Serimónia lansamentu ba Planu Asaun Nasionál Konsolidada ba Seguransa Ai-han no Nutrisaun (CNAP-FSN) no Abertura Workshop Konsultativu ho Setore Relevante sira kona-bá Kontribuisaun Timor-Leste ba Planu Asaun Globál (GAP) ba Prevensaun Labarik-Krekas ka Wasting, iha salaun Palásiu das Sinzas, Caicoli (05/07/21). Imajen/Média MS.

DILI, 05 jullu 2021 (TATOLI)—Vise-ministru Saúde, Bonifácio Mau Coli dos Reis, hala’o lansamentu ba Planu Asaun Nasionál Konsolidada ba Seguransa Ai-han no Nutrisaun (CNAP-FSN) no Abertura Workshop Konsultativu ho Setore Relevante sira kona-bá Kontribuisaun Timor-Leste ba Planu Asaun Globál (GAP) ba Prevensaun Labarik-Krekas ka Wasting.

Lansamentu ne’e hala’o iha, iha salaun Palásiu das Sinzas, Caicoli, ho objetivu atu halo planu asaun anuál kona-bá seguransa ai-han no nutrisaun liga ba planu reteiru ba prevensaun labarik-krekas ho idade menus hosi tinan-lima.

Notísia relevante:MS-USAID lansa atividade sustentabilidade sistema saúde iha TL

Alende ne’e, fó mós oportunidade ba reprezentante hosi linña ministeriál no parseiru-sira atu fó sira-nia ideia kona-bá saida mak Timor-Leste (TL) bele kontribui ba iha planu asaun refere.

“Workshop ne’e nu’udár oportunidade ba ita hotu-hotu atu partilla informasaun kona-bá TL-nia kontribuisaun ba Planu Asaun Globál ba Prevensaun labarik-krekas no rona ilustre partisipante sira-nia hanoin kona-bá planu ka roteiru kompreensivu nasionál ba prevensaun ne’e,” Vise-ministru Saúde, Bonifácio Mau Coli dos Reis, hateten iha diskursu.

Tanba ne’e, ho workshop ba konsultasaun ho setór relevante-sira atu diskute no fó hanoin kona-bá oinsá Ministériu Saúde bele elabora Planu Estratéjiku Nasionál no Roteiru ba Prevensaun Labarik-Krekas ida-ne’ebé kompreensivu, hodi akomoda parte relevante hotu-hotu nia perspetiva no MS liuhosi departamentu nutrisaun, hamutuk ho parseiru dezenvolvimentu-sira elabora Planu Estratéjiku Nasionál Setór Nutrisaun ba tinan 2021–2025, nu’udár guia polítika ba implementaaun programa nutrisaun nian maibé ba loron ohin nian ita aborda liu ba planu estrtatéjiku nasional ne’ebé konsentra liu ba no prevensaun ba labarik-krekas.

Bazeia mós ba dadus hosi Organizasaun Mundiál Saúde (OMS) tinan 2020, relata katak, estimativa millaun 149 labarik menus hosi idade lima maka rakítiku katak, badak-liu kompara ho sira-nia idade loloos, millaun 45 mak krekas-liu.

Maizumenus 45% hosi mate, labarik menus hosi idade tinan lima relasiona ho malnutrisaun. Situasaun ne’e akontese barak liu ba iha nasaun-sira iha dezenvolvimentu ho rendimentu médiu ka baixu, inklui TL, malnutrisaun ka desnutrisaun, refere ba defisiénsia no esesu ka dezekilibriu ba nutriente no mikronutriente sira-ne’ebé sai nafatin problema saúde públika iha mundu tomak.

TL desde tinan 2004, estadu nutrisaun ba labarik no inan idade reprodutiva-sira mellora oitoan ona maibé indikadór ba taxa prevalénsia hatudu sei aas nafatin, evidénsia bazeia ba dadus hosi peskiza ai-han no nutrisaun TL iha tinan 2020 relata katak, maiória hosi labarik-sira lamoris tuir kresimentu ideál no númeru ba ema-sira afetadu diretamente hosi malnutrisaun maka boot tebes ho 47.1% labarik menus hosi tinan lima mai karaik, klasifikadu nu’udár rakítiku.

Signifika, kuaze labarik ida entre na’in-rua mak sofre rakítiku iha TL. Dadus mós hatudu katak, labarik-sira ho idade menus tinan-lima ne’ebé krekas-maran (todan kompara ho sira-nia aas) maka 8.6% no prevalénsia ne’e hahú hosi idade fulan 6-11 (9%) no idade fulan 12 – 23 mak (9.8%).

Governante ne’e relembra katak, iha 01 abril 2016, Assembleia Jerál Nasaun Unida, deklara tinan 2016- 2025 nu’udár Dékada Nasaun Unida nian ba Asaun kona-bá nutrisaun.

Dékada ida-ne’ebé fó oportunidade atu aborda forma hotu-hotu ba malnutrisaun nian. Iha dékada ne’e maka estabelese kronograma konkretu ida ba implementasaun kompromisu sira-ne’ebé asumi iha Segunda Konferénsia Internasionál kona-ba Nutrisaun, hodi kumpre metas globais nutrisaun nian, hanesan mós meta relevante ba Ajenda Dezenvolvimentu sustentavel 2030.

Iha fatin hanesan, Koordenadór Apoiu Gabinete Sosiedade Sivíl,  Filipe da Costa, hateten iha diskusaun ida-ne’e hakarak tau hanoin hamutuk  asaun saida de’it mak  presiza halo atu nune’e   bele atinji metas ida katak, laiha tan labarik ida mak krekas, liuliu moris mai la bele todan menus.

Tuir dadus tinan 2020 problema labarik  Krekas (Wasting) iha TL tinan lima mai kraik hamutuk 8.6 % mak  kondisaun krekas nia prevalénsia ne’e to’o pontu ida aas liu maka labarik-sira idade fulan 6-11 (9.0%) no  kontinua aumenta too fulan  12-23 (9.8%).

Tuir dadus ne’e iha RAEOA, Bobonaro ho Dili  mak  hatudu númeru prevalénsia ne’ebé boot liu fali alta prevalénsia WHO nian (10-15%) ne’e  prevalénsia médiu mak 10%.

Númeru prevalénsia Labarik-Krekas iha Timor Leste iha diferensa oituan liu entre labarik ha área rurál (7.3%) no área urbana (8.9 %) labarik sira hosi inan ne’ebé la eskola, hatudu prevalénsia  aas liu oitoan 7.9%  kompara ho sira ne’ebé  inan hasai kursu ka eskola boot 6.9%.

Partisipa iha lansamentu ne’e Reprezentante Uniaun Europeia, Paulo Barduagni, First Secretary Australian Embassy, Troy Skalestrou, Reprezentante FAO, Oxfam no seluk tan.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here