Médiku-sira prepara hela vasina AstraZeneca iha Sentru Saúde Comoro, (02/06/21). Imajen/António Gonçalves.

COVALIMA, 01 outubru 2021 (TATOLI)—Diretór Servisu Saúde Munisípiu Covalima, Filipe Pereira Lemos, informa abitante iha munisípiu Covalima 70,9% mak simu vasina AstraZeneca no Sinovac, no populasaun 610 mak simu ona doze dahuluk no doze daruak hamutuk 480.

Notísia Relevante: Abitante Covalima 62,9% simu ona vasina

“Iha Covalima, ita-nia kobertura iha setembru nia rohan ne’e, atinje ona 70,9% ne’e kobre hosi postu administrativu sira,” Filipe Pereira Lemos informa ba Ajensia Tatoli, iha Suku Laktos, Postu Administrativu Fohorem, sesta ne’e.

Hosi pursentu ne’e, abitante 96,2% iha Postu Administrativu Fatumea mak simuu ona vasina, Fatululik 93,5%, Tilomar 83,6 % , Fohorem  78,3% , Maucatar  73,1% , Suai Vila 67, 5% no  partisipasaun abitante  vasina ki’ik liu  mak iha Postu Administrativu Zumalai ho 55,8%.

Durante ne’e pesoal saúde sira uza meiu oioin hodi  realiza sensibilizaun hamutuk ho autoridade lokál atu transmite Informasaun ba iha abitante sira  atu simu vasina, no administradór mós  servisu hamutuk ho parte seguransa hodi halo pasa revista iha pontu entrada sira.

“Seguransa sira hala’o pasa revista, bainhira deteta abitante sira balun mak seiduak simu vasina, ita sei pasa iformasaun atu nia iha konxiénsi hodi simu vasina,” nia dehan.

Tuir trajetu hosi Ministériu Saúde, iha kada munisípiu abitante sira-ne’ebé simu vasina tenke atinje 80%, nune’e populasaun sira belé moris livre.

Durante ne’e, pesoál saúde sira halo esforsu makaas mak to’o iha fulan-setembru nia rohan ne’e, munisípiu Covalima atinji ona 70,9 % no hela 10% atu atinje 80%, nune’e nune’e abitante sira livre no transmisaun COVID-19 bele menus.

Informasaun falsu: simu vasina mate sedu

Entretantu Xefe Suku Dato Tolu, João Agustinho Resi, triste bainhira iha sidadaun balun influénsia no divulga informasaun falsu (Hoax) ba populasaun iha aldeia Natardik, Suku Dato Tolu, Postu Administrativu Fohorem, atu labele kontribui hodi simu vasina.

Autoridade lokál ne’e hateten, populasaun lakoi simu vasina tanba fiar informasaun falsu ne’ebé lansa hosi sidadaun balun katak bainhira simu vasina AstraZeneca no Sinovac sei laiha oan no sei mate sedu de’it

“Ema balun ladun koopera ho ami atu enkoraja komunidade simu vasina maibé influénsia no impede fali  komunidade atu labele vasina. Tanba ne’e mak iha aldeia Natardik ne’e, populasaun maiória hosi família ema-ne’ebé lansa informasaun falsu ne’e mak lakohi simu vasina,” João Agustinho Resi hato’o Informasaun ne’e bainhira simu vizita hosi Vise-Ministru Edukasaun Juventude no Desportu, António Guterres, iha Aldeia Natardik, sesta ne’e.

Nia dehan, vizita hosi Vise-Ministru ne’e ho objetivu atu hala’o kampaña nasionál kona-bá vasinasaun oinsá mak populasaun sira kontribui ho Governu hodi kombate COVID-19 iha Timor-Leste.

Maske iha ema balun ne’ebé influénsia populasaun atu labele simu vasina, maibé nu’udar autoridade lokál hamutuk ho pesoál saúde sira kontinua disemina informasaun kona-bá vasina ba populasaun sira iha terrenu.

Nia mos husu ba ministériu kompetente atu disemina Informasaun ba populasaun hosi nivel hotu-hotu atu koopera ho autoridade munisipál no autoridade lokál hodi kombate COVID-19 iha Timor-Leste.

Vise Ministru Edukasaun Juventude no Desportu, António Guterres, klarifika kona-bá asuntu ne’e no nia parte sei hato’o ba ministériu kompetente.

“Ha’u simu ona Informasaun, ha’u sei relata tuir prosedimentu ne’ebè iha,” nia dehan.

Suku Dato Tolu kompostu hosi aldeia Fatuk Kabuar Kraik no Fatuk Kabuar, maioria simu ona vasina no hela abitante sira iha aldeia Natardic mak seidauk simu vasina.

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here