Deputadu Joaquim Dos Santos, Imajen Tatoli/Antonio Goncalves.

DILI, 09 novembru 2021 (TATOLI)—Prezidente Komisaun A Trata Asuntu Justisa no Konstituisional, Joaquim dos Santos ‘Boraluli’, hateten Parlamentu Nasionál ho Governu bele iha inisiativa hodi submete fila-fali lei reparasaun vítima ne’ebé hetan kaduka hodi bele kontinua diskute.

Notísia Relevante: Relatóriu CAVR-CVA rekomenda ba Estadu atu halo polítika reparasaun

Iha 2010, Prezidente Parlamentu Nasionál saudozu Fernando La Sama Araújo nia tempu, lejisladór sira diskute lei reparasaun ba vítima no hetan ona aprovasaun iha faze jeneralidade maibé la konsege tama ba faze espesialidade tanba parlamentu hakarak fó uluk prioridade ba lei veteranu sira-nian, nune’e halo lei ne’e hetan kaduka to’o agora.

“Tanba ne’e, agora depende fila-fali ba Parlamentu ka Governu iha inisiativa bele submete fila-fali hodi halo diskusaun,” Joaquim dos Santos ‘Boraluli’ hateten ba Agência Tatoli iha ámbitu komemorasaun Loron Nasionál Juventude no Masakre 12 Novembru ba dala-XXX, iha Parlamentu Nasionál, tersa ne’e.

Tanba ne’e, nia husu Parlamentu Nasionál liuhosi bankada parlamentár no Governu tutela ne’ebé iha interese bele inisia fila-fali.

Dezde uluk, nia dehan, Parlamentu Nasionál konsidera lei reparasaun ba vítima ne’e importante maibé to’o agora komisaun A iha prosesu diskusaun sira seidauk iha inisiativa ruma, nune’e komisaun hein de’it bainhira inisiativa mai sei tau prioridade atu diskute no aprova hodi haruka ba plenária Parlamentu atu deside.

“Proposta lei ne’e uluk hosi Governu, nune’e agora bele mai ko’alia ho lejisladór sira hodi re-poin fila-fali sai ba norma ida atu implementa hodi fó garantia ba vítima sira-nia direitu,” nia dehan.

Importante tebes lei reparasaun vítima hodi bele regula fó rekuñesiemtuu ba timor-oan ne’ebé partisipa luta ba libertasauun nasionál no sai vítima iha funu laran.

Joaquim dos Santos hateten, loloos lei reparasaun ba vítima tama iha kategória prioridade ba Estadu maibé iha momentu ne’ebá deputadu sira la konsege iha konsesu no iha konseitu vítima, tanba iha kondisaun rua vítima ida militár Indonézia mak halo no vítima ida hosi rezisténsia mak prodús asaun hasoru, tan ne’e presiza define.

Xefe Bankada CNRT, Duarte Nunes, fó hanoin ba Governu liuhosi ministéiru tutela mak tenke hola inisiativa atu haree fila-fali proposta lei-ne’e sei relevante ka lae, karik iha artigu ruma presiza hadi’a nune’e bele propoin mai Parlamentu Nasionál ka hato’o mai deputadu hodi halo projetu lei, nune’e bele kontinua diskute.

1. Definisaun Reparasaun

Durante períodu ne’ebé hala’o ninia servisu, CAVR define reparasaun nu’udar medida atu hadi’ak fali estragu ne’ebé vítima sira hetan kona-ba abuzu direitu umanu inkluindu  reabilitasaun,  restituisaun, kompensasaun,  rekoñesimentu kona-ba akontesimentu loloos ne’ebé mosu.

CAVR tau reparassaun iha direitu umanu nia kuadru de servisu ne’ebé inklui mós komponente  esensiál tolu (3) ne’ebé labele troka malu mak lia-loos, justisa, no reparasaun. Forma balun kona-ba reparasaun mak hanesan; kompensasaun ne’ebé inklui katak fó konpensasaun ne’ebé loloos liuhosi rezolve tuir lei ka mediasaun, restituisaun signifika hatur fali-tuir bele-kona-ba situasaun ne’ebé uluk benefisiariu ne’e iha molok violasaun mosu ba nia, reabilitasaun katak halo provizaun médiku no kuidadu psikolojiku no fó resposta signifikante ba ema ida-idak no komunidade nia nesesidade, restaurasaun ba dignidade ne’ebé inklui mós forma simbóliku hosi reparasaun, no garante atu la repete tan mak prevene atu violasaun direitu umanu sei la mosu tan.

2. Prinsipiu ne’ebé orientasaun nian ba programa reparasaun iha Timor-Leste

Prinsipiu sira tuir mai ne’e sei asisti atu dezenvolve programa reparasaun ida-ne’ebé efetivu ba vítima sira ne’ebée vulneravel liu kona-ba violasaun direitu umanu nian iha Timor-Leste mak hanesan:

a. Fizibilidade (Pratikalidade)

Timor-Leste hanesan nasaun foun ida iha faze inisiál dezenvolvimentu nian hasoru difikuldade barak. Atu iha fizibilidade iha kontestu ida-ne’e nia laran, programa reparasaun ida-ne’e tenke seletivu no haree liuliu kona-ba nesesidades ne’ebé urjente liu kona-ba sira ne’ebé vulneravel liu no, iha ne’ebé bele, fó resposta koletivu ne’ebé folin ladún makaas no kreativu.

b. Asesibilidade

Tenke tau matan didi’ak atu bele laran metin katak vítima sira ne’ebé oras ne’e hetan susar la’ó de’it tanba konsekuénsia maibé tanba sira-nia esperiénsia no mós tanba nia izolamentu, la hetan informasaun no meiu transporte, liuliu sira ne’ebé hela iha área rurál.

c. Hakbiit

Programa ida-ne’e tuir loos tenke hakbiit sira ne’ebé hetan terus tanba violasaun direitu umanu ne’ebé grave atu sira bele kontrola rasik sira-nia moris no kore-aan hosi limitasaun pratika no psikolojiku no vítima nia sentimentu emosionál. Bainhira fó tulun reabilitasaun no medida reparasaun seluk tan di’ak liu se uza dalan hakbesik atu hakbiit nian ida ne’ebé haree liuliu ba vítima sira no bazeadu ba komunidade.

d. Jéneru

Programa ne’e tenke hanoin kona-ba diferensa iha jender tanba konflitu iha Timor-Leste afeta ba mane no feto. Mane no feto sira la’ós liu de’it hosi eeperiésia oin-oin kona ba violasaun direitu umanu nian iha konflitu nia laran, maibé satan dalan oin-oin atu hakmaan impaktu kona-ba violénsia hirak ne’e. Mane barak liu mak sai nu’udar alvu vítima kona ba detensaun, tortura, oho no lori lakon. Maibe, bainhira feto sira sai vítima kona ba detensaun, tortura no violasaun seluk tan, sira terus makaas liu iha violasaun seksuál no sei hetan diskriminasaun nafatin hanesan v’itima.

Feto sira mós terus bainhira sira-nia laen, oan mane, aman, no membru seluk tan hosi sira-nia família hetan violasaun direitu umanus. Sira mak sai nu’udar responsavel atu tau matan ba sira-nia família, sai responsavel ba hirak ne’ebé moras no kanek, no servisu hodi fó han sira-nia oan no dependente seluk tan bainhira hirak ne’ebé tenke fó han família hirak ne’e mós ema lori ba dadur, lori lakon tiha, oho ka aleija tiha. Sira mós sai vulneravel makaas liután ba violénsia seksuál bainhira sira-nia “protetor” tradisionál família nian laiha. Pelumenus 50% hosi rekursu programa ida-ne’e nian tenke aloka ba iha feto benefisiária sira.

3. Métodu Reparasaun

Tenke dezenvolve métodu atu fó tulun programa reparasaun nian maibé tenke iha konsulta mós ho vítima sira no grupu víima nian no inklui buat sira tuir mai ne’e:

a. Apoiu ba inan sira0ne’ebé seidauk kaben no bolsa estudu ba sira-nia oan

Programa ida-ne’e sei fó tulun liuhosi bolsa estudu ba inan sira n’e’ebe seidauk kaben, inkluindu vítima hosi violénsia seksuál no faluk tanba funu sira-nia oan sira-ne’ebé sei ho idade atu ba eskola nian, to’o labarik hirak ne’e halo ona tinan 18. Pakote ida-ne’e mak hanesan fó tulun osan atu selu eskola no kustu sele-seluk tan no Governu nia ajénsia mak kaer administrasaun no ka ONG sira iha nivel distritu.

b. Apoiu ba invalidu sira, faluk sira, no sobrevivente hosi violénsia seksuál no tortura

Programa ne’e sei fó tulun sosiál ba faluk sira, ba sobrevivente hosi violénsia seksuál (ne’ebé laiha labarik ho tinan atu ba eskola nian), ba invalidu sira, no sobrevivente hosi tortura, inkluindu reabilitasaun, treinu kona-ba abilidade no asesu ba mikro-kréditu atu bele hala’o atividade iha moris loro-loron nian. Tulun hirak ne’e, Governu nia aj’ensia no ONG espesializadu sira no ONG sira ne’ebé komunidade nian mak hala’o.

c. Apoiu ba komunidade hirak ne’ebé afetadu makaas liu

Programa ne’e sei fó apoiu ba komunidade hirak ne’ebé hetan terus makaas, ne’ebé hamutuk halo proposta koletiva ida ba reparasaun. Tau mós iha proposta nia laran esplikasaun kona-ba oinsá komunidade ne’e hetan terus durante tempu konflitu no iha termu jerál, violénsia ne’ebé sira hasoru, projetu espesifiku ida atu bele hakmaan estragu ne’ebé hetan hosi terus, no lista ida kona-ba benefisiáriu hirak ne’ebé sei tama iha atividade ida-ne’e.

Ajénsia Governu nian hanesan ONG sira mós bele uza programa ida-ne’e hodi halo atividade mak hanesan halo kolokiu kona-ba kura no servisu seluk tan hodi restaura, inkluindu terapia kreativu no atividade sira mak hanesan teatru, arte vizual, múzika no reza. Balansu ba jéneru kona-ba benefisiáriu sira sai nu’udar kriteria atu hetan tulun.

4. Memorializasaun

Programa ne’e sei promove momorializasaun nasionál liuhosi konsulta ho vítima no mós parseiru seluk tan inkluindu Governu. Programa memorializasaun ne’e liuhosi dalan maibé la’ós limitadu ba, hahalok aat ne’ebé hetan diskrisaun iha relatóriu ida-ne’e, no inklui serimónia komemorasaun nian, data, monumentu, no inisiativa sira seluk atu fó honra no hanoin nafatin vítima hosi violasaun direitu umanu iha nivel komunidade lokál no nasionál.

Memorializasaun mós inklui atu dezenvolve materiál edukasaun nian kona-ba Timor-Leste nia luta istóriku hodi nune’e kaer metin direitu umanus, dezenvolve literatura populár, múzika no arte hodi fó hanoin, no hanesan rekomenda ona iha fatin seluk hosi relatóriu ida-ne’e–programa edukasaun ida atu promove kultura ida kona-ba rezolusaun lahó violénsia nian kona-ba konflitu.

Notísia Relevante: 2021, CNC luta ba asaun reparasaun ba vítima sira

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here