Saudozu David Alex Daitula. Imajen/Espesiál.

BAUCAU, 14 outubru 2021 (TATOLI)—Arkivu no Muzeu Rezisténsia Timorense (AMRT)  Institutu Públiku, rekolla ona dokumentu rezistensia klandestina iha prosesu luta libertasaun nasionál hosi kaixa Soko iha postu administrativu Vemasse, munisípiu Baucau.

Diretór Nasionál ba Arkivu Muzeolojia AMRT, Mateus Campos Pinto, hateten identifikasaun dokumentu me’e liuhosi prosesu rekoilla, tuir mai sei halo tratamentu ka hamos, kapilla no numerasaun, nune’e faze tuir mai fahe klasifika hafoin tama ba iha faze dijitalizasaun ka scan.

“Prosesu klasifikasaun dokumentu hanesan pre-inventáriu deskreve dadus, hatama baze dadus sei haree fali ida-ne’ebé la sensetivu hodi públiku sai, nune’e públiku bele asesu. Ida-ne’ebé sensitivu ne’e, sei asegura ketak. Iha ne’e, AMRT simu ona dokumentu rezisténsia balun hosi Kaixa klandestina Soko mak karta mensajen hosi saudozu David Alex “Daitula” nian,” Mateus Campos hateten ba Agência Tatoli iha Ossoula, Vemasse, Baucau, kuarta ne’e.

Tuir ajenda, iha 16 outubru sei realiza serimónia asinatura no ofisializa entrega dokumentu rezisténsia hosi responsavél kaixa Oe-Dolar, kaixa Unidade 21, kaixa Sadere, kaixa Fitun Mutin no kaixa Soko ba AMRT.

AMRT halibur dokumentu rezisténsia no istóriku ne’e, atu prezerva istória luta Timor-Leste nian iha tempu okupasaun Indonézia, nune’e sai hanesan memória pasada ida ba jerasaun foun sira atu hatene.

Domingas Gusmao Goulart. Imajen Tatoli/Nelson de Sousa.

Atu hatene kona-ba dokumentu resisténsia ne’ebé kaiza klandestina konserva hela ne’e, jornalista Agência Tatoli, Nelson de Sousa, dadalia ho saudozuu Jeronimo Soares nia espoza, Domingas Gusmão Goulart ‘Tanis’, nu’udar espoza hosi responsavel másimu kaixa SOKO, saudozu Jeronimo Soares ho naaran revolusionáriu “Jakarta”.

Nu’udar espoza hosi responsavel másimu Kaixa klandestina SOKO, saudou Jeronimo Soares “Jakarta”, bele haktuir uitoan kona-ba kaixa Soko nia involvimentu iha prosesu luta ba libertasaun nasionál?

Atu atu hatene istória saudozu mak hatene liu. Maibé, hanesan nia espoza ne’ebé durante ne’e akonpaña no hatene servisu kaixa nian mak rekolla ai-han hanesan foos, supermie, aimoruk, sigarru, roupa, sapatu, kilat musan hodi fornese ba Falintil sira iha ai-laran, hodi eziste halo funu hasoru invazor Indonézia.

Entaun, kaixa klandestina SOKO ne’e harii iha sá tinan?

Kaixa Soko estabelese hahú iha tinan 1994 ho ninia operasaun área jurizdisaun iha postu administrativu Vemase no iha mós sub-kaixa hosi Soko nian hanesan sub-kaixa Oka iha Waigae, grupu Kuda Tali   iha Cairabela, grupu ida iha Kaikua, no grupu ida Samadasi, grupu Wairbo, Sukar Laran, Kampu Baru, Ai-ata laran, Wailakama, no ligasaun iha dirasaun munisípiu seluk hanesan Baucau, Manatuto no Dili. Kaixa ne’e ninia papel mak halo koordenasaun servisu iha Villa no halo ligasaun klandentina ho Falintil sira iha ai-laran hanesan halibur ai-hán no rona informasaun iha fatin ruma responsavel kaixa mak sei ba.

Oinsá kona-ba membru kaixa Soko nia kontribuisaun konkreta hodi fó apoiu FALINTIL sira iha ai-laran?

Tuir ha’u -nia hatene, servisu sira-ne’e kaixa Soko halo la’os direta ba komandu Falintil maibé transfere fali ba kaixa Postal Fé iha Trilloka-Baucau mak foin koloka fali ba Falintil sira iha ai-laran.

Iha luta naruk ne’e, menbru kaixa klandestina sira hetan presaun no hetan terror no balun inimigu sira kaptura no hetan kastigu, maibé tanba saida mak tuba nafatin hodi luta nafatin ba Timor-Leste nia indepedénsia?

Durante ne’e akompaña saudozo Jakarta, sente orgullu tanba saudozu ema-ne’ebé firme no brani liu. Hanesan iha tinan 1996, bainhira ba iha Baucau, saudozu halo asaun ho militár no saudozu brani la’o ho komandu hasai militár ne’ebé halo asaun fó juventuve nia naran iha tempu kalan, mau-hu sira atu hasai. Militár Indonézia sira, kaptura saudozu lori ba kadeia baku no hetan tortura makaas no sira seluk inklui membru Soko. Mezmu hetan presaun oioin maibé la hakiduk hodi manten prinsípiu iha luta nian “Mate ka Moris Ukun Rasik An”.

Tinan barak mak ita-bo’ot sira konserva dokumentu rezisténsia ne’e. Tanba saida mak tenke entrega dokumentu rezisténsia ne’e entrega fali ba AMRT?

Ami hakarak entrega dokumentu ba AMRT, nune’e istóra ema hotu bele hatene katak kaixa Soko inklui duni iha tempu resisténsia nian halo duni servisu.

Dokumentu sira-ne’e, ami mesa-mesak rai labele. Ami sente muzeu rezisténsia bele rai dokumentu sira-ne’e hotu ho di’ak no bele konta ninia istória, mezmu ema-ne’ebé harii kaixa SOKO ne’e mate tiha ona.

Bele fó hatene hela, dokumentu rezisténsia nia ne’ebé ita-boot sira entrega ba AMRT ne’e saida-saida de’it?

Dokumentu rezisténsia sira-ne’e mak hanesan karta, fotografia iha prosesu luta, lista naran membru kaixa klandestina nian, karta mensajen hosi saudozu David Alex “Daitula” no seluk tan.

Dokumentu sira-ne’ebé entrega ba ekipa AMRT mak karta korespondénsia Pedro da Costa ba saudozu Jakarta iha 19 abríl 1999, karta korespondensia hosi Ivo ba saudozu Jakarta kona-ba halai sai hosi kadeia, karta hosi Domingas Gusmão ‘’Tanis’’ ba saudozu kona-ba haruka sabaun, sigarru no seluk tan iha 23 janeiru 1999, nafatin ho karta Domingas Gusmão nian ba saudozu iha  22 dezenbru 1998, 12 janeiru 1999, 22 novembru 1999, karta hosi saudozu Jakarta ba Taniu iha 19 agostu 1998, dokumentu naran prizioneiru pertense ba zona Soko iha 24 dezembru 1996.

Karta korrespondensia hosi Rui Ivo de Sa Freitas ‘Hadulas’ ba saudozu Jakarta 14 marsu 1999, karta hosi Mariano Faria ‘Rona’ ba saudozu Jakarta iha tinan 1999, dokumentu ajenda apontamentu diária estrutura zona kaixa Soko, no lista traidór, oráriu operasaun Falintil iha maiu 1997 iha Vemase Vila, Wailakama, Kampu Baru, Waicai durante eleisaun.

Dokumentu lista menbru kaixa zona Soko nian naran no kodigu ho kontribuisaun iha 02 maiu 1997, lista hosi membru kaixa Soko simu fita hosi Sagradu Família-Fitun, karta hosi padre Mateus do Rosario ba Kapolres Baucau 20 agostu 1997.

Dokumentu sekuensia istória populasaun Timor-Leste, karta hosi Sub Estadu Maiór Falintil, David Alex ba irmaun maun Mesak 11 abríl 1997, momentu estabelese CNRM, karta lista kontribuisaun, karta informasaun espiaun ka mauhu relasiona ho ameasa seguransa pesoál ba kaixa Soko, guia renunsia hosi responsavél frente klandestina ne’ebé hetan rekuñesimentu hosi frente armada no fotografia iha Waimori (Agênica Tatoli observa, dokumentu sira-ne’e hakerek iha surat-tahan hatudu letra ne’ebé hakerek ho lapizeira sei mós mezmu iha surat-tahan balun nakles rahun ona).

Dokumentu hirak-ne’e, uluk hetan hosi sé?

Dokumentu sira-ne’e, balun saudozu Jakarta rasik mak halo no karta korrespondénsia hosi estafeta sira. Ne’ebé dokumentu sira antes ne’e, rai duni iha saudozu nia pasta. Ha’u mak rai iha momentu ne’e hodi rai didi’ak keta book no keta entrega ba ema seluk.

 Oinsá rai no subar dokumentu ne’e, to’o agora mós kondisaun di’ak nafatin?

Momentu ne’ebá, inimigu sira liu-liu membru militár Indonézia sira kaptura tiha membru kaixa Soko na’in-tolu (3) inklui saudozo Jakarta. Entaun saudozu Jakarta fó hatene ba ha’u atu kuidadu dokumentu sira-ne’e ho kuidadu no labele subar hamutuk iha fatin ida hodi fahe ba fatin rua ka tolu. Nune’e, momentu ne’e ha’u fahe no subar iha fatin rua, ida fó ba menbru Soko ida mak subar no ida ha’u mak rai.

Ida ha’u rai ne’e mak hatama iha plástiku ida no atu hakoi la biban, nune’e hau falun iha faru ida-nia laran hodi soe sa’e ba uma leten. Antes inimigu sira serku ami-nia uma atu pasa revista uma laran, maibé dokumentu hirak ne’e iha tiha ona uma leten.

Iha situasaun defisíl nia laran, ha’u soe tiha dokumentu sira-ne’e ba uma leten. Liu tiha loron haat (4) mak ha’u lori lori halai ba Baucau. Bainhira iha 2001 atu sobu uma mak, ha’u ba foti sai fali dokumentu sira-ne’e.

Bainhira saudozu Jakarta sei moris, dokumentu sira-ne’e rai duni iha nia pasta no saudozu mak rai iha kuartu laran, no iha pasta laran ne’e ema ida la book.

Dokumentu balun lakon iha momentu 17 juñu 1997, bainhira membru na’in tolu hosi kaixa Soko militár Indonézia kaptura. Nune’e, momentu ne’e ami ho ta’uk entaun dokumentu balun ha’u entrega ba menbru hosi kaixa nian atu lori ba atu kuidadu. Maibé, kuidadu, sala hatama fali iha lata ida-nia laran hodi hakoi iha rai-kuak laran no hatur fali, nune’e bee tama lata laran hodi halo surat-tahan sira sai dodok hotu.

Biografia Saudozu Jeronimo Soares “Jakarta”

Saudozu Jeronimo Soares “Jakarta”, iha loron 01 fulan-janeiru tinan 1994 sai responsavel másimu ba sub kaixa Soko ne’ebé submete iha kaixa Postal FÉ Triloka, halo ligasaun ho komandu Falintil liuhosi Asswa’in na’in rua Acaçio Nicolao da Silva ‘Udan’ no Helder Guterres ‘Taringa’ to’o loron 24 fulan juñu 1997 iha tempu CNRM nian.

Iha loron 25 fulan marsu 1997, saudozu Jeronimo Soares ‘Jakarta’ hetan kapturasaun hosi inimigu militár Indonézia sira iha Vemasse, lori ba investiga iha Kepala Polisi Resort (Kapolres) Baucau no lori tutan ba kastigu nu’udar prizoneiru polítiku iha prizaun Buruma, Baucau.

Maske saudozu kastigu maibé aten brani nafatin asume kargu nu’udar vise koordenadór hodi responsavel ba maluk dadur na’in sira iha komarka laran to’o loron 07 fulan-novembru tinan 1998, simu orden hosi komandu Falintil liuhosi asswa’in  Acaçio Nicolao da Silva ‘Udan’ fó ba funsionáriu seguransa prizaun Marcelino lori informa ba asswa’in Kaikeri hodi organiza dadur na’in sira atu halai sai hosi komarka laran ba subar iha ai-laran

Iha loron 08 fulan novembru 1998, saudozu Jeronimo Soares ‘Jakarta’ halai sai hosi komarka Buruma, Baucau ho nia maluk luta-na’in sira na’in-ualu (8).

Maske saudozu sai ona soldadu Falintil rejiaun II iha kompañia Waimori, maibé asume nafatin kargu nu’udar Vise Sekretáriu Zona frente polítika interna iha postu administrativu Vemasse, munisípiu Baucau to’o funu ramata iha loron 25 fulan outubru 1999.

Saudozu moris iha loron 30 fulan setembru 1972, hosi uma lisan Uai-Ará, aldeia Lari, suku Uai-Ga’e, postu administrativu Vemasse, munisípiu Baucau. Saudozu oan hosi Aman João Gono-Daçe no inan Joana Bernadete Freitas. Saudozu iha maun alin hamutuk na’in hitu (7).

Saudozu Jakarta harii uma-kain ho Domingas Gusmão Goulart ”Tanis”, oan oan na’in-neen (6) kompostu hosi mane lima no feto ida.

Saudozu mate iha loron 09 fulan-agostu tinan 2018 tanba hetan asidente. Momentu ne’ebá, iha loron 27 jullu ba Dili ho bus no fila-fali mai Vemasse iha loron 28 jullu 2018 nafatin ho bus maibé to’o iha postu administrativu Laleia nian hodi vizita família balun, hafoin fila hosi Laleia saudozu hetan maluk ida ho karreta Carry nune’e sae tuir atu mai fali iha Vemasse.

Maibé kondisaun kareta iha odamatan kotuk la metin, nune’e saudozu mós sae tur iha karreta laran, bainhira karreta halai odamatan kois, nune’e saudozu mós monu sai ulun mak tun uluk kona rai, nune’e transporta mai óspital Vemasse, hafoin ne’e transporta tutan ba ospitál referál Baucau no iha loron 03 agostu alta hikas mai uma.

Ho kondisaun monu, saudozu grave iha parte ulun, nune’e iha loron 08 agostu 2018 hetan atakasaun fila-fali, nune’e komunika ho médiku transporta ba óspital Baucau, koko tensaun sa’e makaas no iha loron 09 agostu iha tuku 17h00 lokra’iik saudozu hakotu nia iis.

Hafoin iha tempu indepedénsia saudozu seidauk hakotu iis mak atividade sira halo mak hanesan nafatin nu’udar koordenador juventude, servisu ajuda konsellu veteranu mai atu rejista dadus  2003 no verfikasaun dadus saudozu hamriik prontu sai testamuña ba nia maluk sira. No, restu mortál ne’ebé rekolla saudozu hola parte iha informasaun hosi konsellu veteranu prontu apoiu fó servisu.

Iha momentu ne’e, saudozu nia mate isin atu ba hakoi iha Jadim dos Herois Metinaro maibé saudozu nia kaben lakohi tanba oan sira sei kiik no aman hakoi dook oinsá bainhira iha loron finadu ruma atu vizita tau ai-funan la’o dook, nune’e saudozu nia kaben deside hakohi de’it iha Vemasse.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here