Saudozu Borja da Costa. Foto: Media SEAK

DILI, 14 outubru 2021 (TATOLI)-Poeta, Kompozitór, Múziku no Eskritór Timor-oan, Abe Barreto Soares, hateten obra Borja da Costa kontribui ba luta libertasaun nasionál.

Notísia Relevante: Saudozu Francisco Borja da Costa nia poezia hametin espíritu patriotizmu no nasionalizmu

Poeta, Kompozitór no Eskritór Timoraon, Abe Barreto Soares. Imajen/Espesiál.

“Borja da Costa nia obra sira kontribui duni ba luta libertasaun nasionál. Múzika sira hanesan ‘Patria!, Patria!’ sai ita-nia inu nasional, Foho Ramelau sai inu partid Fretilin nian, Kdadalak no Kole Lele Mai no seluk tán, iha duni impaktu boot ba iha movimentu libertasaun nasional Timor-Leste nian desde kedas tinan 1974,” Abe barreto Soares hateten ba Agência Tatoli iha ámbitu komemorasaun loron Nasionál Kultura ne’ebé Estadu Timor-Leste deklara hosi loron moris Borja da Costa nian (14 outubru) , liuhosi WhatsApp, sesta ne’e.  

Borja da Costa ninia obra sira-ne’e fanun tebes duni Timor-oan sira-nia konsiénsia nasionál, tanba ninia obra poetika ho titulu ‘’Kdadalak” ne’e ko’alia kona-ba unidade nasionál ne’ebé lori timor-oan sira hamutuk luta ba ukun rasik-an.

“Ha’u kuaze gosta hotu Borja da Costa ninia obra poétika sira. Maibé, ha’u gosta li-liu mak KDADALAK tanba obra oan ne’e ko’alia ho furak tebes  kona-ba unidade. Espiritu unidade sempre relevante, hosi pasadu, prezente no futuru. Atu lori Timor ba oin, se laiha unidade, ita hela de’it mak naran.  Unidade lori ita hanoin atu refleta kle’an kona-ba esénsia futu ai-sar kesak hamutuk, mak ita bele dasa foer sira iha ita-nia leet,” nia dehan.

Obra poétika Borja da Costa nian, nu’udar lalenok boot ida atu leno timor-oan sira-nia an hanesan timor-oan ne’ebé sempre hus ba an rasik, mai hosi ne’ebé, oras ne’e iha ne’ebé no atu ba ne’ebé, tanba Borja da Costa inspira, motiva no lori timor-oan lubuk ida mout iha mundu literáriu hodi hatutan nina mehi sira.

Nia hateten, ba Borja da Costa hanesan poeta ida-ne’ebé husik hela ain-leut literáriu lubuk ba poeta no poetiza timor-oan sira, tanba nia hanesan matadalan poétiku Timor nian ida-ne’ebé boot.

Tanba ne’e, nia dehan, Estadu Timor-Leste deklara hosi loron moris Borja da Costa nian hanesan loron Nasional Kultura Tmr-Leste nian.

“Ha’u apresia no parabeniza Estadu ba buat ne’e. Ne’e hatudu duni katak ita valoriza tebes kontribuisaun Borja da Costa nian ba ita-nia konstrusaun estadu no nasaun hosi aspetu kulturál. Borja da Costa ninia poema sira refleta momoos nia pensamentu hanesan defensór boot ba kultura Timor nian,” nia dehan.

Poeta no múziku ne’e hato’o lia-tatoli ba Governu, presiza no tenke aloka orsamentu boot ba atividade kulturál sira, tanba Timor-Leste presiza haburas kultura nu’udar abut no hun nasaun ida-ne’e nian. Presiza hametin aspetu kultura, ekonomia no sosiál tanba ida-ne’e nu’udar sanak boot rua hanesan ba karuk no ba loos no aspetu polítika nu’udar sanak ida-ne’ebé lolo aas sa’e ba tutun.

Nia huusu ba Governu, presiza iha movimentu kulturál konstante ne’ebé iha dimensaun polítika, ekonómika no sosiál, hodi fanun neon, laran, fuan, isin no klamar timor-oan nian iha prosesu konstrusaun Estadu no nasaun.

Ba jerasaun foun sira, nia husu atu bele mout iha mundu literatura mak rona barak, haree no lee barak, hakerek barak iha kakutak no iha surat-tahan, no ko’alia barak bainhira tempu to’o ona. Jerasaun foun sira labele ansi, kalma, fiar an, hakat iha dalan fuik literáriu nian, hodi tuir ritmu natureza nian.

“Natureza hanorin ita atu iha pasiénsia, persisténsia, konsiénsia, rezisténsia no konsisténsia,” nia dehan.  

Biografia Poeta Borja da Costa

Francisco Borja da Costa moris iha Fatuberlihu, iha kosta sul Timor-Leste iha loron 14 fulan-uutubru tinan 1946. Nia mate ho tinan 30 bainhira Timor-Leste hetan invazaun hosi tropa Indonézia iha loron 07 fulan-dezembru tinan 1975 ne’ebé oho hosi tropás parakedista Indonézia nian.

Notísia Relevante: Borja da Costa, Poeta Revolusionáriu No Matadalan Poétiku

Bainhira Revolucão dos Cravos mosu iha Lisboa iha loron 25 fulan-Abril tinan 1974, Borja da Costa iha Portugal no hala’o estájiu professional iha “Diario de Noticias” Iha Lisboa, nia haknaar no hela hamutuk ema Timor-Leste seluk iha Casa dos Timorenses, sentru ida ba nasionalista Timor-Leste iha liur.

Durante iha Portugal, Borja da Costa nia espiritu literáriu-revolusionáriu hakroat liután liuhosi nia leitura ba obra eskritór famozu sira, tuir hakerek na’in ne’ebé iha influensia boot mak Bertold Brecht, Pablo Neruda, Maxim Gorky, ”knaar Marxista” no poezia Mao Tsetung nian.

Borja da Costa nu’udar lia-na’in ida ne’ebé “hakerek poezia iha forma klásika, iha lia-Tetum. Nia imajen sira ne’e hotu kona-ba buat murak sira Timor nian; foho tutun maka kleuk tun sa’e, manu sira iha knua laran, kona-ba mota sira ne’ebé fahe malu no hamutuk fila-fali ho laiha rohan laek.”

Borja da Costa hahú tenta atu fanun Timoroan sira hodi “loke matan didi’ak hodi haree realidade katak sira moris iha ukun koloniál nia okos” bainhira nia fila hikas tiha mai ona hosi Lisboa iha tinan 1974.

Hamutuk ho nia maluk Abílio Araújo iha Fretilin ne’ebé nia rasik halo parte, sira “kria poezia no hananu ne’ebé fo sai hanoin nasaun povu Timor ne’ebé kleur tebes ona moris iha hanehan laran. Sira muda hananu tradisionál. Knaar ba dahuluk hosi rarosan ida-ne’e mak poezia “Foho Ramelau” ne’ebé tuirmai sai hanesan “hananu revolusaun” Fretilin nian.”

Foho Ramelau

…….

Tan sá timur ulun sudur uai-uain?

Tan sá timur oan ata uai-uain?

Hadeer rai-hun mutin ona lá!

Hadeer loron foun sa’e ona lá!

Loke matan loron foun to’o iha knuak

Loke matan loron foun iha ita rain

Hadeer kaer rasik kuda talin eh!

Hadeer ukun rasik ita rain eh!

Nune’e mós Borja da Costa kontribui nia obra “Pátria, Pátria” ba inu nasionál Timor-Leste nian. Bainhira independénsia Timor-Leste nian deklara unilateralmente iha loron 28 fulan-Novembru, tinan 1975, inu ne’e hananu ba dahuluk públikamente.

Patria! Patria!

Timor-Leste, nossa Nação

Glória ao Povo e aos heróis Da nossa Libertação.

Vencemos o colonialismo Gritamos, abaixo o Imperialismo

Terra Livre, Povo livre Não, não a exploração.

Avante unidos Firmes e decididos

Na luta contra o Imperialismo

O inimigo dos Povos

Até a vitória final Pelo caminho da Revolução

Pátria, pátria!Timor-Leste, nossa Nação

Glória ao Povo e aos heróis

Da nossa Libertação.

Notísia Relevante: Prezidente CI konsidera Borja da Costa hanesan jornalista revolusionáriu

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here