Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, segunda (06/10). Imajen TATOLI/Francisco Sony

DILI, 06 outubru 2021 (TATOLI)Governu liuhosi reuniaun Konsellu Ministru (KM), iha kuarta ne’e aprova Projetu Proposta Lei Orsamentu Jerál Estadu (OJE) tinan 2022, ne’ebé aprezenta hosi Ministru Finansa, Rui Augusto Gomes.

“OJE tinan 2022 ho montante biliaun $1,675, kompostu hosi Orsamentu Administrasaun Sentrál, Orsamentu Rejiaun Administrativa Espesiál Oé-cusse Ambeno inklui Orsamentu Seguransa Sosiál nian,” Ministru Prezidénsia KM, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: Governu atualiza tetu agregadu no dezagregadu OJE 2022 biliaun $1,675

Alokasaun orsamentu 2022 tuir prioridade nasionál, a’as liu mak iha setór produtivu sira hanesan agrikultura no turizmu, ambiente no konektividade ho alokasaun 27%, tuir kedan ho abitasaun no inkluzaun sosiál 22%, boa governasaun 12%, dezenvolvimentu kapitál umanu 10%, dezenvolvimentu rurál 3% no dezenvolvimentu setór privadu 0,5%.

Aleinde ne’e, ba funsionamentu mákina Estadu hetan alokasaun 18% no atividade seluk 8%.

OJE biliaun $1,675 sei uza hodi finansia programa 43 iha perímetru OJE tinan 2022 liuhosi prioridade nasionál neen hanesan, dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu (agrikultura no turizmu), ambiente no konektividade, dezenvolvimentu setór privadu no kooperativa, dezenvolvimentu rurál, no boa governasaun, ho objetivu atu atinje dezenvolvimentu ida ne’ebé kualidade ho kresimentu ekonómiku ne’ebé inkluzivu no sustentável.

Alokasaun orsamentu aprovadu ba OJE 2022 tuir klasifikasaun ekonómiku a’as liu mak iha transférensia públika ho montante millaun $565,9, tuir kedan ho bens no servisu millaun $449,8, kapitál dezenvolvimentu ne’ebé bele kria postu traballu no jere empregu rai-laran hetan alokasaun millaun $401,7, saláriu no vensimentu millaun $233 no kapitál menór millaun $24,4.

Enkuantu, Governu sei aprezenta Proposta Projetu Lei (PPL) ba Parlamentu Nasionál (PN) ha loron 15 fulan-outubru 2021, no ho aprovasaun ne’e, ba oin Ministériu Finansa sei hahú prepara Livru I to’o Livru VI inklui dokumentu adisionál sira.

Antes ne’e, OJE 2021 ne’ebé Parlamentu Nasionál aprova no Prezidente Repúblika promulga hamutuk biliaun $1,895 kompostu hosi saláriu no vensimentu millaun $239,26, bens no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20, ne’ebé iha marsu 2021, Governu aprezenta proposta Orsamentu Retifikativu ho montante millaun $223, nune’e sai biliaun $2,1.

Notísia relevante: Ezekusaun OJE 2021 atinje millaun $872,3 reprezenta 43% 

Hosi montante orsamentu millaun $223 ne’e foti hosi Fundu Infraestrutura millaun $60 no restu halo ajustamentu ba orsamentu 2021 ne’ebé aprovadu no promulgadu.

OJE 2020 ho montante biliaun $1,497, fahe ba kategoria saláriu no vensimentu millaun $206,8, bens no servisu milliaun $496,7, transferénsia públika millaun $571,1, kapitál menór millaun $8,9, kapitál dezenvolvimentu millaun $213,4. 

Ho aprovasaun orsamentu 2020, Governu hakotu rejime duodesimál ne’ebé Governu hahú funsiona iha janeiru to’o outubru 2020 no orsamentu normál sei efetivu iha novembru no dezembru.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here