Primeiru Ministru, Taur Matan Ruak, prezide reuniaun Konsellu Ministru, Iha Palásiu Governu, segunda (24/09). Imajen TATOLI/Francisco Sony

DILI, 24 setembru 2021 (TATOLI)—Ministru Finansa, Rui Augusto Gomes, aprezenta proposta iha reuniaun Konsellu Ministru (KM), kona-ba tetu agregadu no dezagregadu Orsamentu Jerál Estadu (OJE) 2022 ho montante biliaun $1,675, ne’ebé hetan aprovasaun hosi ezekutivu sira.

“Montante ne’e hodi kobre nesesidade hosi programa no prioridade nasionál sira ne’ebé define ona hosi VIII Governu Konstitusionál,” Ministru Prezidénsia KonselluMinistru, Fidelis Manuel Leite Magalhães, relata, hafoin reuniaun ezekutivu iha Palásiu Governu, sesta ne’e.

Notísia relevante: Governu aprova tetu agregadu OJE 2022 biliaun $1,5

Hosi totál orsamentu ne’e, millaun $233 ba saláriu no vensimentu, millaun $449,8 ba bens no servisu, millaun $565,9 ba transferénsia públika, millaun $24,4 korresponde ba kapitál menór no millaun $401,7 ba kapitál dezenvolvimentu.

Governu Konstitusionál VIII defini ona prioridade nasionál neen ba OJE tinan 2022 hanesan dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu sira (agrikultura no turizmu), ambiente no konetividade, dezenvolvimentu setór públiku, dezenvolvimentu rurál, no  governasaun di’ak.

Antes ne’e, Governu aprova tetu agregadu inisiál biliaun $1,571.6, maibé hafoin Komité Revizaun Orsamentu Polítika (KROP) konvoka enkontru durante semana rua ho entidade Estadu hamutuk 98, iha proposta adisionál ne’ebé bainhira akumula hotu iha aumentu millaun $103,4, nune’e montante sa’e ba biliaun $1,675.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here