Ministru Obra Públika, Salvador Eugênio Soares dos Reis Pires, halo kampaña vasina iha suku Camanasa. Imajen/MOP

DILI, 30 setembru 2021 (TATOLI)—Ministru Obra Públika (MOP), Salvador Eugênio Soares dos Reis Pires, halo kampaña vasinasaun kontra COVID-19 ba komunidade suku Camanasa, postu administrativu Suai, munisípiu Covalima.

“Enkoraja atu komunidade partisipa másimu iha vasina, nune’e bele salva vida komunidade tanba iha nasaun barak maka afeta ona vírus a’at ida-ne’e no barak mak mate.  COVID-19 laiha aimoruk hodi kura, só úniku vasina mak bele proteje no salva-an hosi vírus a’at ne’e,” refere nota ne’ebé Agência TATOLI asesu, kinta ne’e.

Nune’e, Ministru Salvador husu ba komunidade ne’ebé daudaun seidauk vasina, atu labele fiar informasaun falsu ka Hoax ne’ebé espalla iha públiku no labele tauk vasina tanba laiha Governu ida mak hanoin a’at ba nia sidadaun sira.

Vasina hanesan meiu ida hasa’e imunidade, liuliu ba inan-aman sira ne’ebé idade ona inklui hirak ne’ebé moras komplikadu hodi, proteje-an hosi COVID-19.

Komunidade Camanasa partisipa másimu iha kampaña vasinasaun ne’e, hodi simu vasina AstraZenecaa doze daruak no balun hahú doze dahuluk.

Kampaña vasinasaun ne’e hanesan orientasaun polítika husi Primeiru Ministru (PM), Taur Matan Ruak, ba membru Governu tomak hodi destaka ba munisípiu ida-idak liuliu ba suku sira tanba iha munisípiu komunidade barak mak seidauk partisipa másimu iha vasinasaun.

Notísia relevante: PM orienta membru Governu hala’o kampaña vasinasaun iha territóriu nasionál

Iha loron 07 setembru, Timor-Leste simu tan vasina kontra COVID-19 ho doze totál 1.112.380 , ne’ebé fornese hosi sistema COVAX no hosi país amigu sira hanesan, Austrália, Xina, Japaun, Nova Zelándia no Portugal.

Maibé, hosi totál doze seidauk ezekuta vasina 15.000 no vasina barak maka programada atu to’o, inklui vasina Pfizer doze dahuluk ne’ebé atu vasina ba labarik ho idade entre tinan 12 to’o 17.

Timor-Leste atinje ona rezultadu di’ak hosi inokulasaun vasina doze dahuluk, ne’ebé to’o loron 21 setembru atinje ona 77,7% hosi populasaun munisípiu Dili no 57,6% hosi populasaun nasionál.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here