Responsável kaixa Oe-dolar, suku Ossouala, postu administrasaun Vemasse, munisípiu Baucau, Laura de Fátima Correia. Imajen Agência TATOLI/Natalino Belo.

BAUCAU, 13 outubru 2021 (TATOLI) – Kaixa klandestina Oe-dolar ne’ebé lokaliza iha suku Ossouala, postu administrativu Vemasse, deside entrega dokumentu rezisténsia istóriku durante prosesu funu ba libertasaun nasionál ba Arkivu Muzeu Rezisténsia Timorense (AMRT.ip) nune’e bele halo prezervasaun.

Responsável kaixa Oe-dolar, Laura de Fátima Correia haktuir, kaixa Oe-dolar estabelese iha 22 fulan-fevereiru 1996 hafoin sorumutu ho komandante Miku no Komandante Belak iha Larigutu, Ossu, munisípiu Viqueque.

“Dokumentu hirak-ne’e ami rai de’it iha uma, vida to’o mate bele lakon, tanba ne’e ami konsidera AMRT mak fatin seguru liu atu rai dokumentu ba,” Responsável kaixa informa ba Agéncia TATOLI iha suku Ossouala, kuarta ne’e.

Dokumentu istóriku ne’ebé kaixa Oe-dolar entrega mak dokumentu rezisténsia kaixa Oe-dolar iha tinan 1998 ne’ebé hato’o ba Dewan Solidariedade Mahasiswa iha Ossoala, Guia de Remessa (karta kontribuisaun), karta korrespondénsia entre kaixa ho komandu, jornál balun ne’ebé entrega hosi komandu hafoin tún ba vila inklui farda no kapa ne’ebé komandu uza iha tempu rezisténsia inklui biografia Oe-dolar.

“Ami kuidadu tanba responsabilidade ami-nia, mesmu iha tempu ne’ebá ami muda ba mai uma maibé sempre kuidadu, balun hahú ladi’ak hanesan letra balun hahú lakon, ami tau iha fatin seguru to’o agora sei iha,” Laura akresenta.

Maneira subar dokumentu durante tempu luta nian mak tanba forsa Indonézia sira besik entaun subar iha plástiku, ke’e-kuak hakoi kaundu la seguru hasai subar fali iha fatin seluk, la permanente iha fatin-ida, tempu udan bele ke’e hakoi fali iha uma-laran.

Laura konta tuir, molok estabelese kaixa Oe-dolar, Nia parte halao ona servisu kaixa sadere iha suku Ossouala dentru tinan 1990.

Tempu ne’ebá seidauk hasoru dereita ho Komando da luta no liuhosi esforsu inklui meus oinoin ikus mai hetan konfiansa no orientasaun komandu konsege estabelese kaixa Oe-dolar. Naran Oe-dolar rasik mai hosi rotan ne’ebé bobar roda iha foho-tutun Ossouala.

“Grupu kiik ne’ebé lidera hosi ha’u rasik halo konsultasaun ho papa (aman rasik) hodi husu, foho Ossouala nia tutun ai-horis importante saida mak moris iha-ne’ebá, papa dehan foho leten iha rotan-mean ida-ne’ebé bobar haleu hanesan roda, papa fó hanoin entaun ami deside hanaran kaixa Oe-dolar,” Laura konta.

Totál membru fofoun besik nain-10, komesa halo serbisu tama-sai uma, ko’alia ho inan-aman sira kona-ba saida mak terus, lakon, kastigu, mate nune’e esplika rezisténsia seidauk remata.

“Ami-nia fatin ne’e portaun asesu ba Uaimori, sasán hosi vila konsentra iha ami-nia fatin mak transfere ba Uaimori, komandu balun moras iha tinan 1997-1998 liuhosi ami mak entrega tutan ba kaixa postál Fé Triloka,” Laura hateten.

Kaixa Oe-dolar kompostu hosi komunidade suku Ossouala ne’ebé hela iha área Bahasa’e ne’ebé akumula juventude sira konsentra hamutuk hodi fó apoia ba Komandu da Luta.

Tempu ne’ebá kontribuisaun mak ajuda rekolla ekipamentu funu hanesan bala-musan liuhosi esforsu rasik, entrega sasán no hasoru direita Komandu da Luta.

Nu’udar responsável, Laura iha papél simu informasaun hosi estafeta sira liuhosi orientasaun komandu, organiza inkontru no rekolla sasán kontribuisaun hosi komunidade hodi entrega ba Komandu da Luta.

Kontribuisaun ne’ebé fó tuir nesesidade komandu nian hanesan, ropa, farda, sigarru, foos, sasán funu no ai-moruk.

“Liuhosi estafeta sira, hakerek mós karta entrega mai, ami bele hatene situasaun iha ai-laran no informa situasaun seguransa iha vila ba komandu,” Laura hateten.

Maske feto nunka sente ta’uk bainhira luta hasoru invazaun Indonézia tanba sei kiik haree ho matan saida mak akontese iha Ossoala.

Nia konsidera mosu masakre hanesan inan-aman barak mak forsa Indonézia kaptura, kesi ba oho lakon, kastigu to’o Atauro no Cailaco.

“Ami joventude Ossoala nian kuda-metin iha fuan saida mak inan-aman sira terus iha tempu ne’ebá, balun mate, kastigu, lakon nune’e ami sei la hakiduk iha momentu ne’ebá,” Laura haktuir.

Nu’udar responsável no feto la signifika tenke la’o (ransu) ho de’it maluk feto, kalan ka loron serbisu hamutuk ho maluk mane sira, no konsidera malu nu’udar feton-naan rasik.

“Hamutuk ho Komandu da Luta sira ba ha’u la sente ta’uk, mesmu iha família balun ko’alia maibé ba ha’u metin nafatin iha fuan katak to’o tempu ita sei manán,” Laura hateten.

Entertantu, estadu Timor-Leste rasik rekoñese ona kontribuisaun luta hosi membru balun kaixa Oe-dolar no Laura rasik rejistradu ona veterana kategoria 8-14.

Jornalista : Natalino Belo

Editór       : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here