IGE normaliza estrada iha Manleuana. Imajen/IGE

DILI, 13 abríl 2021 (TATOLI)–Prezidente Institutu Jestaun Ekipamentu (IGE, sigla portugés), Ermenegilda da Costa Laurentina, hateten institutu konsege halo ona normalizasaun ba fatin estragu tanba inundasaun hamutuk 19 iha Dili laran no sei kontinua iha fatin seluk.

“IGE ninian intervensaun iha Dili laran kuaze lokál 30, ne’ebé 19 finaliza ona enkuantu fatin seluk sei kontinua,” Prezidente IGE dehan iha ninia knaar fatin, Colmera, tersa ohin.

Fatin ne’ebé IGE normaliza ona mak hanesan mota iha Manleuana, Maloa, hamoos rai-ten iha kuluhun, Maskareñas, Bairro Pité, Bidau, suru rai no fatuk iha Kamea, Kampu Alor, Becora, Comoro no fatin seluk tan.

Maski nune’e, Ermenegilda rekoñese ekipamentu ne’ebé maka destaka iha Dili la sufisiente, tanba balun destaka ona ba munisípiu, enkuantu hafoin dezastre naturál halo fatin barak iha kapitál Dili mak presiza intervensaun tanba liga ho movimentu públiku.

IGE halo esforsu kontinua servisu, hahú hosi domingu (04/04) hafoin inudasaun to’o ohin loron no sei kontinua nafatin.

“Ami husu ba komunidade sira, maski ami-nia ekipamentu la sufisiente maibé nafatin fó konfiansa mai ami, labele laran susar mai ami hodi halo servisu. Agora ami sei kontinua servisu hodi rezolve fatin afetadu inundasaun,” nia akresenta.

IGE iha papél normaliza mota, aterru estrada, loke estrada foun, no seluk tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here