DILI, 13 outubru 2020 (TATOLI)—Saudozu Francisco Borja da Costa nia poezia hametin timoroan sira-nia espíritu patriotizmu no patriotizmu iha prosesu luta ba ukun rasik-aan.
“Loron 14 fulan-outubru, ita sei komemora dia da kultura nu’udar aniversáriu ba poeta, Francisco Borja da Costa ne’ebé ninia poezia konsiensializa ita hodi hametin espíritu patriotizmu no nasionalizmu, haburas no haberan ita-nia kultura rasik perante dominasaun kulturál sira hosi rai-li’ur. Ida-ne’e implisita iha Borja da Costa nia poezia O Rasto da Tua Passagem ne’ebé nega glória podér koloniál sira-nian,“ Xefe Bankada FRETLIIN, Deputadu Francisco Miranda Branco, informa liuhosi plenária Parlamentu Nasionál, tersa ne’e.
Deklarasaun bankada FRETILIN ne’e hateten durante tempu naruk hetan dominasaun hosi rai-li’ur ne’ebé fó influénsia ba ita-nia kultura ohin loron nian.
“Ita-nia kultura ho ninia hún hosi kedas migrasaun melanézia no austronézia nian hosi tinan rihun liubá, halo interasaun ho kultura europeia liuhosi kolonizasaun portugeza; enkontru ho sivilizasaun osidentál ne’e sai pontu fulkrál ida ba dezenvolvimentu ita-nia kultura ohin loron no nafatin nakloke ba modernidade globál ho avansu teknolójia ne’ebé sofistikada liután,“ nia dehan.
Xefe Bankada FRETILIN ne’e afirma, kruzamentu kulturál ne’e mak hariku ita-nia kultura no fó identidade únika iha ita-nia rejiaun ne’ebé haleu ho nasaun potensiál boot rua.
Bankada FRETILIN iha okaziaun Dia da Cultura tinan ida-ne’e, apela atu timoroan hotu hakbiit no hametin liután kultura.
Jornalista: Evaristo Soares Martins
Editór: Cancio Ximenes
