Diretór Ezekutivu Centro Nacional Chega, Hugo Maria Fernandes. Imajen Tatoli/Joanico de Araújo

DILI, 05 setembru 2020 (TATOLI)–Diretór Ezekutivu CNC, Hugo Maria Fernandes, hateten relatóriu CAVR “Cahega!” no CVA “Ad Memeoriam Ad Spem” nia rekomendasaun ne”e pontu importante ida mak aprende hosi ema-nia sofrementu sira durante tinan 24, nune’e rekomenda ba estadu atu halo polítika reparasaun.

Notisia Relavante: Governu implementa ona rekomendasaun “Chega!” 70%

“Relatóriu rua ne’e hanesan ita hotu hatene katak relatóriu CAVR ho naran Chega entrega ba Prezidente Repúblika Timor-Leste nian, Maun Boot Kay Rala Xanana Gusmão, iha tinan 2005 no ba tinan ne’e konklui ona ba tinan 15. Relatóriu CVA nian entrega ba Prezidente Repúblika Indonézia, Susilo Bambang Yudhoyono no Prezidente Repúblika Timor Leste, José Ramos Horta iha 2008 ne’e rekomenda ba estadu atu halo politika reparasaun,” Diretór Ezekutivu CNC, Hugo Maria Fernandes, ba Agência TATOLI iha nia knaar fatin Antigu Komarka, Balide, Dili, tersa (02 setembru 2020).

Diretór ezekutivu ne’e haktuir, relatóriu rua ne’e rekomenda ba Governu no Estadu atu halo polítika reparasaun, tanba polítika reparasaun mak sai loloos no sai aliserse ba polítika tomak ba estadu Timor-Leste no estadu Indonézia atu oinsa tulun vítima sira ba konflitu pasadu ne’e.

Kona-ba justisa forma, nia dehan, mandatu ne’ebe mak fó ba CNC tuir dekretu lei 48/2016 la atribui Kompeténsia atu ko’alia kona-ba justisa formál maibé ba CNC justisa retroativu katak justisa ne’ebé oinsa mak bele fó justisa sosiál.

“Tanba ne’e mak CNC foku liu ba reparasaun. Justisa formál ha’u hanoin laiha kompeténsia CNC nian. Entaun ha’u labele komentariu ba ida ne’e. Maibé Governu no sosiedade sivíl iha nia pozisaun no lider rasik. CNC hakarak bainhira ko’alia kona-ba justisa mak manan no lakon. Importante mak justisa ida sosiál katak ema tenke moris ho di’ak no dignu,” nia dehan. 

Aleinde ida-ne’e, nia dehan, harii monumentu sira-ne’e hanesan parte ida hosi reparasaun kolektiva nian no CNC rekoñse katak durante ne’e komunidade ho vítima sira maka foti inisiativa rasik harii monumentu no apoiu hosi Governu ne’e mínimu loos.

“Loos! Ida-ne’e maka ha’u hanoin ita hakarak ka lakohi ita rekoñese katak iha atrazu iha implementasaun rekomendasaun sira liu-liu rekomemdasaun kona-ba reparasaun nian. Reparasaun ne’e iha forma rua maka, individual no kolektiva,” nia dehan. 

Hugo hateten, haree monumentu no memoriál barak ne’ebé maka harii ne’e inisiativa hosi komunidade, vítima no hosi asosiasaun vítima sira maka halibur malu no apoiu uitoan hosi Governu.

Ezemplu, nia haktuir, iha 27 agostu CNC inaugura memoriál monumentu ida iha masakre Meti-Oan iha Welaluhu-Same ne’ebá ne’e, mai hosi família komunidade no ba Autoridade Lokál sira apoiu uitoan,

Nia hateten, masakre iha Muapitine (Lospalos), Craras (Viqueque) ne’e hotu komunidade mak durante ne’e foti inisiativa rasik.

Iha Lautém, nia dehan, hanesan iha Ipikuru ne’ebá mós inisiativa mai hosi Igreja harii monumentu ba masakre 1999 ba madre ho jornalista ida mate iha fatin refere. 

“Entaun ita hein katak ba oin Governu mak tenke iha proativamente apoiu inisiativa komunidade nian,” nia esplika.

Notisia Relevante: Komemora Masakre Setembru Negro oportunidade ba públiku dignifika vítima sira 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here