Diretór Jerál Sekretariadu Tékniku Administrasaun Eleitorál (STAE), Acilino Manuel Branco. Imajen Tatoli/Evaristo Soaresa Martins.

DILI, 30 setembru 2021 (TATOLI)–Lei Eleitorál ba Prezidente Repúblika introdús ona sentru votasaun hamutuk 1200 iha territóriu nasionál no estabelese sentru votasaun paralelu tolu iha kapitál Dili.

Notísia Relevante: Sentru votasaun paralelu introdús ona iha lei eleitorál ba Prezidente Repúblika

Diretór Jerál Sekretariadu Tékniku Administrasaun Eleitorál (STAE), Acilino Manuel Branco, esplika eleitór foun kuaze 7000 to’o fulan-jullu no oras ne’e tékniku sira kontinua resensia hela iha postu administrattivu sira iha territóriu nasionál.

Nia dehan, totál provizóriu to’o fulan-jullu 2021 hamutuk eleitór na’in 8.406.305 maibé tékniku kontinua halo rekollamentu hodi sinkroniza, nune’e aprezenta ba partidu polítiku iha enkontru tuir mai.

“Ita identifika ona sentru votasaun hamutuk 1.200, estasaun 1.500, ne’ebé identifika no lojistikamente ita preparadu ba númeru ne’ebé mak iha hodi hasoru eleisaun prezidensiál 2022 nian,” Diretór Jerál STAE ne’e informa ba jornalista sira, iha salaun enkontru STAE Nasionál, Caicoli, Dili, kinta ne’e.

Posibilidade bele iha mudansa ba sentru votasaun sira maibé la’ós ho númeru boot tanba sei implika ba buat barak hanesan lojístika, ofisiál sira, partidu polítiku sira mós tenke prepara fiskál.

Kestaun seguransa, nia dehan, tanba parte PNTL mós sei halo kalkulasaun ba iha membru PNTL sira-ne’ebé mak sei koloka iha sentru votasaun sira, nune’e mós ba jornalista sira-ne’ebé atu halo kobertura ba sentru votasaun iha eleisaun prezidensál 2022 ne’e.

Nia dehan, lei previstu suku ida mínimu iha sentru votasaun ida entaun iha suku 452 ne’e korresponde ho sentru votasaun 1.200 no estasaun 1.500. signifika suku balun liu sentru votasaun ida, tanba ne’e sei halo aprezentasaun iha enkontru tuir mai.

“Kona-ba sentru votasaun paralelu ne’e tuir lei sei estabelese iha Dili, ne’e inklui ona iha 1.200 sentru votasaun ne’e. Ne’ebé ami identifika ona sentru votasaun paralelu ne’e ida iha STM Becora ne’e atende eleitór parte leste, ida iha eis finansa Caicoli ne’e atende eleitór parte sentrál nian no parte oeste nian mak entre INAP no Arte Moris sei atende eleitór parte oeste,” nia informa.

Funsionamentu kona-ba sentru votasaun paralelu ne’e, sei diskute hela no sei aprova ho dekretu Governu nian.

“Ha’u fó mensajen ba públiku, liu-liu eleitór sira, atu ba partisipa iha atualizasaun baze dadus hodi atualiza kartaun eleitorál. Sidadaun sira-ne’ebé uza hela kartaun eleitorál munisípiu entaun momentu ida-ne’e hakbesik hodi atualiza kartaun eleitorál, karik hakarak vota iha sentru votasaun paralelu ne’e,” nia aviza.

Alterasaun artigu 31-A (Sentru votasaun paralelu):

  1. Sentru votasaun paralelu ne’e sentraliza iha kapitál nasaun nian, destinada ba eleitór inskritu sira iha unidade jeográfika resensiamentu ne’ebé lokalizada fora hosi munisípiu Dili, ne’ebé hetan impedimentu, ho razaun médika, eskolár ka ezersísiu funsaun públika, bainhira dezloka ba lokalizasaun ne’ebé de’it iha sentru votasaun sira.
  2. Bele mós vota iha entros de votasaun paralelu iha kualkér eleitór seluk ne’ebé inskritu iha unidade jeográfika resensiamentu lokaliza fora hosi munisípiu Dili, dezde justifika impedimentu iha dezlokasaun ba lokál ne’ebé estabelese sentru votasaun.
  3. Estabelese sentru votasaun paralelu tolu, ida ba eleitór ne’ebé resensia iha munisípiu Lautém, Baucau on Viqueque, ida ba eleitór sira-ne’ebé resensia iha munisípiu Manatuto no Liquiçá, Aileu, Ermera no Postu Administrativu Ataúro, no ida ba eleitór inskritu iha munisípiu Ainaro, Bobonaro, Covalima, Manufahi no Rejiaun Administrativa Espesiál Oecusse-Ambeno.
  4. Kada sentru votasaun paralelu só bele funsiona ho mínimu rejista eleitór atus-ida (100).

Artigu 31-B (Inskrisaun iha sentru votasaun paralelu):

  1. Eleitór ne’ebé atu vota iha sentru votasaun paralelu, rejista ho entidade saúde, edukasaun ka Komisaun Funsaun Públika, konforme trata ema ida moras, estudante ka dosente, funsionáriu ka ajente públiku.
  2. Eleitór sira seluk, ne’ebé refere iha númeru anteriór, ne’ebé que pretende vota iha sentru votasaun paralelu, aplika hosi STAE.
  3. STAE fixa no anúnsia publikamente data inísiu no termina períodu rejistu refere iha númeru anteriór.
  4. Entidade referida iha númeru 1 haruka ba STAE kona-bá lista eleitór sira-ne’ebé rejista ona, iha loron seguinte hodi termina períodu rejistu.
  5. STAE elabora lista eleitór hosi kada sentru votasaun paralelu.
  6. Eleitór inskritu iha sentru votasaun paralelu elimina hosi lista eleitór unidade jeográfika resensiamentu iha-ne’ebé rejista.
  7. Inskrisaun iha sentru votasaun paralelu vale apenas ba eleisaun subsekuente.
  8. Governu bele, iha sede regulamentasaun, adota medida seluk kona-ba prevensaun fraude, dezignadamente inutilizasaun kartaun eleitór, hafoin ezerse direitu votu.

Notísia Relevante: Governu propoin aplika sentru votasaun paralelu iha eleisaun prezidensiál

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here