IGE normaliza estrada iha Beduku hafoin inundasaun iha domingu (04/04). Imajen TATOLI/António Gonçalves

DILI, 21 outubru 2021 (TATOLI)–Institutu Jestaun Ekipamentu, Institutu Públiku  (IGE, I.P, sigla portugés), desde tinan 2018 to’o 2021 simu pedidu hosi komunidade no autoridade lokál hamutuk 411 hodi loke estrada iha área rurál.

“Hosi totál ne’e, ita apoia ona 183 ho volume serbisu  kilómetru 606.747 no pedidu 228 seluk seidauk apoia tanba limitasaun mákina pezadu, maibé sei esforsu atubele apoia iha tempu oin mai,” Prezidente IGE, I.P, Ermenegilda da Costa Laurentina, hateten, hafoin relata progresu serbisu ba Primeiru-Ministru, Taur Matan Ruak, iha Palásiu Governu, kinta ne’e.

Notísia relevante: IGE halo ona intervesaun normaliza fatin 19 iha Dili

Dezafiu ne’ebé durante ne’e IGE hasoru mak kondisaun mákina pezadu limitadu atu atende pedidu hosi komunidade no autoridade lokál, ho karreta lijeiru, fuzu no truck sira hamutuk unidade 182, ne’ebé unidade 139 ho kondisaun di’ak no daudaun halo hela serbisu, enkuantu unidade 23 seluk iha prosesu manutensaun no unidade 20 mak a’at.

“Dezafiu ne’ebé ami hasoru iha terrenu mak mákina pezadu limitadu , entaun dala ruma serbisu tuir loloos bele finaliza iha semana rua de’it, maibé bele to’o semana tolu tanba kondisaun mákina, prokupasaun seluk maka dala ruma komunidade husu apoiu iha situasaun emerjénsia maibé hafoin ami to’o fatin, laiha espasu no mákina tama ladi’ak,” nia akresenta.

Kona-ba preokupasaun sira, tinan oin prevee orsamentu millaun $2 hodi sosa mákina pezadu foun hamutuk unidade 15 hodi  apoiu serbisu, ne’ebé prosesu iha ona Komisaun Nasionál Aprovizionamentu (CNA, sigla portugés) no tempu badak sei finaliza hodi sosa.

Ba tinan oin prevee ona osan iha kapitál menór atubele sosa tan mákina pezadu foun.

Halibur reseita $90.000-resin

IGE, I.P aleinde ajuda komunidade loke dalan, buka mós osan hodi hatama ba kofre Estadu, ne’ebé hahú fulan-janeiru to’o 30 setembru 2021, institutu ne’e halibur ona reseita hamutuk $90.000-resin.

“Ami hatama reseita Estadu liuhosi fó aluga mákina ba empreza privadu, maibé la’os funsionáriu IGE mak simu osan, maibé empreza halo pedidu mai konsellu administrasaun hodi aprova, hafoin empreza ba selu diretamente iha banku hodi bele autoriza mákina halo serbisu,” Prezidente IGE, I.P informa.

Enkuantu, ekipamentu sira ne’ebé fó aluga ninia presu la hanesan, hanesan eskavadór fó aluga kada loron ho presu hosi $200 to’o $300.

Ekipamentu destaka iha munisípiu

Prezidente IGE, I.P, Ermenegilda da Costa Laurentina, hateten daudaun ne’e ekipamentu no funsionáriu institutu destakadu iha munisípiu sira.

“Ekipa IGE destaka iha munisipiu hanesan Ainaro, Liquiçá, Bobonaro, Lautém, Baucau, Viqueque no Manatuto (kobre fatin tolu, Laclo, Natarboa no Laclubar), Manufahi, iha Dili mak Metinaro, Ataúro retira tanba sei halo manutensaun ba mákina,” Ermenegilda da Costa dehan.

Durante hasoru malu, Xefe Governu, apresia serbisu institutu no husu atu presta serbisu di’ak liután ba povu, liuliu ba iha área rurál, ba dalan sira ne’ebé seidauk loke hodi tau ba planu, nune’e tinan oin bele kontinua loke estrada ba área rurál ne’ebé maka to’o agora seidauk asesu ba estrada.

Serbisu IGE, I.P iha rua hanesan apoiu komunidade no hatama reseita ba kofre Estadu.

“Entaun iha asuntu serbisu apoia komunidade, ami halo normalizasaun mota, loke estrada foun, no aterru estrada foun ba komunidade baibain, relijiozu, interministeriál no universidade,” nia tenik.

Prosesu loke dalan ba komunidade iha rua, kompostu hosi normál, ne’ebé bazeia ba pedidu hosi autoridade lokál no enkamiña mai IGE, hafoin hetan autorizasaun maka enjiñeru sira tun ba terrenu hodi foti dadus.

“Entidade sira bele aprezenta hodi ami hatene katak iha fatin ne’ebé mensiona presiza mákina hira, tipu mákina oinsá, no durasaun serbisu, nune’e ami prepara ekipa no akomodasaun molok tun ba terrenu.

Governu deside kria IGE iha tinan 2005 hanesan institutu públiku ho autonomia administrativa, finanseira no patrimóniu própriu ne’ebé responsável ba boa jestaun no esplorasaun ba bens iha ámbitu prosekusaun dezenvolvimentu infraestrutura no nesesidade ba serbisu administrasaun públika.

Daudaun, IGE iha faze transforma ba empreza públika, atubele halo atendimentu ba sidadaun ho efisiénsia no efikásia no iha tempu hanesan bele rekolla reseita ba kofree Estadu.

Notísia relevante: MOP hahú prepara ezbosu lei transforma IGE ba empreza públika

IGE iha ona esperiénsia kona-ba poupansa orsamentu no rekolla reseita, tanba iha tinan 2020 konsege poupa osan Estadu millaun $4, ho intervensaun direta ba terrenu hodi rezolve infraestrutura públika ne’ebé hetan estragu tanba dezastre naturál.

Iha tinan 2020 institutu konsege rekolla reseita $160.000, maibé hosi tinan  2019 to’o 2020 rekolla reseita millaun $2, hosi kompañia privada ne’ebé aluga mákina pezadu hodi hala’o serbisu iha terrenu, ne’ebé kompañia selu direta iha Banku.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here