Loron Mundiál Ai-han iha loron 16 outubru. Imajen/Espesiál

DILI, 16 outubru 2021 (TATOLI)—Relasiona ho Loron Mundiál Ai-han ne’ebé kada tinan sempre selebra iha loron 16 outubru, Programa Ai-han Mundiál (WFP, sigla inglés) konvida komunidade timor-oan atu harii reziliénsia ai-han ba mudansa klimátika, tanba daudaun ne’e nasaun barak mak enfrenta krize hamlaha maka’as.

Tuir Diretór Ezekutivu WFP, David Beasley, presiza iha asaun urjente hasoru mudansa klimátika ne’ebé afeta mundu tomak, tanba mudansa ne’e iha posibilidade ba estraga umanidade.

“Mundu seidauk preparadu atu hasoru problema hamlaha maka’as ne’ebé ita seidauk enfrenta antes ne’e, tanba ne’e se ita la investe iha programa ajuda ema vulnerável sira atu adapta no harii reziliénsia ba mudansa klimátika maka bele hetan impaktu maka’as, tanba maioria feto ho kondisaun vulnerável, ne’ebé depende ba agrikultura, peska no hakiak animál, ladún kontribui maka’as ba mudansa klimátika, maibé sira mak afeta maka’as,” Diretór Ezekutivu WFP hateten liuhosi nota ne’ebé Agência TATOLI asesu, sábadu ne’e.

Tema ba loron mundial ai-han tinan ne’e maka ‘Ita-nia asaun mak ita-nia futuru ba produsaun di’ak, nutrisaun di’ak, ambiente di’ak, no moris ida di’ak’.

Aleinde ne’e, nia nota katak inundasaun ne’ebé akontese iha fulan-abríl liubá fó impaktu ba natureza no klima, akompaña ho situasaun COVID-19 ne’ebé Timor-Leste hanesan nasaun ne’ebé populasaun enfrenta hela problema inseguransa ai-han ho 36%, hatudu katak uma-kain 15% to’o 37% de’it mak bele asesu ba ai-han nutritivu.

“Atu responde ba kestaun hirak ne’e, iha fulan-jullu, Governu Timor-Leste lansa ona Planu Asaun Nasionál Konsolidadu ba Nutrisaun no Seguransa Ai-han (ODS2 CNAP-NFS) ne’ebé fó prioridade ba impaktu sira liuhosi intervensaun hodi redús problema má-nutrisaun no inseguransa ai-han, hodi atinje meta Objetivu Dezenvolvimentu Sustentável (ODS),” nia akresenta.

Notísia relevante: MS lansa planu asaun nasionál konsolidada ba seguransa ai-han

Iha setembru 2015, nasaun membru Organizasaun Nasaun Unida (ONU) hamutuk 193 sai signatáriu ba ajenda ODS, ne’ebé hosi konkordánsia estabelese alvu 169 hosi objetivu 17 nia laran, ne’ebé nu’udar baze ne’ebé luan ba objetivu, bainhira nasaun ida kumpre objetivu 17 ne’e maka bele halakon situasaun kiak, fó saúde di’ak, edukasaun di’ak, no fó empregu, igualdade, pás, inklui garante ba planeta ho ninia sistema naturál hotu, katak la hetan tan estragu no abuzu.

Nune’e, ODS númeru 2, mensiona kompromisu ida katak sei hakotu hamlaha, hadi’a má-nutrisaun, hadi’a seguransa ai-han no iha agrikultura ne’ebé sustentável to’o tinan 2030.

Tanba ne’e, parseiru dezenvolvimentu hanesan WFP iha kompromisu hodi kontinua tulun Governu Timor-Leste, iha ninia intervensaun hodi fó asisténsia téknika liuhosi programa Cesta Bázika, jestaun korrente fornesimentu, responde emerjénsia, merenda eskolár, análiza seguransa ai-han, ai-han fortifikasaun no diálogu sistema ai-han. 

“WFP apela ba líder mundiál atu rekoñese ligasaun entre hamlaha no krize mudansa klimátika, nune’e enkoraja sira atu halo esforsu maka’as liután hodi responde ba problema mudansa klimátika ne’ebé sai prioridade ba 26th Conference of the Parties (COP26),” Diretór Ezekutivu subliña.

WFP observa Timor-Leste fasil sofre impaktu mudansa klimátika

Iha sorin seluk, Reprezentante WFP iha Timor-Leste, Dageng Liu, konsidera Timor-Leste hanesan nasaun ne’ebé sei iha prosesu dezenvolvimentu nia-laran, fasil tebes atu sofre ba impaktu hosi mudansa klimátika, temperatura globál no temperatura a’as iha oseanu.

“Ita presiza serbisu hamutuk hodi transforma sistema ai-han ho maneira prodús no konsumu ai-han, sein estraga ita-nia planeta no rekursu sira,” Dageng Liu fó hanoin.

Iha selebrasaun Loron Mundiál Ai-han, WFP tulun Governu Timor-Leste, liuhosi Konsellu Nasional Seguransa Ai-han no Nutrisaun Timor Leste (KONSSANTIL) hodi organiza prémiu nutrisaun no halo demonstrasaun tein, inklui organiza diálogu no sensibilizasaun públika kona-ba polítika alimentasaun no nutrisaun.   

Notísia relevante: FAO kolabora ho MAP fó asisténsia ema vunerável seguransa ai-han

“Programa Ai-han Mundiál hosi Nasaun Unida hetan Prémiu Nobel da Pás iha tinan 2020, tanba ami mak hanesan organizasaun umanitáriu boot liu iha mundu, ne’ebé konsege salva moris iha situasaun emerjénsia no harii prosperidade no suporta futuru sustentável ba ema hirak ne’ebé rekupera hosi konflitu, dezastre no impaktu hosi mudansa klimátika,” Reprezentante WFP subliña.

Tuir dadus hosi WFP No Ministériu Saúde, populasaun 400.000 hosi pupulasaun millaun 1,3 (sensus 2015) iha territóriu Timór ka 36% mak enfrenta inseguransa ai-han grave, enkuantu iha nível rejionál, iha Ázia 28% no Sudeste Aziátiku 19%

Maski Timor-Leste iha rai bokur no buras, iha mina, kafé, inklui riku-soin oioin, maibé má-nutrisaun sei a’as nafatin mundu.

Iha tinan 2018, Banku Mundiál fó sai dadus, populasaun Timor-Leste 30% mak moris ki’ak, ho rendimentu $1,90 kada loron.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here