Abertura sentru agro-komérsiu iha Viqueque. Imajen Tatoli//Vitorino da Costa Lopes

VIQUEQUE, 05 outunbru 2021 (TATOLI)-Ministériu Agrikultura no Peska (MAP) no autoridade munisípiu Viqueque halo abertura ba fatin estabelesementu sentru integradu agrikultura ba agro-komérsiu, iha suku Raitahu, postu administrativu Viqueque Vila, munisípiu Viqueque.

“Projetu ne’e, implementa iha suku Uma Uain Kraik, ha’u sente la sala tanba área ida ne’e poténsial, estratéjiku sei sai baze dezenvolvimentu ekonómia iha kosta sul,” Diretór nasionál MAP husi diresaun Komérsiu Indústria, Fernando Amaral ba jornalista Agência Tatoli, iha Sentru Integradu Agrikultór, Raitahu, tersa ne’e.

Ezekutivu ne’e informa katak implementasaun sentru integradu ne’e okupa rai 145 hektar hodi implementa atividade liuliu agro-komérsiu nian.

“Kona-ba rai nian ami hetan ona karta husi Ministru Justisa tanba lei hateten rai kuandu 100 ba leten ministru maka asina. Nune’e ministru asina, iha fulan jullu despasu tun mai adiministradór no ita halo keda sosializasaun iha Dili, munisípiu Viqueque to’o iha suku la’o di’ak”, Fernando haktuir.

Nia informa, imlementasaun ne’e sei fó esperansa boot tanba sei benifisia munisípiu Viqueque. “Ba futuru ita sei luta hamutuk tau baze komérsiu tuir padraun (standar) internasionál iha Viqueque”, Nia realsa.

Sentru integradu agrikultura sei hamosu inovasaun teknójia, terminál agro-komérsiu boot hodi servi ba merenda eskolár. “Sei integra atividade agrikultura no turizmu. Ita la’ós de’it hetan osan husi agrikutura maibé ita mós hetan osan husi turizmu. Sei haki’ak animál fuik sira hodi atrai vizitór sira mai vizita,” Diretór ne’e garante.

Tanba ne’e, tuir nia, rai ektar 145 sei transforma eko agro-turismu tinan lima ba leten sei mudansa boot. Orasamentu ba implementasaun sentru integradu agrikultura sei gasta totál rihun $650. “Ho implementasaun planu ne’e, presiza ita hotu nian koopersaun hodi atinji objetivu no loke kampu ba joven sira,” nia fó-hanoin.

Iha fatin hanesan, Adiministradór munisípiu Viqueque, Januario Soares ‘Boly’, agradese ba governu tanba hanoin di’ak implementa sentru integradu agrikultór iha munisípiu Viqueque.

“Ha’u husu agradese ba governu tanba implementa atividade agrikultór ida. Ohin ita abertura, to’o dezembru atividade agrikultura iha ne’e sei la’o di’ak. Implementa ida ne’e, loke mós kampu serbisu ba joven sira. Tanba durante ne’e joven barak maka la hetan serbisu, maibé ho inisiativa governu nian joven 105 sei servisu iha sentru integradu agrikultura hodi tau-matan ba atividade ne’ebé implementa iha ne’e”.

Entretantu iha serimónia abertura ne’e, hetan partisipasaun husi autoridade no komunidade husi suku Uma Uain Kraik. Iha serimóna ne’e simbólika lere du’ut iha fatin sentru integradu agrikultura.

Notísia relevante:MAP sei instala sentru agro-komérsiu iha Viqueque

Jornalista: Vitorino Lopes da Costa
Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here