Médiku sira kontinua halo atendimentu ba komunidade ne’ebé hakarak hetan Vasina AstraZeneca no Sinovac iha Centru Saude Bairrru Formosa, Dili, kuarta (29/09/21). Imajen Tatoli/António Gonçalves.

COVALIMA, 14 outubru 2021 (Tatoli)—Diretòr Servisu Saúde Munisípiu Covalima, Filipe Pereira Lemos informa, taxa kobertura vasinasauun iha munisípiu Covalima atinje ona 79,1%.

Notísia Relevante: MOP enkoraja komunidade Camanasa partisipa másimu vasina kontra COVID-19

“Taxa kobertura vasinasaun iha Covalima, hosi postu administrativu hitu, ne’ebé vasina hahú hosi 14 abríl to’o 12 outubru, totál populasaun ne’ebé simu ona vasina doze dahuluk hamutuk na’in 31,837 (79,1%) no doze daruak hamutuk 20,610 (51,3%),” Diretór Filipe Pereira Lemos hateten ba Agência Tatoli, iha nia kna’ar fatin Camanasa, kinta ne’e. 

Iha postu administrativu Fatumea kobertura ba vasina doze dahuluk 97,1% no doze daruak  87%, Fatululik doze dahuluk  99.7% no doze daruak 79,1%, Tilomar doze dahuuluk 89,4% no doze daruak 63,3%, Fohorem doze dahuluk 83,1% no doze daruak 64,9%, Maucatar doze dahuluk 82,5% no doze daruak 52,3%, Suai Vila doze dahuluk 77,1% no ba doze daruak 46,6% no Zumalai kobertura vasina sei ki’ik ho doze dahuluk 65% no doze daruak 34,9%.

Atu hasa’e kobertura vasina, pesoál saúde sira halo koordenasaun ho parte hotu-hotu atu hodi akompaña membru Governu sira hosi nasionál hodi halo sensibilizasaun ba komunidade kona-ba vasina ne’ebé hala’o iha postu administrativu hitu refere.

Foin lalais ne’e, nia dehan, Ministru Obra Públika, Salvador Eugénio Soares dos Reis Pires,  responsabiliza hodi realiza sensibilizaun iha postu Suai Vila no Zumalai ,Vise-Ministru MEJD António Guterres responsabiliza iha postu Maucatar no Fohorem, Vise-Ministru Interiór responsabiliza halo sensibilizasaun iha Tilomar, Fatumea no  Fatululik. 

“Sensibilizasaun ba komunidade ne’e, ita-nia komunidade iha ona konfiansa atu simu vasina. Ho prezensa hosi Membru Governu sira iha signifikasaun ne’ebè boot, komunidade ne’ebé durante ne’e lakohi simu vasina ne’e hahú hakbesik an ba sentru vasinasaun no ita-nia kobertura aumenta makaas,” nia hateten. 

Daudaun ne’e, servisu saúde mós simu ona ekipamentuu hosi Vise-Ministru MEJD atu kontinua sensibiliza ba komunidade sira durante loron 10, nune’e bele atinje trajetu. 

Abitante ne’ebé simu ona vasina, Tarsizo Dewan, husu ba komunidade atu simu vasina nune’e hodi hasa’e imunidade no labele fiar ba informasaun falsu sira-ne’ebé espalla iha mídia sosiál katak simu vasina ne’e sei mate sedu no sei laiha oan.

“Ha’u vasina ona, maibè ha’u nia kondisaun  di’ak hanesan baibain. Ha’u husu ba inan-aman, kolega sira, bainhira ho idade 18 ba leten, di’akliu mak ita koopera ho pesoál saúde hodi hakbesik ba sentru vasinasaun atu simu vasina,” nia dehan.

Notísia Relevante: Abitante Covalima 70,9% simu ona vasina

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here