Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 03 fevereiru 2021 (TATOLI)Governu liuhosi Ministériu Administrasaun Estatál (MAE) prevee ona orsamentu milaun $18 hodi sosa ekipamentu ba melloramentu jestaun lixu iha kapitál Dili atu sai matak, moos no saudável.

“Projetu melloramentu jestaun lixu ne’e hodi halo sidade Dili bele sai di’ak, moos no matak liután. Tanba tuir planu tau kontentór lixu sira iha kada bairru atu ema sai husi nia uma labele liu metru 100 bele soe lixu, inklui karreta atu ra’ut lixu,” Ministru Administrasaun Estatál, Miguel Perreira de Carvalho, informa iha Palásiu Governu, kuarta ne’e.

Orsamentu ne’ebé prevee sei aterra mós lixu fatin iha Tibar tanba daudaun ne’e lixu butuk ona no halo ambiente la saudável.

“Ita atu lori rai taka atu nune’e dois no lalar barak inklui ahi-suar labele fó impaktu ba saúde públika,” nia akresenta.

Orsamentu ne’ebé iha, MAE liuhosi Prezidente Autoridade Dili uza mós atu selu operadór sira ne’ebé mak tula no halo tratamentu lixu iha Tibar.

Nune’e, daudaun Komisaun Nasionál Aprovizionamentu (CNA, sigla portugés) iha ona faze finál atu halo avaliasaun ba proposta téknika no finaseira hotu husi kompañia sira ne’ebé konkorre hodi sumbete ba Konsellu Administrativu Fundu Infraestutura atu deside.

Tuir dekretu-lei númeru 3/2016 kona-ba jestaun lixu, ne’ebe mak ko’alia kona-ba sistema jestaun lixu iha Timór laran liuliu ema soe lixu arbiru, tenke fó penalidade hahú husi $155 depende infrasaun.

“Ita durante ne’e lei la implementa ho rigorozu tanba fatin lixu mós seidauk barak, nune’e labele penaliza lai ema maibé tau tiha fatin lixu sira ho didi’ak hafoin ema soe arbiru bele fó penalidade,” nia hatutan.

Binan ne’e, Ministru Miguel husu ba sidadaun sira no loja na’in sira atu hametin konsénsia hodi soe lixu ba ninia fatin atu kontribui ba kapitál Dili sai matak, moos no saudável.

“Ha’u enkoraja populasaun sira bainhira projetu ne’e hahú tau ona kontentór lixu iha dalan ninin sira, ema hotu tenke iha konsiénsia no soe fo’er karik tau iha laran,” nia tenik.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here