Vise-Responsavel Kaixa Sadere, Alfredo Sebastião da Costa ‘Kairala’. Imajen Tatoli/Nelson Sousa.

BAUCAU, 14 outubru 2021 (TATOLI)—Kaixa Sadere hosi suku Ossouala, postu administrativu Vemasse, munisípiu Baucau, sesta ne’e entrega ona dokumentu rezisténsia no klandestina ba Arkivu no Muzeu Rezisténsia Timorense (AMRT) Institutu Públiku.

Notísia Relevante: Kaixa Soko entrega dokumentu karta mensajen hosi “DAITULA” ba AMRT

“Dokumentu ne’e hanesan istória ida ba Timor-Leste, labele tau de’it iha uma to’o tempu nia dodok entaun istória bele lakon. Nune’e, ho prezensa AMRT, ami entrega ba hodi prezerva tau ba istória. Nune’e, jerasaun foun sira-ne’e mai ne’e sei konta nafatin,” Vise-Responsavel Kaixa Sadere, Alfredo Sebastião da Costa ‘Kairala’, hateten ba Agência Tatoli iha Ossouala, Vemasse, Baucau.

Liuhosi servisu ARMT nian tun iha baze hodi rekolla dokumentu rezisténsia ne’e, importante tebes entaun prontu kolobora iha prosesu ne’e hodi entrega dokumentu no fó entrevista ba ekipa AMRT atu bele prezerva istória sira-ne’e.

Dokumentu hosi kaixa Sadere ne’e nian entrega ba AMRT mak hanesan guia de marsa, istória rezisténsia momentu rai liu hosi kaixa Sadere no karta rezisténsia ne’ebé hakerek hosi Falintil entrega kaixa no dokumentu seluk tán.

Dokumentu rezisténsia ne’e, durante iha tempu okupasaun Indonézia, membru kaixa Sadere subar ho responsavilidade no kuidadu mak dokumentuu sira-ne’e agora nia kondisaun di’ak nafatin.

Kaixa Sadere harii iha loron 24 novembru 1994 no responsavel masimu kaixa mak Sebastião Tiago da Costa ‘Mane Mesak’.

Hanaran kaixa Sadere tanba la’ós hetan diretamente ba ai-laran maibé mai hosi dirasaun ida ba dirasaun ida, no inisiativa harii kaixa Sadere lori hosi lider rezisténsia hodi kuda iha Ossauala hanesan saudozu David Alex ‘Daitula’, saudozu Kaikeri, Taringa, Udan, Adjuntu Alin Laek, Tenente Korenel Amiku daudaun iha instituisaun F-FDTL ho sira seluk tan.

“Envolvimentu rezisténsia nu’udar maun boot Daitula estabelese hela ho estafeta direta Taringa no Udan. Kaixa ne’e harii ho nia objetivu hanesan bee-matan no bee-lihun ida atu haki’ak ikan, no ikan mak Falintil,” nia dehan.

Nia hateten kaixa ne’e nia kontribuisaun iha prosesu luta mak bainhira Falintil hosi dirasaun sentru atu ba ponta leste, tenke liuhosi kaixa Sadere hodi, nune’e kaixa hanesan segredu ida bainhira iha karta ruma, hahán, tenke tau iha ne’e hafoin mak foti.

Involvimentu kaixa Sadere iha tempu funu nia laran hosi tinan 1994 mai to’o 1999, halo ligasaun ho rezisténsia hanesan Tenente Koronel Amiku, Komandante Manubela ne’ebé agora iha instituisaun F-FDTL no sira seluk tán.

Bainhira sira iha ona sentru atu subar besik tenke mai iha kaixa Sadere hodi lori hahan ho karta ka informasaun ruma, no halo servisu ruma iha vila laran karik iha intelijente balun iha vila laran militár sira halo atuasaun hasoru povu.

“Kaixa Sadere direitamente ba Falintil mak komadante saudozu David Alex ‘Daitula’, Ajduntu Alin Laek ho komandante seluk hanesan Manubela, Amiku ho soldadu sira hotu,” nia dehan.

Área operasaun kaixa Sadere hanesan momentu harii kaiaxa ne’e kompostu hosi suku Loilubu, Uatulari no Ossouala, postu administrativu Vemase, munisóipiu Baucau no suku sira seluk ne’ebé besik baliza hanesan Fatumaca (Gariuai), Bercoli no Venilale.

Mezmu iha momentu situasaun perigu tanba operasaun militár la’o makaas, maibé kaixa klandestina ne’e buka estratéjia oioin hodi halo servisu ligasaun ativu ho Falintil ba servisu sira-ne’ebé iha, hanesan Falintil sira hosi ai-laran atu mai vila tenke ko’alia hasoru militár karik hodi hateten ne’e família sira hosi fatin seluk hodi to’o iha ne’e.

“Exemplu hanesan ita atu lao ba ai-laran lori hahan ruma tenke bosok ho maneira tenke halo to’os ka natar ruma iha ne’ebá hodi ba fó han. Maibé ida ho objetivu hahan sira-ne’e atu lori ba ai-laran. Nune’e mós hanesan ita Falintil hosi ai-laran atu mai hasoru povu, ita halo planu hodi buka hetan ita,” nia hateten.

Maske hasoru persegisaun oioin maibé kaixa Sadere ne’e komunga prinsípiu iha luta mak  Timor-Leste mate ka moris tenke ukun rasik-an.

“Momentu ne’eba bainhira rezisténsia sira iha ai-laran no lideransa frente diplomátika  ita la hatene no bainhira Amu Papa João Paulo II mai visita Timor-Leste iha 12 outubru 1989, ida ne’e mak hanesan fanu primeiru demostrasaun iha Tasi-Tolu, loké ona ami nia fuan hanesan estudante sei iha ensinu pre-sekundáriu no sekundáriu bainhira akompaña fila-fali sente fuan moras. Nune’e, hosi ne’e ami iha kada suku hodi hamrik hamutuk iha grupu hodi buka dalan oinsá hetan dalan rezisténsia hodi hahú hala’o servisu klandestina nian ne’ebé la’ós fasil,” Alfredo Sebastião da Costa ‘Kairala’ afirma.

Enkuantu, membru kaixa Sadere hamutuk ema 70-resin, no membru ne’ebé moris hela 20-resin  no barak mak hetan ona rekuñesimentu hosi Estadu  ho grau 4-a7 no balun hetan 8-14.

Kaixa Sadere husu Governu hadia lei pensaun kombatente

Maibé, nia husu ba Governu liuhosi ministéiru relevante atu hadia lei pensaun ba kombatente libertasaun nasionál, tanba bainhira luta tinan tolu iha ai-laran la fasil tiru malu loro-loron maibé fó fali ho grau 4-a7 hetan de’it pensaun úniku, ida-ne’e halo ema laran moras uitoan.

Nia dehan, kombatente balun moris ho kondisaun susar iha tempu agora mezmu iha prosesu luta fó ona kontribuisaun.

“Hanesan grau ho 4-a7 simu de’it pensaun uniku hafoin ne’e laiha ona, nune’e karik bele Governu hadia lei fó subsídiu uitoan iha kada fulan,” nia dehan.

Aleinde ne’e, nia husu Parlamentu Nasionál (PN) tau ona ajenda atu aselera diskusaun ba lei pensaun vitalísia hodi halo revogasaun, tanba durante lei fó injustisa ba povu ki’ik no mós kombantente sira.

“Ukun na’in sira ka’er tiha ukun to’o tinan lima hetan pensaun vitalísia ne’ebé goja direitu hotu maibé kuitadu ami hanesan kombante no maluk sira seluk sei terus barak. Nune’e, husu Parlamentu Nasionál atu halo revizaun lala’is ba lei ne’e, la halakon totál maibé pelumenus tenke redús pensaun,” nia dehan.

Governu hakbesik dezenvolvimentu to’o área rurál

Alfredo Sebastião da Costa ‘Kairala’ husu Estadu liuhosi ukun-na’in sira-ne’ebé ka’er Governu atu lori dezenvolvimentu to’o ba área rurál sira, tanba povu barak mak sei moris iha terus nian laran mezmu Timor-Leste ukun an ona besik tinan 20.

“Hanesan ami iha Ossuola iha ne’e tinan 20 la asesu ba eletrisidade, estrada ladi’ak no susar asesu ba bee-mós, nune’e husu Governu atu tau atensaun hodi hakbesik dezenvolvimentu ba komunidade iha suku,” nia hateten.

Notísia Relevante: AMRT rekolla dokumentu rezisténsia hosi kaixa Oe-dolar

Jornalista: Nelson de Sousa

Editór     : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here