Ekipa Saneamentu raut hela fo’er iha Kapitál Dili, tersa (23/2/2021). Imajen Tatoli/Antonio Gonçalves.

DILI, 27 outubru 2021 (TATOLI)—Ministru Administrasaun Estatál (MAE), Miguel Pereira de Carvalho, informa sidadaun ka komunidade rihun 300-resin ne’ebé hela iha sidade Dili prodús lixu tonelada 220 kada loron.

Notísia Relevante: Governu prevee millaun $18 mellora jestaun lixu iha Dili

“Dili iha tempu agora nia kondisaun sosiu ekonomiku diferente tebetebes populasaun rihun 300-resin mak agora hela iha Díli, kompara ho tempu pasadu populasaun iha Díli oituan tebes. Ita rona beibeik katak iha tempu pasadu Dili ne’e planeadu atu ema bele iha abitasaun provolta rihun 60 maibé ohin loron ema barak tebes. Hosi ida-ne’e, ita haree kazu balun lixu ohin loron produzidu iha Díli laran tomak provolta 220 toneleda,” Miguel Pereira de Carvalho, hateten ba jornalista sira iha atividade sosializasaun lei baze ordenamentu territóriu iha salaun City8, Manleuana, tersa ne’e.

Hosi lixu tonelada 220 kada loron ne’e iha 55% lixu hodi ba lixeiru tibar, enkuantu 45% tama iha esgotu ho nune’e lixuu sira-ne’e tun ka tama hotu ba tasi laran.

Problema, nia dehan, tanba la organiza sidade Dili ne’e ho didi’ak, maibé ho lei baze ordenamentu territóriu ne’ebé aprovadu ona no mós ho regulamentu subsiliáriu agora bele fó ona dalan ba Autoridade Munisipál Dili hodi hamutuk ho ministériu relevante relevante sira, hanesan Ministériu Planu Ordenamentu no Ministériu Obras Públika atu bele hahú ordena sidade Dili.

“Ita hakarak atu sidade ne’e bem organizadu. Infelizmente ita haree ohin loron problema barak akontese iha Dili. Entaun ida-ne’e hanesan dezafiu ida ba Autoridade Munisipál Dili atu ordena filafali sidade, sira hamutuk ho autoridade relevante sira iha Governu sentrál,” nia esplika.

Notísia Relevante: Saneamentu rekoñese seidauk bele rezolve problema lixu iha Dili

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here