibé hosi tinan 2015 to’o 2019  ami rejista  cerca de 200 estudante AICAT, ne’ebé ita fofoun haruka ema na’in-20, hafoin kada tinan sira hasa’e kouta ba 30, 50 to’o ema na’in-70 resin, ne’ebé foin daudaun desloka iha tinan 2019,” Diretór Nasionál ne’e informa ba Agência TATOLI, iha ninia knaar fatin, edifísiu MAP, Comoro, sesta ne’e.

Durante ne’e,  parte MAP sempre tau-matan ba antigu alunu sira-nia atividade produsaun ortikultura iha Seloi Krai, munísipiu Aileu, ne’ebé daudaun ne’e sira fa’an ona iha loja no supermerkadu  iha Dili.

Aleinde ne’e, joven agrikultura sira halo mós atividade ortikultura iha Lakló no Liquiçá.

Nune’e mós, antigu alunu sira daudaun ne’e balun serbisu iha setór públiku no privadu inklui kria rasik kampu traballu.

“Ami halo levantametu dadus ba sira-nia atividade hodi haree benefísiu hosi formasaun ne’ebé sira hetan ona iha área agrikultura,” nia akresenta.

Maski nune’e, tinan ne’e parte MAP la haruka tan joven halo formasaun iha Israel tanba situasaun pandemia.

“Pedidu hosi Governu Israel seidauk mai atu haruka tan ema na’in hira bá, maibé tinan ne’e  ita laiha planu haruka estudante atu ba tuir formasaun tanba sei haree ba evolusaun pandemia ne’ebé agora afeta ba mundu tomak inklui ba ita-nia rai rasik,” nia hatutan.

Tanba ne’e, parte MAP no Ministériu Negósiu Estrajeiru no Kooperasaun (MNEK)  daudaun ne’e tuur hamutuk hodi ko’alia kona-ba kestaun ne’e.

“Ami halo diskusaun intensiva ho MNEK tanba sira mós husu ita-nia kompromisu atu iha kontinuasaun ba formasaun ne’e, tanba importante ba ita-nia alin sira hodi aprende buat balun, maski la’o ba rai dook,” nia tenik.

Nia dehan,  formasaun ne’e  laós atu aprende  de’it kona-ba agrikultura, maibé forma joven atu iha kapasidade no koñesimentu sai líder ba sosiadade iha futuru.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here