Prezidente Komisaun A, Deputadu Joaquim dos Santos “Boraluli” . Imajen Tatoli/Evaristo Soares Martins.

AILEU, 25 juñu 2021 (TATOLI)—Deputadu sira hosi Komisaun A ne’ebé trata asuntu Justisa no Konstitusionál introdús ona sentru votasaun paralelu iha lei eleitorál ba Prezidente Repúblika (PR), nune’e sei implementa (aplika) iha eleisaun prezidensiál no parlamentár.

Prezidente Komisaun A, Deputadu Joaquim dos Santos ‘Boraluli’, hateten proposta Governu nian kona-ba introdusaun sentru votasaun paralelu aprovadu iha espesialidade ho rezultadu votasaun a-favór 9, laiha kontra no abstensaun.

“Sentru votasaun paralelu, ita introdús ona iha lei eleitorál ba Prezidente Repúblika,” Deputadu Boraluli anunsia hafoin votasaun, iha otél Mukti, suku Aissirimou, munisípiu Aileu, sesta ne’e.

Iha lei vijente artigu 31 númeru 1 hateten, kada suku funsiona pelo menos sentru votasaun ida, ne’ebé estabelese hosi STAE hodi atende númeru eleitorál ka distánsia entre aldeia ho suku, aumenta sentru votasaun, sein prejuízu salvaguarda segredu votu.

Númeru 2 hosi artigu ne’e hateten, kada sentru votasaun bele funsiona liu estasaun votu no númeru 3 hosi artigu ne’e hatutan, númeru no lokalizasaun sentru votasaun no estasaun votu divulga hosi STAE até loron 30 molok loron ba eleisaun.

Iha lei vijente la previstu sentru votasaun paralelu entaun Governu liuhosi Ministériu Administrasaun Estatál propoin iha proposta ne’e hodi introdús tán sentru votasaun paralelu iha eleisaun jerál sira.

Alterasaun artigu 31-A (Sentru votasaun paralelu):

  1. Sentru votasaun paralelu ne’e sentraliza iha kapitál nasaun nian, destinada ba eleitór inskritu sira iha unidade jeográfika resensiamentu ne’ebé lokalizada fora hosi munisípiu Dili, ne’ebé hetan impedimentu, ho razaun médika, eskolár ka ezersísiu funsaun públika, bainhira dezloka ba lokalizasaun ne’ebé de’it iha sentru votasaun sira.
  2. Bele mós vota iha entros de votasaun paralelu iha kualkér eleitór seluk ne’ebé inskritu iha unidade jeográfika resensiamentu lokaliza fora hosi munisípiu Dili, dezde justifika impedimentu iha dezlokasaun ba lokál ne’ebé estabelese sentru votasaun.
  3. Estabelese sentru votasaun paralelu tolu, ida ba eleitór ne’ebé resensia iha munisípiu Lautém, Baucau on Viqueque, ida ba eleitór sira-ne’ebé resensia iha munisípiu Manatuto no Liquiçá, Aileu, Ermera no Postu Administrativu Ataúro, no ida ba eleitór inskritu iha munisípiu Ainaro, Bobonaro, Covalima, Manufahi no Rejiaun Administrativa Espesiál Oé-Cusse Amebeno (RAEOA).
  4. Kada sentru votasaun paralelu só bele funsiona ho mínimu rejista eleitór atus-ida.

Artigu 31-B (Inskrisaun iha sentru votasaun paralelu):

  1. Eleitór ne’ebé atu vota iha sentru votasaun paralelu, rejista ho entidade saúde, edukasaun ka Komisaun Funsaun Públika, konforme trata ema ida moras, estudante ka dosente, funsionáriu ka ajente públiku.
  2. Eleitór sira seluk, ne’ebé refere iha númeru anteriór, ne’ebé que pretende vota iha sentru votasaun paralelu, aplika hosi STAE.
  3. STAE fixa no anúnsia publikamente data inísiu no termina períodu rejistu refere iha númeru anteriór.
  4. Entidade referida iha númeru 1 haruka ba STAE kona-ba lista eleitór sira-ne’ebé rejista ona, iha loron seguinte hodi termina períodu rejistu.
  5. STAE elabora lista eleitór hosi kada sentru votasaun paralelu.
  6. Eleitór inskritu iha sentru votasaun paralelu elimina hosi lista eleitór unidade geojráfika resensiamentu iha-ne’ebé rejista.
  7. Inskrisaun iha sentru votasaun paralelu vale apenas ba eleisaun subsekuente.
  8. Governu bele, iha sede regulamentasaun, adota medida seluk kona-ba prevensaun fraude, dezignadamente inutilizasaun kartaun eleitór, hafoin ezerse direitu votu.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here