Ministra Saúde, Odete Maria Freitas Belo. Imajen Tatoli/Egas Cristovão

DILI, 20 jullu 2020 (TATOLI) – Haree ba kazu konfirmadu COVID-19 ne’ebé laiha ona no laiha tan estensaun Estadu Emerjénsia, maka Governu ensera ona Sala Situasaun Sentru Integradu Jestaun Krize (CIGC, sigla portugés), ne’ebé fó biban fali ba Ministériu Saúde (MS) atu implementa medida adekuadu.

Tanba ne’e, MS halo konsulta ho Prezidénsia Konsellu Ministru (PKM) hodi halo alterasaun iha artigu 11 Vijilánsia Sanitária, Lei númeru 10/2004 24 novembru, kona-ba Lei Sistema Saúde, hodi bele define loloos liberdade ba sidadaun.

Ministra Saúde, Odete Maria Freitas Belo, hateten iha artigu 11 Lei Sistema Saúde atu halo alterasaun tanba iha artigu ne’e mensiona katak MS iha direitu tomak atu halo internamentu ba sidadaun sira maibé la ko’alia espesífiku kona-ba atu haree mós liberdade ba sidadaun.

“Ha’u mai reuniaun ho Ministru Prezidénsia Konsellu Ministru, ligasaun ho prevensaun COVID-19 nian, tanba ita hatene katak Sala Situasaun ramata ona no kompeténsia ne’e entrega ona ba Ministériu Saúde, inklui servisu tékniku sira ne’ebé durante ne’e iha Ministériu Saúde kontinua hala’o. Ami diskute kona-ba baze legál sira, tanba iha parte ida ita hakarak atu halo restrinje ema-nia direitu maibé iha parte seluk mós presiza haree komunidade sira-nia direitu rasik. Entaun ida-ne’e sai hanesan kestaun ba ami,” relata Ministra Odete iha Palásiu Governu, segunda ne’e.

Daudaun ne’e, Governu kontinua tau importánsia ba saúde públika tanba iha Indonézia ne’ebé hanesan nasaun besik liu ho Timor-Leste, kontinua rejista kazu COVID-19.

“Haree katak ita-nia nasaun viziñu sei afetadu hela ho kazu COVID-19 no ema kontinua mate, entaun ami hakarak deskute fali Lei Sistema Saúde, karik iha posibilidade atubele haree lei ne’e bele destrinje ema maibé la limite mós ema-nia liberdade sira. Ami deskute hela atu halo alterasaun iha artigu 11 ne’ebé ko’alia kona-ba medida esesaun sira ne’ebé mak Ministériu Saúde bele halo, maibé parte seluk tenke haree mós ba povu nia liberdade,” nia argumenta.

Odete Belo subliña, diskusaun ba alterasaun ne’e durante semana rua ona no iha segunda ne’e sei haruka hikas ba iha PKM no submete ba reuniaun Konsellu Ministru hodi hetan aprovasaun.

Antes ne’e, ezekutivu sira liuhosi reuniaun Konsellu Ministru aprova projetu proposta alterasaun dahuluk ba Lei númeru 10/2004, 24 novembru nian kona-ba Lei Sistema Saúde.

Ho alterasaun ida-ne’e, autoridade kompetente sira iha matéria vijilánsia epidemiolójiku no sanitáriu atu uza mekanizmu protesaun ba saúde públika ho objetivu atu evita no neutraliza risku atu moras ne’e labele da’et ba populasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here