Ekipa Saneamentu ra’ut hela fo’er iha kapitál Dili, 23/2/2021.Imajen Tatoli/Antonio Gonçalves

DILI, 06 jullu 2021 (TATOLI)-Lixu iha kapitál Dili sai ona fenómena la saudavel iha abitante-sira nia futar matan no inus. Nune’e, Governu liuhosi Departamentu Saneamentu Munisípiu Dili halo esforsu nafatin atu rezolve situasaun ne’e. Maibé, esforsu ne’ebé autoridade sira halo kontinua hetan sasidik tanba volume lixu iha Dili laran loron ba loron barak ba beibeik.

lixu iha Tasi Tolu, Dili. Imajen/Dok

“Ha’u atu informa de’it katak ko’alia kona-bá lixu iha sidade Dili laran, Governu aluga karreta ra’ut fo’er, maibé lixu kontinua nakonu iha kapitál Dili. Ami rekoñese tanba situasaun agora daudaun ne’e la hanesan ho tinan kotuk ne’ebé fó livre ema hotu bele lori lixu ba Tibar, maibé agora situasaun serka sanitária, ema hotu labele halo movimentu sai hosi Dili entaun ida ne’e fó impaktu boot ba ema atu lori ba fakar lixu iha Tibar, tanba  ne’e sira lori fila ba fakar fali iha estrada ibun sira,” Xefe Departamentu Saneamentu Munisípiu Dili, Domingos Soriano hateten ba Agência Tatoli iha nia servisu fatin, Dili, tersa ne’e.

Ba situasaun volume lixu kontinua nakonu iha kapitál Dili, maka iha fulan kotuk,  ekipa Saneamentu hasai ona sekulár ida ba loja hotu-hotu inklui otél sira iha Dili laran, katak lixu ne’ebé sira prodús, sira rasik tenke lori ba soe iha Tibar. Maibé realidade ho situasaun ne’ebé iha parte seguransa iha Fronteira Dili entre ho Munisípiu Liquiça iha Tasi-Tolu sira la fó ema ho karreta privadu sira atu lori lixu ba iha Tibar, tanba ne’e e halo volume lixu iha Dili aumenta barak.

Nia hateten, ekipa Saneamentu kontinua ra’ut fo’er, maibé estrada públiku lixu kontinua iha nafatin tanba servisu ne’ebé ekipa Saneamentu halo servisu ho manual ne’ebé iha fatin ida ra’ut ho neineik entaun la hotu hela de’it.

Tuir oráriu katak ekipa Saneamentu ra’ut fo’er  hahú hosi tuku 6:00 dadersán to’o ramata no loron ida karreta ida ra’ut dala-tolu, maibé liu tuku 09:00 dadeer de’it, lixu komesa namkari fali ona iha sikun-sikun sira iha Dili laran.

Tuir nia, ne’e hatudu komunidade mós presiza iha konsiénsia atu soe lixu tenke tuir nia oras. Katak iha tuku 19:00 kalan, maka ba soe iha fatin lixu atu tuku 06:00 dadeer, ekipa Saneamentu bele foti. Nune’e, minimiza lixu namkari arbiru iha Dili laran.

Ekipa Saneamentu Dili kontinua rekolla lixu iha dalan públiku sira. Imajen TATOLI/Joanico de Araújo.

Funsionáriu permanente ba Saneamentu hamutuk 218 ne’ebé liga ba saláriu antes ne’e sira simu $115, maibé agora hasa’e ba $150.

Karreta ne’ebé durante ne’e halo operasaun ra’ut fo’er iha kapitál Dili hamutuk 49, mak fahe fali ba Postu Administrativu sira hanesan, Don Aleixo karreta hamutuk 23 ne’ebé kompañia Loris ho karreta 11 no kompañia Felibra ho karreta 12 maka responsabiliza foti fo’er sira lori ba soe iha Tibar.

Vera Crus karreta sia (9) hosi kompañia Jagrilo, Nain-Feto, karreta sanulu kompañia Labelay mak kaer, Cristo Rei karreta hitu hosi kompañia Abolala.

Jornalista : Arminda Fonseca

Editór       : Francisco Simões

HAKEREK NO HATÁN

Please enter your comment!
Please enter your name here