Primeiru-Ministru, Taur Matan Ruak, asina dokumentu kompromisu hapara moras tuberkuloze iha Timor-Leste, iha salaun City 8, Manleuana, kinta (30/09). Imajen TATOLI/Francisco Sony

DILI, 30 setembru 2021 (TATOLI)Governu liuhosi Primeiru-Ministru (PM), Taur Matan Ruak, hamutuk ho parseiru, asina kompromisu hodi hapara Tuberkuloze iha Timor-Leste liuhosi meiu oioin.

“Komprimisu ne’ebé apela ba ita-nia partisipasaun ba divulgasaun no sensibilizasaun  ba sidadaun bainhira identifikasaun kazu foun, tanba iha referénsia hosi instituisaun espesializada sira, iha feto no mane timor-oan merese no justifika asisténsia boot no apoiu koordena entre Governu ba sosiedade sivil, ukun-na’in, relijiozu, ukun-na’in lokál no família hodi serbisu hamutuk ho forma atu prevene no kura moras Tuberkuloze,” Xefe Governu afirma iha salaun City 8, Manleuana, kinta ne’e.

Primeiru-Ministru, Taur Matan Ruak. Imajen TATOLI/Francisco Sony

Nia konsidera, komprimisu ne’e boot tebes entre servisu no sidadaun sira, tanba bele lori kampaña sosializasaun no prevensaun ba uma ida-idak, hosi odamatan ida ba odamatan seluk.

Ba PM, investimentu iha luta hasoru Tuberkuloze no moras seluk ho risku hada’et ne’ebé a’as, la’os de’it despeza ida maibé desizaun justa hosi Governu ne’ebé hakarak povu moris ho saudável.

“Kompromisu ne’ebé ita asina, hakarak hadi’a liután iha tinan-lima oin mai, besik ba ema sira ne’ebé iha risku boot liu, ema infetada ka inkapasitada moras ne’e,” nia akresenta.

Tuberkuloze afeta ema kuaze 508, iha kada abitante 100.000 iha Timor-Leste, ne’ebé reprezenta taxa insidénsia boot liu daruak iha rejiaun Sudeste Aziátiku no nasaun ho númeru infetadu a’as liu iha mundu tomak.

“Ita la kontente ho númeru sira ne’e no nunka konforma ho rezultadu ne’ebé ita hetan iha tinan hirak ikus ne’e. Iha sentidu ida-ne’e nu’udár Xefe Governu, ohin ita renova ita-nia komprimisu ne’ebé maka la hatene kolen hodi halakon Tuberkuloze,” Taur otimista.

Ema ne’ebé infetadu Tuberkuloze presiza tulun sosiedade hodi promove komportamentu saudável iha alimentasaun, ijiene ka prevensaun ba moras infektokontajioza sira.

“Ita halibur malu iha ne’e hodi hafoun Planu Estratéjiku Dezenvolvimentu Nasionál (PEDN) no prevee ona iha Objetivu Dezenvolvimentu Sustentavel (ODS). Tanba ne’e, ita asina kompromisu ho parseiru sira, nune’e iha esperansa atu alkansa, iha tinan-lima oinmai mudansa konkreta no luta kontra moras ne’e,” PM afirma.

Esperansa mak sei haforsa espíritu hodi mobilizasaun meiu foun no rekursu ba kombate Tuberkuloze, ne’ebé lidera hosi Ministériu Saúde, nível nasionál hodi promove vontade foun, estabelese parseria foun no implementa espíritu saúde familiár foun no komunitária.

“Ho meiu sira ne’ebé disponível, presiza ema hotu nia kolaborasaun ho forma integrada, ho estratéjia multisetoriál, tanba Tuberkuloze la’ós de’it autoridade saúde ka Governu nia obrigasaun, maibé mós devér síviku ida hosi sidadaun ida-idak,” Xefe Ezekutivu fó hanoin.

Primeiru Ministru, Taur Matan Ruak, akompaña ho membru Governu relevante no parseiru kaer dokumentu kompromisu hapara moras tuberkuloze iha Timor-Leste, iha salaun City 8, Manleuana, kinta (30/09). Imajen TATOLI/Francisco Sony

Tuberkuloze hanesan moras ne’ebé ho podér transmisaun boot liuhosi via respiratória no kontájiu lalais tebtebes, ne’ebé konsidera hanesan flajelu ida hosi moras a’at sanulu ne’ebé hamate ema barak iha mundu no sai nu’udár obstákulu sériu ba sosiedade ne’ebé hakarak sai moderna no dezenvolvida.

Xefe Ezekutivu nota katak prátika internasionál ne’ebé di’ak liu hatudu katak atu halakon Tuberkuloze la’ós de’it ambisaun ba prevensaun no kura, maibé medida ezijente ba prosesu dezenvolvimentu.

PM konsidera, komprimisu ne’e iha vantajen ba investimentu hosi parseiru dezenvolvimentu hanesan Fundu Globál, Ajénsia Koperasaun Koreana(KOICA), Organizasaun Mundiál Saúde( OMS), Organizasaun  Mundiál ba Migrasaun sira(OIM), Governu Austrália no organizasaun sosiedade sivil oin-oin ba Timor-Leste.

“Ami konta ho imi-nia esforsu, empeñu no dedikasaun, atu hamutuk ita hapara Tuberkuloze ba timor-oan sira-nia moris. Ba Timor-Leste ida livre hosi Tuberkuloze. Ba Nasaun ida ho sidadaun saudável no bele dezenvolve ninia potensiál. Ba nasaun ida ho saúde públika ne’ebé modernu no saudável,” PM subliña.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here