Profisionál saúde sira halo kampaña nasionál fase liman hodi prevene COVID-19 iha resintu HNGV. Imajen TATOLI/António Gonçalves

DILI, 03 novembru 2021 (TATOLI)—Parlamentu Nasionál, kuarta ne’e liu hosi plenária extraordinária aprova ka altera ona lei Sistema Saúde iha finál globál ho rezultadu votasaun a-favór 57, kontra no abstensaun 0.

Notísia Relevante: PN altera Lei Sistema Saúde iha jeneralidade

“Alterasaun lei Sistema Saúde aprovadu iha finál globál. Nune’e, agradese ba deputadu no deputada sira hotu nia kontribuisaun no Ministra Saúde nia prezensa,” Prezidente Parlamentu Nasionál, Deputadu, Aniceto Longuinhos Guterres Lopes, anusia liuhosi plenária parlamentár.

Prezidente Komisaun F trata asuntu Saúde, Noé da Silva Ximenes ‘Buka Tuir’, hateten ho aprovasaun ne’e Parlamentu Nasionál sei envia ba Prezidente Repúblika hodi halo promulgasaun tuir lei dentru loron 90.

Nia hatutan, ho aprovasaun alterasaun lei Sistema Saúde bainhira hetan duni ona promulgasaun mak fulan-fulan la presiza tán estensaun estadu emerjénsia.

Proposta-lei númeru 20/V(2a)- primeira alterasaun lei númeru 10/2004, 24 novembru nian kona-ba Lei Sistema Saúde.

Iha inisiativa lejislativa halo de’it iha alterasaun aumenta liafuan balun iha preámbulu no artigu 10 ho 11.

Notísia Relevante: Komisaun F halo audiénsia ho MS kona-ba proposta-lei sistema saúde

“Alterasaun ne’e hadia iha preámbulu aumenta tan de’it pandemia no artigu 10  tanba iha lei anteriór la prevee iha situasaun COVID-19 bainhira halo estensaun limite ema-nia sirkulasaun automatikamente liuhosi deklarasaun estadu emerjénsia, tanba ne’e tenke halo alterasaun. No artigu 11 presiza halo alterasaun tanba tau medida exesionál ne’ebé mak aplika iha ita-nia rain,” nia esplika.

Nia hateten, kompletamente Lei Sitema Saúde ne’e hamutuk iha artigu 100-resin.

Antes ne’e Ministra Saúde, Odete Maria Freitas Belo, hateten ho alterasaun ne’e autoridade kompetente sira iha matéria vijilánsia epedemilíjiku no sanitáriu atu uza mekanizmu protesaun ba saúde públika ho objetivu atu evita no neutraliza risku atu moras labele da’et ba populasaun.

“Iha mós dokumentu ida ka lei regulamentu sanitária internasionál, ne’ebé anexa iha lista moras ne’ebé kontrola, entaun ita uza mós lista iha alterasaun ne’e,” ministra ne’e hateten.

Governante ne’e esplika, entre medida protesaun ba saúde públika ne’ebé inklui iha diploma ne’e, sei iha mós posibilidade atu ema sé de’it  tenke halo ezame médiku no bainhira deskonfia moras ruma ne’ebé inklui mós iha lista ne’ebé prevee ona iha lei ka regulamentu administrativu, mak tenke lori ba internamentu tratamentu komplusivu ba fatin izolamentu ka kuarantena.

“Iha situasaun ne’ebé aat liu ka emerjénsia ruma ba saúde, bele fó orden atu halo konfinamentu obrigatóriu,” nia subliña.

Notísia Relevante: Governu Hakarak Altera Artigu Iha Lei Sistema Saúde Hodi Define Loloos Liberdade Sidadaun

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here