Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 08 juñu 2021 (TATOLI)—Governu propoin liuhosi proposta-lei alterasaun daneen ba lei eleitorál ba Prezidente Repúblika atu aplika sentru votasaun paralelu iha munisípiu Dili, nune’e fasilita sidadaun sira-ne’ebé la konsege ezerse diretu vota iha sira-nia hela-fatin.

Notísia Relevante: CNE hato’o paresér ba PN kona-ba pakote lei eleitorál tolu

“Iha eleisaun prezidensiál ne’e Governu pretende atubele introdús sentru votasaun paralelu iha de’it munisípiu Dili nune’e ita-nia estudante sira, ita-nia ema sira moras ne’ebé konsulta hela iha Dili labele fila-fali ba sira-nia hela-fatin iha tempu eleisaun, entaun bele ba partisipa sentru votasaun paralelu sira iha Dili. Ne’e aplika de’it iha Dili,” Ministru Administrasaun Estatál (MAE), Miguel Pereira de Carvalho, informa ba jornalista sira, iha Parlamentu Nasionál, tersa ne’e.

Governante ne’e, ko’alia asuntu ne’e bainhira halo audiénsia ho Komisaun A kona-ba alterasaun datoluk ba lei númeru 5/2006, 28 dezembru kona-ba órgaun administrasaun eleitorál, alterasaun dahuluk ba lei númeru 6/2016, 25 maiu kona-ba Lei resensiamentu eleitorál no proposta-lei alterasaun daneen ba lei 7/2006, 28 dezembru, kona-ba lei eleitorál ba Prezidente Repúblika.

Kona-ba regulamentasaun, Governu sei haree fila-fali bainhira reprezentante povu fó votu favorável ba proposta-lei hirak ne’e.

“Ne’e proposta ida-ne’ebé Governu lori mai, nune’e diskute hamutuk entre Parlamentu Nasionál ho Governu. Se konkorda órgaun administrasaun eleitorál (STAE-CNE) sira sei implementa,” nia dehan. 

Nia haktuir, kada eleisaun jerál sempre enfrenta situasaun ida-ne’ebé ke antes loron ida ka rua ba eleisaun, ema barak sempre fila ba sira-nia hela-fatin liu-liu sira-ne’ebé mak hela iha Dili.

“Tanba ema hotu rekuñese katak atu vota ne’e tenke vota iha unidade jeografika resensiamentu ne’e, ne’e kestaun ne’ebé Governu hakarak rezolve liuhosi sentru votasaun paralelu iha Dili ne’e,” nia dehan.

Maibé, nia hatutan, STAE sei aviza antes loron 40 atu STAE bele rejistam nune’e loron eleisaun bele iha fatin espesífiku ida liuhosi sentru votasaun paralelu, tanba importante liu mak rezultadu eleisaun hatudu transparente.

Jullu, resensiamentu eleitorál

Ministru Administrasaun Estatal fó-sai katak hahú hosi 01 jullu 2021, Sekretariadu Tékniku Administrasaun Eleitorál (STAE) sei halo resensiamentu ba sidadaun sira iha territóriu nasionál.

“Hahú 01 jullu STAE sei iha fulan neen (6) nia laran realiza resensiamentu eleitorál iha fatin hotu-hotu. Ita-nia sidadaun sira-ne’ebé hakarak troka kartaun eleitorál bele ba iha fatin ne’ebé STAE prepara ona tanba balun hosi moris iha Baucau maibé iha iha eleisaun prezidensiál ne’e hakarak vota de’it iha Dili entaun bele ba troka kartaun eleitorál,” nia dehan. 

Prazu resensiamentu eleitorál ne’e hahú hosi 01 fulan-jullu to’o fulan-janeiru 2022 hodi halo mós atualizasaun baze ba dadus (base de dados).

Entretantu Prezidente Komisaun A ne’ebé trata asuntu Justisa no Konstitusionál, Deputadu Joaquim dos Santos ‘Boraluli’ eslika, proposta-lei hirak ne’e nesesária iha situasaun atuál.

“Ne’e depende ba miaoria. Se maioria deside pasa entaun Governu bele implementa. Se la konkorda entaun mantein lei vijente (lei anteriór),” Prezidente Komisaun A ne’e fundamenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here